Staršynia tavarystva achovy pomnikaŭ źviartaŭsia da jaho ź listom nakont zabudovy Rakaŭskaha pradmieścia.
Dva tydni tamu «Naša Niva» pisała pra płany TAA «Trajpł» Juryja Čyža zabudavać učastak Rakaŭskaha pradmieścia. U vyniku, kali prajekt zaćvierdziać, buduć zrujnavanyja budynki chlebazavoda №1, jakija achoŭvajucca dziaržavaj.
U suviazi z hetym staršynia Tavarystva achovy pomnikaŭ Anton Astapovič źviarnuŭsia z adkrytymi listami da ministra kultury Paŭła Łatuški, kiraŭnika Administracyi Łukašenki Uładzimira Makieja i ŭładalnika «Trajpła» Juryja Čyža.
U svaich zvarotach spadar Astapovič źviartaje ŭvahu, što pradpryjemstva Čyža ŭžo naniesła niepapraŭnuju škodu architekturnamu abliču Trajeckaha pradmieścia, raspačaŭšy tam budoŭlu hihanckaha žyllova-zabaŭlalnaha kompleksu. Adnak, nahadvaje jon, pakul čarhovy prajekt Čyža nie zaćvierdzili adpaviednyja struktury Minkultu, jość jašče mahčymaść nie dapuścić rujnavańnia budynkaŭ u Rakaŭskim pradmieści.
«Zaklikajem Vas być paśladoŭnym u svaich dziejańniach! I kali Vy nieadnarazova zajaŭlali ab achovie historyka-kulturnaj spadčynie, jak pryjarytecie ŭ dziejnaści Ministerstva kultury, to prykładzicie choć minimalnyja namahańni, kab realizavać svaje słovy i nie ŭvajści ŭ historyju ŭ roli pamahataha hierastrataŭ», — emacyjna źviartajecca Astapovič da ministra Łatuški.
Uładzimiru Makieju jon zaŭvažyŭ, što «realizacyja prajekta pa rujnavańni histaryčnaj zabudovy na terytoryi chlebzavoda № 1 i ŭźviadzieńni novych kamiercyjnych abjektaŭ daje vyhadu tolki TAA “Trajpł” i asabista Juryju Čyžu», u toj čas jak «biełaruskaja dziaržava ad dadzienaha prajekta tolki stračvaje». Staršynia tavarystva paprasiŭ Makieja ŭziać pad kantrol spravu i nahadaŭ, što «adkaznaść za źniščeńnie pomnikaŭ historyi i kultury budzie ŭskładziena i zaraz, i ŭ histaryčnaj pierśpiektyvie na dziejsnuju administracyju».
Juryja Čyža staršynia tavarystva zaklikaŭ «admovicca ad realizacyi prajektnaj prapanovy, jakaja raspracavana KUP “Minskhrada”, u suviazi ź jaje nieadpaviednaściu narmatyŭna-pravavoj bazie» i prapanavaŭ rapracavać na vałanciorskaj asnovie eskizny prajekt rehienieracyi terytoryi sučasnaha chlebzavoda № 1 u miežach nacyjanalnaha zakanadaŭstva i mižnarodnych mietadyčnych dakumientaŭ u śfiery achovy historyka-kulturnaj spadčyny.
Pa słovach Antona Astapoviča, pastupiła pieršaja reakcyja na jaho zvaroty — pamočnik Juryja Čyža zaprasiŭ jaho na razmovu.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami12
Kamientary