Hienprakuratura pałochaje adkaznaściu za ŭdzieł u akcyjach pratestu

Hienieralnaja prakuratura Biełarusi papiaredžvaje hramadzian krainy pra niedapuščalnaść parušeńnia zakanadaŭstva ab masavych mierapryjemstvach. Pra heta havorycca ŭ paviedamleńni, apublikavanym 14 červienia na aficyjnym sajcie Hienprakuratury.

U paviedamleńni zaznačajecca, što «na roznych sajtach u sietcy internet raspaŭsiudžana infarmacyja, jakaja ŭtrymlivaje zakliki da ŭdziełu ŭ niesankcyjanavanych masavych mierapryjemstvach».

«Hienieralnaja prakuratura nieadnarazova źviartała ŭvahu hramadzian na nieabchodnaść niaŭchilnaha vykanańnia norm nacyjanalnaha zakanadaŭstva ab masavych mierapryjemstvach, charakternych dla luboj pravavoj dziaržavy», — havorycca ŭ paviedamleńni.

Hienprakuratura zaklikała hramadzian «nie paddavacca na pravakacyjnyja zakliki i ŭstrymacca ad udziełu ŭ niezakonnych akcyjach».

«Asoby, vinavatyja ŭ arhanizacyi abo ŭdziele ŭ niezakonnych masavych mierapryjemstvach, mohuć być pryciahnutyja da ŭstanoŭlenaj zakonam adkaznaści»,

Taksama paviedamlajecca, što Hienprakuraturaj abvieščana aficyjnaje papiaredžańnie ab niedapuščalnaści parušeńnia zakanadaŭstva «aktyvistam adnaho z hramadskich abjadnańniaŭ». Pra jakoje abjadnańnie idzie razmova, u Hienprakuratury BiełaPAN nie ŭdakładnili.

Jak paviedamlałasia raniej, 14 červienia, naviedvajučy sielhaspradpryjemstva «Aziarycki-Ahra» Smalavickaha rajona Minskaj vobłaści, Alaksandr Łukašenka paabiacaŭ nie dapuścić u Biełarusi zabastovak i niesankcyjanavanych akcyj.

«U nas śviadomyja ŭ Minsku ŭ sacyjalnych sietkach, internecie zaklikajuć da zabastovak. Ja tak budu hladzieć, nazirać, a potym jak šarachnu — nie paśpiejuć za miažu pierabiehčy», — zajaviŭ Łukašenka.

«Ładziać tam zabastoŭki, što my im nie dazvalajem za biascenak vyvozić za miažu paliva, cyharety, inšyja tavary. Raniej takich śpiekulantami nazyvali — jany ž i jość śpiekulanty. Ja što, na heta hladzieć budu?» — aburyŭsia aficyjny lidar.

Za apošni tydzień u roznych haradach Biełarusi prajšli masavyja chvalavańni ŭ suviazi z rostam cen i ekanamičnymi rašeńniami ŭrada.

Tak, 7 červienia ŭ Minsku prajšła masavaja akcyja aŭtamabilistaŭ, jakija pratestavali suprać čarhovaha pavyšeńnia cen na paliva. Sotni aŭtamabilistaŭ na dźvie hadziny paralizavali ruch na praśpiekcie Niezaležnaści. Čatyry čałavieki byli zatrymanyja i pakaranyja štrafami.

Viečaram 12 červienia incydent adbyŭsia na pahranpierachodzie «Bruzhi» (Hrodzienskaja vobłaść). Kala 200 čałaviek pierakryli darohu, aburajučysia tym, što mytniki nie vypuskali na terytoryju Polščy vadzicielaŭ, jakija vyjazdžali tudy druhi dzień zapar. Mytniki matyvavali svaje dziejańni rašeńniem urada ab abmiežavańni i zabaronie vyvazu za miažu aŭtamabilnaha paliva i šerahu spažyvieckich tavaraŭ. Incydent u «Bruzhach» doŭžyŭsia try hadziny, razahnaŭ stychijnuju akcyju śpiecnaz. 22 čałavieki byli zatrymanyja i aštrafavanyja.

Viečaram 13 červienia anałahičnaja akcyja pratestu prajšła na pahranpierachodzie «Varšaŭski most» (pad Brestam).

Tym časam u internecie praciahvajuć źjaŭlacca zakliki da hramadzian udzielničać u roznych mirnych akcyjach pratestu. Bližejšaja ź ich namiečana na 15 červienia.

• 0
• 0
• 0
• 0
• 0
• 0
• 0
• 0