Apazicyi znoŭ adklučyli śviatło

11 vieraśnia ŭ minskim DK Traktarnaha zavoda prajšła kanfierencyja «Niezaležnaść: zdabytki i pierśpiektyvy», pryśviečanaja 20-hodździu nadańnia Dekłaracyi ab dziaržaŭnym suvierenitecie Respubliki Biełaruś statusa kanstytucyjnaha zakona. Mierapryjemstva ładziłasia ŭ miežach kampanii «Narodnaja prahrama», inicyjavanaj Rucham «Za Svabodu», pry ŭdziele arhkamiteta pa śviatkavańni 20-hodździa niezaležnaści Biełarusi.

U kanfierencyi ŭziali ŭdzieł 260 hramadskich aktyvistaŭ, palitykaŭ i ekśpiertaŭ. Jana składałasia ź dźviuch siekcyj. U pieršaj hramadskija i palityčnyja dziejačy razvažali pra toje, ci jość niezaležnaść Biełarusi histaryčnaj vypadkovaściu, što dała jana našaj krainie, što pahražaje biełaruskaj niezaležnaści i jakaja budučynia jaje čakaje.

Siarod vystupoŭcaŭ byli kolišni śpikier Viarchoŭnaha savieta Miečysłaŭ Hryb, kiraŭnica Biełaruskaj asacyjacyi žurnalistaŭ Žanna Litvina, mietadołah i palitołah Uładzimir Mackievič, staršynia Ruchu «Za Svabodu» Alaksandr Milinkievič, lidar Partyi BNF Alaksiej Janukievič.

Druhaja siekcyja ŭjaŭlała saboj dyskusiju ŭ miežach kampanii «Narodnaja prahrama», jakaja składajecca praz ekśpiertnyja i hramadskija dyskusii dziela ŭmacavańnia niezaležnaści Biełarusi jak pazityŭnaja kancepcyi jaje raźvićcia.

Dyskusii na kanfierencyi byli arhanizavanyja pa vaśmi temach u roznych śfierach. Heta «Nacyjanalnaja valuta i hrašovaja sistema Biełarusi: taler, jeŭra ci rasijski rubiel?»; «Astravieckaja AES: enierhietyčnaja biaśpieka ci ekałahičnaja katastrofa?»; «Biełaruskaja ziamla: va ŭłasnaści sialan, dziaržavy ci zamiežnikaŭ?»; «Jakija pieravahi maje praparcyjnaja vybarčaja sistema dla Biełarusi?»; «Ci patrebnaja ŭ Biełarusi reforma sistemy MUS»; «Nakolki sučasnaja i efiektyŭnaja miedycyna ŭ Biełarusi»; «Uparadkavańnie piensijnaj sistemy i pytańnie pavieličeńnia piensijnaha ŭzrostu»; «Ci moža Biełaruś być u dvuch intehracyjnych pracesach adnačasova?(Uschod-Zachad)».

Na žal, kanfierencyja była pierarvanaja padčas abmierkańnia piensijnaj reformy — była adklučanaja elektryčnaść u zale, dzie jana pravodziłasia. Reč u tym, što kanfierencyja była zapłanavanaja da 17-j hadziny, adpaviedna ad hetaha času była zaklučanaja arendnaja damova. Administracyja DK MTZ papiarednie pahadziłasia praciahnuć jaje jašče na hadzinu. Adnak elektryčnaść u zale ŭsio ž adrubili.

• 0
• 0
• 0
• 0
• 0
• 0
• 0
• 0