40 dzion paśla terakta ŭ minskim mietro

Mierapryjemstvy, prymierkavanyja da 40 dzion z dnia terakta ŭ minskim mietro, projduć u piatnicu ŭ stalicy.

Vybuch prahrymieŭ 11 krasavika, prykładna ŭ 17:55, na stancyi mietro «Kastryčnickaja». Zahinuli i potym pamierli ad ran 14 čałaviek, bolš za 200 byli špitalizavanyja. Pa stanie na čaćvier u minskich balnicach znachodzilisia 28 paciarpiełych. Mierkavanyja terarysty byli zatrymanyja biełaruskimi śpiecsłužbami praz sutki paśla vybuchu. Śledstva pakul ich proźviščaŭ nie nazyvaje.

U piatnicu ŭdzień adbudziecca ŭskładańnie kvietak u pamiać zahinułych pry terakcie, u hałoŭnym chramie stalicy — Śviata-Duchavym kafiedralnym sabory — projdzie panichida.

La ŭvachoda na stancyju «Kastryčnickaja» ustalujuć časovuju miemaryjalnuju šyldu.

***

Adna z paciarpiełych ad vybuchu Maryna Šubič sustrenie dzień naradžeńnia ŭ špitali. 22-hadovaja studentka, jakaja druhi miesiac adnaŭlajecca paśla surjoznych apieracyj, budzie abaraniać dypłomnuju pracu ŭ balnicy.

— Lekary kažuć, što idzie palapšeńnie, ale Maryna praktyčna nie bačyć. Tolki ź blizkaj adlehłaści i toje razmazana. Patrebna jašče adna apieracyja. Mahčyma, pajedziem u Maskvu. Ale pakul nielha: u Maryny jašče prablemy z nahoj. Ale jana ŭžo pavoli chodzić. Praŭda, pakul na mylicach. Treba budzie jašče rabić płastyku na pravaj nožcy, — raspavioŭ «Kamsamołcy» baćka Maryny Mikałaj Šubič.

Na apieracyju patrabujecca niamała srodkaŭ. Kolki — baćki jašče nie viedajuć. Pakul jany atrymali kampiensacyju ad dziaržavy — 3,5 miljona rubloŭ.

— Dziakuj kaleham Maryny, jany taksama dapamahli. Dačka prachodziła praktyku, pracavała sakratarom u fondzie sacyjalnaj abarony. Kažuć, što jašče vypłacić strachoŭku mietro. Nakštałt dźvie tysiačy jeŭra, ale pa jakim kursie — navat nie viedaju…

Pakul ža Maryna maryć viarnucca dadomu i abaranić dypłom.

Akademičny adpačynak brać nie choča. Jano i zrazumieła: napiaredadni vybuchu dziaŭčyna abaraniła try čverci dypłomnaj pracy, zastałosia ŭsiaho ničoha.

— Vykładčyki pajšli dačcy nasustrač i sami pryjeduć da jaje ŭ balnicu, kab Maryna mieła mahčymaść abaranić dypłom.

Paśla zakančeńnia univiersiteta Maryna chacieła źjechać u Čechiju i praciahnuć navučańnie. Z hetymi płanami daviadziecca pačakać. Lekary nie śpiašajucca rabić prahnozy, tłumačačy, što ŭsio zaležyć ad arhanizma.

Siońnia Marynie spaŭniajecca 23 hady.

• 0
• 0
• 0
• 0
• 0
• 0
• 0
• 0