Maryja Tarasievič: «Jak ža mianie mama adpuściła?!»

Dla prajektu «Budźma! Tuzin. Pierazahruzka-2» śpiavačka i fotamadel Maryja Tarasievič zapisała biełaruskamoŭnuju viersiju adnoj sa svaich rańnich pieśniaŭ «Soniejka».

Maryja Tarasievič z radaściu pahadziłasia na ŭdzieł u prajekcie «Budźma! Tuzin. Pierazahruzka-2»: «Jak ža nie padtrymać ziemlakoŭ? Vielmi cikavaja prapanova, dy i biełaruskaja mova dla mianie blizkaja. Ideja prajektu vydatnaja, i naohuł dobra, što ź Biełaruśsiu źviazana stolki zorak suśvietnaha maštabu!»

Maryja naradziłasia ŭ Minsku, tut skončyła škołu z muzyčnym uchiłam pa kłasie skrypki i fartepijana. A ŭ 16 hadoŭ vyrašyła pajechać u Maskvu. Tam jana pastupiła ŭ vyšejšuju muzyčnuju škołu imia Hniesinych na estradnaje adździaleńnie pa kłasie vakału. «Ja pakidała Biełaruś z pačućciom viery ŭ siabie, ale, naturalna, i sa škadavańniem. Bo ŭ maim rodnym horadzie zastalisia baćki i siabry. Ciapier, zhadvajučy toj čas, nijak nie mahu ŭjavić, jak ža mianie mama adpuściła! Vidać, adčuvała, što kiepskaha nie narablu».

Muzyčnaja karjera Maryi pačałasia z džaz-arkiestra Anatola Kroła «MKS Bih Bend». Jana pryznajecca, što i nie dumała, što budzie pracavać u džazie, ale ŭdziačnaja losu, što tak skłałasia: «Liču, što džaz — samaja seksualnaja muzyka ŭ śviecie. I Merylin Manro, i Madonna dobra pačuvalisia ŭ joj, a dla mianie jana stała vydatnaj škołaj i paspryjała tamu, što ja pačała pisać svaje pieśni i miełodyi». Za čas hastrolaŭ śpiavačka paznajomiłasia z zorkami suśvietnaj sceny. Asabliva jaje ŭraziła znajomstva z Natali Koŭł.

Nie dumała Maryja i madelkaj pracavać, ale iznoŭ tak skłalisia abstaviny. Jana kaža, što zaŭždy lubiła avantury, tamu niejak padała zajavu na konkurs rasijskaj viersii časopisa Playboy i pa vyniku była pryznanaja pieršaj rasijskaj Playmate. Paśla Maryja zdymałasia dla amierykanskaha Playboy Planet, była pryznanaja dziaŭčynaj miesiaca ŭ niderłandskim Playboy, a taksama trapiła na vokładku New York Times Magazine. Jak madel biełaruskaja dziaŭčyna rekłamavała kalekcyi Jean Paul Gaulteir, Givanchy, Paco Rabanne, Chanel, Armani, a taksama stała tvaram linii žanočaha adzieńnia Bussato, nazyvałasia ŭ liku samych pryhožych ludziej Maskvy. Paśla takoj ašałamlalnaj karjery ŭ madelnym biznesie jana zrabiła sabie imia i na telebačańni: była viadučaj tok-šou na REN-TV, viała prahramu na telekanale «Domašnij».

Pry hetym Maryja nie kidała muzyku i pieryjadyčna davała kancerty, jak z arkiestram Kroła, tak i z zaprošanymi muzykami. U 1997 hodzie na studyi Lva Leščanki jana zapisała svoj pieršy solny dysk «Čiornyj šiołk», pryjazna sustrety krytykami, u tym liku i Arciemijem Troickim. Jakraz pieśniu «Sołnyško» z hetaha alboma Maryja i vyrašyła pieraśpiavać pa-biełarusku. «Miarkuju, što heta ŭdały vybar, bo jana idealna pasuje dla vykanańnia pa-biełarusku. Hetuju pieśniu ja napisała sama, aranžyroŭku prydumali razam z Alaksandram Šancinym. Siadzieła ŭ studyi, i litaralna ŭsio — i muzyka, i słovy — naradziłasia vielmi lohka», — kaža Maryja. Jana vykanała hetuju pieśniu na svaim dypłomnym ekzamienie ŭ Hniesincy. Tvor hety adznačyła ŭsia kamisija na čale z Uładzimiram Karabko.

Pa-biełarusku «Soniejka» pieraasensavaŭ Uładzimir Lankievič, viadomy pierakładami paezii Hijoma Apalinera. «Mnie padałasia simpatyčnaj miełodyja, i kali ja pierakładaŭ, to prosta padbiraŭ biełaruskija słovy, jakija b adekvatna pieradavali emacyjny stan liryčnaj hieraini. Heta było nie tak i składana, bo matyŭ čakańnia sonca, jakoje zahlanie ŭ našaje akonca z-za ciomnych chmaraŭ, nadzvyčaj raspracavany», — kaža pierakładčyk.

Ciapier Maryja zajmajecca ŭłasnym džazavym prajektam, ładzić kancerty znakamistaściaŭ i vystupaje sama.

Maryja Tarasievič — Soniejka (muz. i sł. vykanaŭcy, bieł. tekst — U. Lankievič)

Soniejka dalokaje, soniejka žadanaje,
Dobraje i śvietłaje, serca hreje mnie.
Dy kraina dalniaja, mhlistaja, tumannaja,
U zimovym čornym dni sivier złosny dźmie.

Mnie b ciapła viasnovaha, zachłynucca słodyčču,
Rastapić dałoniami hety bieły lod.
Sonca mnie b zichotkaha z radaściu i horyčču.
Pracinaje dumkaju serca navylot.

Na sumnieŭ zabudusia, skinu ŭsio raniejšaje,
I trava duchmianaja achinie ciapier.
Słovami piaščotnymi, słovami suciešnymi
I dušoj haračaju kliču ja ciabie.

Pieśniu možna spampavać tut.

• 0
• 0
• 0
• 0
• 0
• 0
• 0
• 0