Biełarusu vydali vielmi nietypovuju polskuju vizu. Jana na praciahły termin, ale časta ź joj nie pajeździš
Dniami adna ź minskich kampanij, jakaja dapamahaje z afarmleńniem šenhienskich vizaŭ, apublikavała na svajoj staroncy ŭ Threads polskuju pracoŭnuju vizu, jakuju vydali hramadzianinu Biełarusi. Jana akazałasia nietypovaj i redkaj, piša «Lusterka».
«Heta dvuchrazovaja nacyjanalnaja viza terminam na 365 dzion», — adznačaje vizavaja ekśpiertka Anastasija Łysakoŭskaja.
Pavodle jaje słoŭ, za siem hadoŭ praktyki padobnaje rašeńnie jana sustrakaje ŭpieršyniu.
Na hety momant post z fota niezvyčajnaj vizy vydaleny, ale zdymak užo razyšoŭsia pa sacsietkach.
Łysakoŭskaja kaža, što takuju vizu sapraŭdy vydali i jaje aktyŭna abmiarkoŭvajuć siarod ekśpiertaŭ. Što ŭ joj nietypovaha?
«Zvyčajna nacyjanalnuju (čytaj, pracoŭnuju) vizu Polščy dajuć na 365 dzion sa šmatrazovym ujezdam. Terminy znachodžańnia mahli skaracić z-za zakančeńnia dziejańnia pašparta, naprykład.
U svajoj praktycy sustrakała vypadki, kali vizu davali na 180 dzion ci 320, ale jana ŭsio adno była šmatrazovaj, heta značyć biez abmiežavańnia kolkaści ŭjezdaŭ, — tłumačyć Anastasija. — Tut ža my bačym, što ŭładalnik maje prava za hod ujechać u Šenhienskuju zonu tolki dvojčy, dalej viza budzie pahašanaja».
Łysakoŭskaja kaža, što kali takija vizy pačnuć vydavać čaściej, to pieršyja, u kaho mohuć uźniknuć składanaści, — heta kiroŭcy. Bo ichniaja praca źviazanaja z pastajannym pierasiačeńniem miežaŭ.
U paraŭnańni sa šmatrazovym dazvołam na ŭjezd, dvuchrazovy maje svaje minusy, adznačaje ekśpiertka.
«Naprykład, pa im užo nie pajeździš vyrašyć pytańni ŭ Biełaruś abo ŭ kamandziroŭki na Kipr. Pryjechaŭšy ŭ Polšču, ŭładalniku takoj vizy treba pracaŭładkavacca, zapuścić praces lehalizacyi i čakać «kartu pabytu». Tolki atrymaŭšy jaje, čałaviek zmoža być bolš svabodnym u svaich ruchach», — raskazaaje surazmoŭca.
Čamu takija vizy stali vydavać?
«Ja i kalehi, ź jakimi maju znosiny, pakul upieršyniu bačyli vizu padobnaha ŭzoru. Ci stanuć jany masavymi, nie viedajem, — razvažaje ekśpiertka. — Čamu ich mohuć pačać vydavać? Mahčyma, heta źviazana z palitykaj uzmacnieńnia strohaści vydačy mihracyjnych vizaŭ.
Jak mnie zdajecca, dla ŭrada Polščy tut jość svaje plusy. Z dapamohaj takich rašeńniaŭ jany skaračajuć mahčymaści niametavaha vykarystańnia padobnych viz. Ludzi bolš nie zmohuć katacca ź imi «na zakupy» abo ŭ roli turystaŭ. Akramia taho, taki dakumient matyvuje ich uładalnikaŭ lehalizavacca adrazu paśla pryjezdu ŭ Polšču».
Ekśpiertka padzialiłasia łajfchakam, jak atrymać šenhien chutčej i na bolš praciahły termin
Ci jość šaniec atrymać vizu ŭ Jeŭropu da siezonu adpačynkaŭ i kolki heta budzie kaštavać
«€1000 za pasłuhi ahientaŭ — heta ŭžo norma». Što zaraz adbyvajecca z šenhienam i na što iduć biełarusy dziela vizy
Elektronnaja viza ŭ Biełaruś: dla žycharoŭ jakich krain, kolki dziejničaje i dla čaho patrebna?
Što čakaje biełarusaŭ pry atrymańni šenhienskich vizaŭ u sioletnim turystyčnym siezonie
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary