Rada AAN pa pravach čałavieka praciahnie abmierkavańnie situacyi ŭ Biełarusi

Nahadajem, 20 vieraśnia ŭ miežach 18-j siesii Savieta pa pravach čałavieka ŭ Ženievie byŭ zasłuchany dakład Viarchoŭnaha kamisara AAN pa pravach čałavieka ab situacyi ŭ Biełarusi. Sutnaść dakłada zvodziłasia da taho, što situacyja z pravami čałavieka paśla prezidenckich vybaraŭ 2010 hoda pahoršyłasia.

U dakumiencie ŭtrymlivajecca šerah rekamiendacyj urada Biełarusi. Hałoŭnaja rekamiendacyja — nieadkładna i biez usiakich umoŭ vyzvalić palityčnych apanientaŭ, demakratyčnych aktyvistaŭ i žurnalistaŭ, jakija nie ŭdzielničali ni ŭ jakich hvałtoŭnych akcyjach. Viarchoŭny kamisar AAN pa pravach čałavieka rekamienduje ŭładam pravieści ŭsiebakovaje i abjektyŭnaje rasśledavańnie akaličnaściaŭ, pry jakich hetyja ludzi byli zatrymanyja, i rasśledavać usie vypadki katavańniaŭ, ab jakich zajaŭlali źniavolenyja.

U dakładzie majecca zaklik da aficyjnaha Minska nieadkładna spynić palityčny i administracyjny ŭcisk na pravaabaroncaŭ, žurnalistaŭ i palityčnych apanientaŭ i ich praśledavańnie. U suviazi z hetym rekamiendujecca pryvieści zakanadaŭstva Biełarusi, u tym liku Kryminalny kodeks, u adpaviednaść ź mižnarodnymi abaviazacielstvami krainy ŭ pravaabarončaj śfiery.

Biełaruś taksama zaklikajuć da paŭnacennaha supracoŭnictva z usimi pravaabarončymi strukturami AAN i z takimi rehijanalnymi arhanizacyjami, jak ABSIE i Saviet Jeŭropy.

Jak vynikaje z paviedamleńnia pres-słužby Savieta pa pravach čałavieka, z krytykaj dakłada vystupiŭ pastajanny pradstaŭnik Biełarusi pry adździaleńni AAN u Ženievie Michaił Chvastoŭ. Jon zaklikaŭ prysutnych padumać «ab niebiaśpiecy palityzacyi». Pavodle mierkavańnia Chvastova, analiz situacyi ŭ Biełarusi ŭ pradstaŭlenym dakładzie nie byŭ abjektyŭnym.

Biełaruś, padkreśliŭ Chvastoŭ, nie zhodnaja z vysnovami Jeŭrasajuza i Ofisa Viarchoŭnaha kamisara AAN pa pravach čałavieka, źmieščanymi ŭ červieńskaj rezalucyi, jakija pakazvajuć Biełaruś jak krainu, dzie jość značnyja parušeńni pravoŭ čałavieka. Jak śćviardžaje Chvastoŭ, «rezalucyja pa Biełarusi nie maje ničoha ahulnaha z realnaj situacyjaj u krainie i była stvorana dla źviaržeńnia biełaruskaha ŭrada».

Nahadajem, 17 červienia na 17-j siesii Savieta AAN pa pravach čałavieka była pryniata rezalucyja, jakaja asudziła dziejańni ŭład Biełarusi «pa destabilizacyi situacyi z pravami čałavieka» na praciahu apošnich šaści miesiacaŭ. Prajekt rezalucyi ad delehacyi Jeŭrasajuza padtrymali Kanada, Narviehija, ZŠA, Šviejcaryja, Paŭdniovaja Kareja, Japonija i bolšaść łacinaamierykanskich krain — členaŭ savieta, a taksama delehacyi Habona, Zambii, Iardanii, Maŭrykii, Maldzivaŭ i Uruhvaja. Suprać pryniaćcia rezalucyi ŭ dačynieńni da Biełarusi prahałasavali Kitaj, Kuba, Rasija, Nihieryja iI Ekvador.

Tady ž, na červieńskaj siesii, Saviet daručyŭ viarchoŭnamu kamisaru AAN pa pravach čałavieka vyvučyć i pradstavić dakład ab situacyi z parušeńniem pravoŭ čałavieka ŭ Biełarusi na nastupnych siesijach.

• 0
• 0
• 0
• 0
• 0
• 0
• 0
• 0