Małodšaja dačka Kastusiova zastałasia biez pracy

Z dačkoj eks-kandydata ŭ prezidenty Biełarusi Ryhora Kastusiova Kaciarynaj nie padoŭžany pracoŭny kantrakt. Jana nastaŭnica muzyki. Padčas prezidenckaj kampanii Kaciaryna Kastusiova była aktyvistkaj u kamandzie svajho baćki. Źbirała podpisy ŭ jaho padtrymku. Ryhor Kastusioŭ zajaŭlaje, što dačku zvolnili z-za jaho palityčnaj dziejnaści.

Kaciaryna Kastusiova skončyła siaredniuju škołu z załatym miedalom, a muzyčnaje vučylišča i akademiju muzyki — z vysokimi bałami. Pracavać pa śpiecyjalnaści «Charavoje dyryžyravańnie» pačała na trecim kursie akademii. Jana siabra Partyi BNF. U dziciačaj škole mastactvaŭ № 6 Mahilova adpracavała dva hady.

«Mnie ciažka skazać, ci jość u majoj spravie palityčnyja matyvy. Adkryta mnie pra heta nichto nie kaža. Nijakich parušeńniaŭ i vymoŭ u mianie nie było, adnak u mianie ŭvieś čas było adčuvańnie, što rabiłasia ŭsio, kab dakazać maju prafiesijnuju nieprydatnaść. Mianie nichto nie papiaredžvaŭ, što sa mnoj nie praciahnuć kantrakt. Mnie prosta dali padpisać papieru — pastavili pierad faktam», — kamientuje situacyju sa zvalnieńniem Kaciaryna Kastusiova.

Administracyja škoły mastactvaŭ admaŭlaje, što zvalnieńnie dački eks-kandydata na prezidenctva było matyvavana palityčna:

«Vyklučna tolki z prafiesijnaha boku. Vy što? Prychodzili prafiesijanały z kaledža muzyki. Naviedvali jaje kantrolnyja zaniatki. Ź joj nieadnojčy pravodzilisia hutarki i była składziena daviedka, što ŭ dadzienaj ustanovie treba rabić źmienu kiraŭnika, bo naš chor na duža nizkim uzroŭni», — zajaŭlaje pradstaŭnica administracyi škoły.

Ryhor Kastusioŭ śćviardžaje, što z-za jaho palityčnaj dziejnaści ŭłada karaje jaho dziaciej. Samoha palityka ŭ 2001 hodzie vymusili zvolnicca z pasady kiraŭnika Škłoŭskaj kamunalnaj upravy.

«Paśla parłamienckich vybaraŭ była zvolnienaja sa škoły maja starejšaja dačka. Try hady jana adpracavała i raptam stała niedaspadoby. Prablemy z vučobaj byli ŭ syna. Jon ciapier u Hdańsku. I tam prablem z vučobaj u jaho niama i nikoli nie było. Ciapier voś takaja prablema ŭźnikła paśla prezidenckich vybaraŭ u Kaciaryny. Adnaznačna tut matyvacyja z boku ŭłady tolki palityčnaja».

Ryhoru Kastusiovu zabaronieny vyjezd za miežy Biełarusi. Jon znachodzicca ŭ stanie abvinavačanaha z 20 śniežnia 2010 hoda pavodle kryminalnaha artykuła za arhanizacyju biesparadkaŭ i ŭdzieł u ich.

«Ja nie mahu navat vyjechać na miesca svajoj pracy. Firma, dzie ja pracuju, zarehistravanaja ŭ Sankt-Pieciarburhu. Ja siadžu biez mahčymaści pracavać. Ciapier vo siamju maju kałupajuć, kab davieści jaje da žabrackaha stanu. My znachodzim mahčymaści zarablać, niejak vyžyvajem, z praciahnutaj rukoj nie chodzim, ale pryjemnaha tut mała».

• 0
• 0
• 0
• 0
• 0
• 0
• 0
• 0