U histaryčnym centry Minska źjavicca novy hatel

Novy hatel źjavicca ŭ Minsku na vulicy Internacyjanalnaj nasuprać kinateatra «Pieramoha». Hatel «Harńje» adkryjecca ŭ budynku, jaki źjaŭlajecca pomnikam architektury XIX stahodździa.

Darečy, źjaŭleńnie hatela ŭ hetym budynku ani nie ździŭlaje, kali ŭspomnić jaho historyju. Mienavita tut, u domie pa vulicy Praabraženskaj, 8 (ciapierašniaja Internacyjanalnaja, 11), u XIX stahodździ znachodziŭsia hatel Sucina. U im było 33 numary.

Pomnik architektury, jaki budzie pieraŭtvorany ŭ hatel, rekanstrujavany. Vyhlad budynka całkam zachavany, a ŭsiaredzinie stvarajucca interjery ŭ styli XIX stahodździa.

— Uładalniki hatela padyšli ź vialikaj adkaznaściu da pracedury siertyfikacyi, pačaŭšy supracoŭnictva z našaj arhanizacyjaj jašče na stadyi prajekta, — adznačaje načalnik siektara siertyfikacyi pasłuh Biełaruskaha dziaržaŭnaha instytuta standartyzacyi i siertyfikacyi Taćciana Śmirnova.

Instytut pravodzić acenku adpaviednaści prajektaŭ hatelaŭ patrabavańniam standartaŭ da adpaviednaj katehoryi jak na stadyi prajektavańnia, tak i na stadyi budaŭnictva, i ŭ dadzienym vypadku śpiecyjalisty instytuta mieli mahčymaść nazirać za «naradžeńniem» novaha hatela litaralna z nula. Pakolki hatel u histaryčnym centry «naradžajecca» pa ŭsich praviłach, to ŭ «Harńje» jość šancy atrymać siertyfikat adpaviednaści i katehoryju «try zorki» nieŭzabavie paśla aficyjnaha adkryćcia.

Adzinaja prablema, jakaja moža paŭstać, — zabiaśpiečańnie parkavalnych miescaŭ dla aŭtamabilaŭ naviednikaŭ.

— Dumaju, jany z daduć hetamu rady, — kaža Taćciana Śmirnova. — Bo pavodle standartu, hatelu nieabchodna zabiaśpiečyć miesca parkoŭki dla transpartu 20% pastajalcaŭ. A pakolki ŭ hateli budzie 50 numaroŭ, dastatkova zabiaśpiečyć usiaho 10 parkavalnych miescaŭ. Zrešty, prablemy z parkoŭkami — nie adzina biełaruskaja prablema, adznačaje ekśpiert. Z tymi ž składanaściami sutykajucca i šmatlikija jeŭrapiejskija hateli, raźmieščanyja ŭ histaryčnych centrach.

Nahadajem, što niadaŭna haradskija ŭłady abviaścili pra pieratvareńnie vulicy Kamsamolskaj ŭ piešachodnuju. A novy hatel raźmieščany na rahu Internacyjanalnaj i Kamsamolskaj. Tak što, vyjšaŭšy na vulicu, pastajalcy zmohuć pavolna prahulacca pa ŭtulnaj turysckaj vułačcy.

Ułaśnik novaha hatela — AAT «Minatel». Hetamu pradpryjemstvu naležać i inšyja staličnyja hateli — «Spadarožnik» i «Biełaruś».

• 0
• 0
• 0
• 0
• 0
• 0
• 0
• 0