Prezident ZŠA Donald Tramp abviaściŭ ab pavyšeńni impartnych myt na tavary z Paŭdniovaj Karei z 15% da 25%. Tramp abvinavaciŭ zakanadaŭcaŭ u Sieule ŭ tym, što jany da hetaha času nie ratyfikavali «histaryčnuju ździełku», dasiahnutuju pamiž lidarami dźviuch krain letam 2025 hoda.
Pad udar trapili klučavyja pazicyi karejskaha ekspartu: aŭtamabili, farmaceŭtyka, elektronika. Tramp nastojvaje, što Vašynhton vykanaŭ svaju častku abaviazacielstvaŭ, źniziŭšy taryfy raniej, i ciapier čakaje ŭzajemnaści. «Zakanadaŭčy orhan Karei nie vykonvaje svaju ŭhodu sa Złučanymi Štatami. Čamu jany jaje dahetul nie ŭchvalili?» — napisaŭ prezident ZŠA ŭ svajoj sacsietcy Truth Social.
Reakcyja rynkaŭ była imhniennaj: akcyi aŭtamabilnaha hihanta Hyundai abvalilisia bolš čym na 2,2%, a asnoŭny indeks karejskaj biržy KOSPI straciŭ kala 1%. Urad Paŭdniovaj Karei ŭžo sklikaŭ ekstrannuju naradu. Ministr handlu krainy terminova vylataje ŭ Vašynhton, kab pasprabavać urehulavać kanflikt i paćvierdzić hatoŭnaść Sieuła da vykanańnia damoŭlenaściaŭ.
Adnak situacyja zastajecca niapeŭnaj, bo ŭ samim Sieule namahajuć, što pahadnieńnie było miemarandumam i nie patrabavała asobnaha zaćviardžeńnia parłamientam.
Zajava Trampa źjaviłasia paśla šerahu niadaŭnich pahroz uviadzieńnia taryfaŭ, u tym liku 100% taryfaŭ na kanadskija tavary i dadatkovaha 10% zboru dla krain, jakija vystupajuć suprać jaho ambicyj adnosna Hrenłandyi.
Kamientary