Рада ААН па правах чалавека працягне абмеркаванне сітуацыі ў Беларусі

Нагадаем, 20 верасня ў межах 18-й сесіі Савета па правах чалавека ў Жэневе быў заслуханы даклад Вярхоўнага камісара ААН па правах чалавека аб сітуацыі ў Беларусі. Сутнасць даклада зводзілася да таго, што сітуацыя з правамі чалавека пасля прэзідэнцкіх выбараў 2010 года пагоршылася.

У дакуменце ўтрымліваецца шэраг рэкамендацый урада Беларусі. Галоўная рэкамендацыя — неадкладна і без усякіх умоў вызваліць палітычных апанентаў, дэмакратычных актывістаў і журналістаў, якія не ўдзельнічалі ні ў якіх гвалтоўных акцыях. Вярхоўны камісар ААН па правах чалавека рэкамендуе ўладам правесці ўсебаковае і аб’ектыўнае расследаванне акалічнасцяў, пры якіх гэтыя людзі былі затрыманыя, і расследаваць усе выпадкі катаванняў, аб якіх заяўлялі зняволеныя.

У дакладзе маецца заклік да афіцыйнага Мінска неадкладна спыніць палітычны і адміністрацыйны ўціск на праваабаронцаў, журналістаў і палітычных апанентаў і іх праследаванне. У сувязі з гэтым рэкамендуецца прывесці заканадаўства Беларусі, у тым ліку Крымінальны кодэкс, у адпаведнасць з міжнароднымі абавязацельствамі краіны ў праваабарончай сферы.

Беларусь таксама заклікаюць да паўнацэннага супрацоўніцтва з усімі праваабарончымі структурамі ААН і з такімі рэгіянальнымі арганізацыямі, як АБСЕ і Савет Еўропы.

Як вынікае з паведамлення прэс-службы Савета па правах чалавека, з крытыкай даклада выступіў пастаянны прадстаўнік Беларусі пры аддзяленні ААН у Жэневе Міхаіл Хвастоў. Ён заклікаў прысутных падумаць «аб небяспецы палітызацыі». Паводле меркавання Хвастова, аналіз сітуацыі ў Беларусі ў прадстаўленым дакладзе не быў аб’ектыўным.

Беларусь, падкрэсліў Хвастоў, не згодная з высновамі Еўрасаюза і Офіса Вярхоўнага камісара ААН па правах чалавека, змешчанымі ў чэрвеньскай рэзалюцыі, якія паказваюць Беларусь як краіну, дзе ёсць значныя парушэнні правоў чалавека. Як сцвярджае Хвастоў, «рэзалюцыя па Беларусі не мае нічога агульнага з рэальнай сітуацыяй у краіне і была створана для звяржэння беларускага ўрада».

Нагадаем, 17 чэрвеня на 17-й сесіі Савета ААН па правах чалавека была прынята рэзалюцыя, якая асудзіла дзеянні ўлад Беларусі «па дэстабілізацыі сітуацыі з правамі чалавека» на працягу апошніх шасці месяцаў. Праект рэзалюцыі ад дэлегацыі Еўрасаюза падтрымалі Канада, Нарвегія, ЗША, Швейцарыя, Паўднёвая Карэя, Японія і большасць лацінаамерыканскіх краін — членаў савета, а таксама дэлегацыі Габона, Замбіі, Іарданіі, Маўрыкіі, Мальдзіваў і Уругвая. Супраць прыняцця рэзалюцыі ў дачыненні да Беларусі прагаласавалі Кітай, Куба, Расія, Нігерыя іІ Эквадор.

Тады ж, на чэрвеньскай сесіі, Савет даручыў вярхоўнаму камісару ААН па правах чалавека вывучыць і прадставіць даклад аб сітуацыі з парушэннем правоў чалавека ў Беларусі на наступных сесіях.

• 0
• 0
• 0
• 0
• 0
• 0
• 0
• 0