Старшыня таварыства аховы помнікаў звяртаўся да яго з лістом наконт забудовы Ракаўскага прадмесця.
Два тыдні таму «Наша Ніва» пісала пра планы ТАА «Трайпл» Юрыя Чыжа забудаваць участак Ракаўскага прадмесця. У выніку, калі праект зацвердзяць, будуць зруйнаваныя будынкі хлебазавода №1, якія ахоўваюцца дзяржавай.
У сувязі з гэтым старшыня Таварыства аховы помнікаў Антон Астаповіч звярнуўся з адкрытымі лістамі да міністра культуры Паўла Латушкі, кіраўніка Адміністрацыі Лукашэнкі Уладзіміра Макея і ўладальніка «Трайпла» Юрыя Чыжа.
У сваіх зваротах спадар Астаповіч звяртае ўвагу, што прадпрыемства Чыжа ўжо нанесла непапраўную шкоду архітэктурнаму аблічу Траецкага прадмесця, распачаўшы там будоўлю гіганцкага жыллёва-забаўляльнага комплексу. Аднак, нагадвае ён, пакуль чарговы праект Чыжа не зацвердзілі адпаведныя структуры Мінкульту, ёсць яшчэ магчымасць не дапусціць руйнавання будынкаў у Ракаўскім прадмесці.
«Заклікаем Вас быць паслядоўным у сваіх дзеяннях! І калі Вы неаднаразова заяўлялі аб ахове гісторыка-культурнай спадчыне, як прыярытэце ў дзейнасці Міністэрства культуры, то прыкладзіце хоць мінімальныя намаганні, каб рэалізаваць свае словы і не ўвайсці ў гісторыю ў ролі памагатага герастратаў», — эмацыйна звяртаецца Астаповіч да міністра Латушкі.
Уладзіміру Макею ён заўважыў, што «рэалізацыя праекта па руйнаванні гістарычнай забудовы на тэрыторыі хлебзавода № 1 і ўзвядзенні новых камерцыйных аб’ектаў дае выгаду толькі ТАА “Трайпл” і асабіста Юрыю Чыжу», у той час як «беларуская дзяржава ад дадзенага праекта толькі страчвае». Старшыня таварыства папрасіў Макея ўзяць пад кантроль справу і нагадаў, што «адказнасць за знішчэнне помнікаў гісторыі і культуры будзе ўскладзена і зараз, і ў гістарычнай перспектыве на дзейсную адміністрацыю».
Юрыя Чыжа старшыня таварыства заклікаў «адмовіцца ад рэалізацыі праектнай прапановы, якая распрацавана КУП “Мінскграда”, у сувязі з яе неадпаведнасцю нарматыўна-прававой базе» і прапанаваў рапрацаваць на валанцёрскай аснове эскізны праект рэгенерацыі тэрыторыі сучаснага хлебзавода № 1 у межах нацыянальнага заканадаўства і міжнародных метадычных дакументаў у сферы аховы гісторыка-культурнай спадчыны.
Па словах Антона Астаповіча, паступіла першая рэакцыя на яго звароты — памочнік Юрыя Чыжа запрасіў яго на размову.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты10
Каментары