Udzielnikam akcyi «Stop-bienzin» dali štrafy

Alaksandr Redźkin aštrafavany na 15 bazavych vieličyniaŭ (525 tys. rubloŭ)

13:14

Abvieščany pierapynak da 14:00.

Nahadajem, u budynku, dzie ciapier raźmiaščajecca sud Centralnaha rajona Minska (vuł. Kirava, 21) raniej znachodziŭsia začynieny ŭładami Nacyjanalny humanitarny licej imia Ja. Kołasa, a Pavieł Hruździłovič — vypuśnik 2000 hoda.

Bolš za toje, jaho sudzili ŭ pakoi № 410, dzie raniej była aktavaja zała liceja i prachodzili vypusknyja i roznyja imprezy, u tym vypusknym i braŭ udzieł Pavieł, skazali karespandentu NN jaho baćki.

Taksama padtrymać Paŭła pryjšli jaho byłyja kalehi pa licei.

Alesia Makaś raspaviała, što načavała ŭ kamiery z čarnaskuraj nielehałkaj-francužankaj. Ich pakarmili piarłoŭkaj, napaili harbataj i dali dźvie łusty chleba.

Pavieł Hruździłovič (jon syn žurnalista Radyjo Svabody Aleha Hruździłoviča) paskardziŭsia, što było kiepska spać na draŭlanych narach. A Źmicier Kavałhin naadvarot skazaŭ, što kampanija ŭ jaho kamiery była cudoŭnaja.

13:05

Pavieł Hruździłovič aštrafavany na 700 tys. rubloŭ (20 bazavych).

12:51

Zatrymanaja padčas akcyi Alesia Makaś aštrafavanaja na 15 bazavych (525 tysiač rubloŭ).

Usim zatrymanym šyjuć standartny nabor: zatrymanyja padčas niesankcyjanavaha pikietu na moście praź Śvisłač z płakatami ź simvolikaj akcyi, na jakich byli ŭkazanyja kantakntyja telefony.

Nichto z zatrymanych viny nie pryznaje.

Taksama i Źmicier Kavałhin i Pavieł Hruździłovič źviarnuli padčas suda uvahu na toje, što kali ŭ ich apisvali paśla zatrymańnia rečy, u pratakołach nie było ŭkazana najaŭnaść ulotak. Ciapier jany ŭ pratakole źjavilisia. I Pavieł, i Źmicier vykazali zdahadku, što ŭlotki paźniej im u pratakoł upisali.

U sudzie mnoha žurnalistaŭ: u tym liku apieratary Biełsata i Pieršaha rasijskaha kanała.

12:34

Taksama siońnia ŭ sudzie Centralnaha rajona buduć razhladacca spravy inšych zatrymanych na akcyi «Stop bienzin!». Heta Makaś Alesia I. i Prybylski I.V. (ich spravu budzie razhladać sudździa Chadanovič A.A.), a taksama Pavał Hruździłovič i Alaksandr Redźkin (ich maje sudzić sudździa Jeśman V.A.). Usim im inkryminujuć «udzieł u niesankcyjanavanym pikietavańni», pavodle častki 1 artykuła 23.34 KoAP RB.

Cikava, što sp. Redźkin — navat nie aŭtamabilist. Jon byŭ siarod tych hledačoŭ, što vitali akcyju. Jak raskazała ŭ sudzie jaho žonka, 7 červienia ŭviečary jany z mužam prosta išli z pracy. Vyjšli z parku Horkaha, niedaloka ad mostu praź Śvisłač, pabačyli zabłakavany mašynami praśpiekt i padyšli pahladzieć. Zabrali Alaksandra, jak kazali śviedki ŭ sudzie, pa asabistym ukazańni namieśnika načalnika minskaj milicyi pałkoŭnika Jaŭsiejeva. Jon asabista pakazvaŭ palcam na tych, kaho aryštoŭvać. Paśla taho, jak Alaksandra zabrali, žonka niekalki hadzin nie mahła daznacca, dzie znachodzicca jaje muž.

12:30

Abvieščany pieršy prysud. Źmicier Kavałhin atrymaŭ 20 bazavych vieličyń štrafu (700 tysiač rubloŭ) pavodle č.1 art 2334 APK RB za «ŭdzieł u niesankcyjanavanym pikietavańni». Sudziŭ jaho sudździa Jasianovič Ł. F. Cikava, što śviedka-milicyjant, jaki nibyta zatrymlivaŭ abvinavačanaha, nie paznaŭ jaho ŭ zale suda.

11:59

Abvieščany pierapynak, sudziać zaraz Źmitra Kavałhina, jaki la parka Janki Kupały zastupiŭsia za zatrymanuju z płakatam «Stop-Bienzin» dziaŭčynu. Sudździa pajšła šukać śviedku-milicyjanta, jaki zatrymlivaŭ Kavałhina.

11:05

Jašče adzin zatrymany — Alaksandr Redźkin. Jahonaja žonka Jaŭhienija raspaviała ŭ sudzie, što jany bačyli jak śpiecnaz milicyi zatrymlivaŭ dziaŭčynu.

10:40

U sud pryvieźli piacioch zatrymanych udzielnikaŭ učorašniaj akcyi «Stop-bienzin». Siarod zatrymanych adna dziaŭčyna.

A 10-j ranicy sud Centralnaha rajona Minska (Kirava, 21) pačynaje razhladać spravy ŭdzielnikaŭ akcyi pratestu aŭtamabilistaŭ. 7 červienia ŭ Minsku adbyłasia čarhovaja akcyja «Stop-bienzin». Aŭtamabilisty pratestavali suprać rezkaha pavyšeńnia koštaŭ paliva.

• 0
• 0
• 0
• 0
• 0
• 0
• 0
• 0