Uha Čavies zajaviŭ, što vylečyŭsia ad raku

Prezident Vieniesueły Uha Čavies, jaki prachodziŭ na Kubie lačeńnie ad raku, zajaviŭ u razmovie z žurnalistami, što adčuvaje siabie vydatna, i paśla čarhovaha kursu lačeńnia ŭ jaho nie zastałosia mietastazaŭ.

«U mianie niama mietastazaŭ, nidzie ŭ maim ciele nie vyjaŭlena nivodnaj. U mianie vydatnaje samaadčuvańnie», — paviedamiŭ jon.

Čavies u niadzielu viarnuŭsia na radzimu z Kuby, dzie jon prajšoŭ druhi kurs chimijaterapii. U telefonnaj razmovie z žurnalistami jon skazaŭ, što poŭny sił i rašučaści praciahnuć pracu.

Kiraŭnik dziaržavy zajaviŭ, u pryvatnaści, što paśla druhoha kursu chimijaterapii jon adčuŭ mienš pabočnych efiektaŭ, čym minułym razam. Ciapier abyšłosia biez razdražnieńnia skury i młosnaści. Daktary ŭ chutkim časie vyznačacca, ci patrebien budzie jamu treci kurs chimijaterapii, a taksama apramianieńnie. Pakul ža možna skazać, što rakavych kletak u arhaniźmie bolš nie znojdziena, i zdaravieje pacyjent uražalnymi tempami.

Apieracyja pa vydaleńni złajakasnaj puchliny była praviedzienaja Čaviesu 20 červienia ŭ Havanie. Niahledziačy na heta, prezident Vieniesueły ŭžo zajaviŭ pra namier vystavić svaju kandydaturu na prezidenckich vybarach 2012 hoda.

Čavies taksama papiaredziŭ suhramadzian, što da svajho zvykłaha ŭsioj krainie ładu žyćcia jon vierniecca daloka nie adrazu: pakul što jaho arhanizm słaba abaronieny ad infiekcyj. Tamu Čavies prysłuchajecca da parady svajho starejšaha tavaryša, 85-hadovaha lidara kubinskaj revalucyi Fidela Kastra, i nie budzie zaŭčasna abviaščać pra poŭnuju pieramohu nad chvarobaj.

Pra paradu Kastra jon skazaŭ nastupnaje: «Fidel va ŭsim hetym raźbirajecca, jak hałoŭny lekar. Kali my raźvitvalisia, jon skazaŭ: «Čavies, ty źjazdžaješ — dyk nie zabudź: nie dazvalaj emocyjam uziać kantrol nad saboj… ty možaš pačać pierakonvać siabie, što z chvarobaj całkam skončana, i ludzi taksama pavierać u heta. Ale nie, chvaroba jašče nie pieramožanaja».

Dziaržaŭnaje telebačańnie Vieniesueły pieradało repartaž pra viartańnie Čaviesa ŭ krainu: pakazaŭšysia na trapie samalota ŭ aeraporcie Karakasa, jon spačatku abapiraŭsia na ruku svajoj dački, ale potym prademanstravaŭ telehledačam, što moža stajać na nahach i biez starońniaj dapamohi. U jaho chapiła sił i vystupić z krytykaj u adras apazicyi, abvinavaciŭšy jaje ŭ sprobach spravakavać vonkavuju ahresiju suprać Vieniesueły raspaŭsiudžvańniem iłžyvych čutak, jakija kažuć, byccam jon źbirajecca ŭtrymać uładu hvałtoŭnym šlacham.

• 0
• 0
• 0
• 0
• 0
• 0
• 0
• 0