U 2006 hodzie Minpryrody sabrała bolš jak 80 tys. podpisaŭ hramadzian Biełarusi pad pratestam suprać budaŭnictva na hranicy z respublikaj schovišča adpracavanych radyjeaktyŭnych adchodaŭ Ihnalinskaj AES. Ab hetym siońnia paviedamiŭ ministr pryrodnych resursaŭ i achovy navakolnaha asiarodździa Biełarusi Lavoncij Charužyk na kalehii viedamstva.
Jon adznačyŭ, što dziakujučy aktyŭnamu pierahavornamu pracesu ź litoŭskim bokam i mižnarodnymi arhanizacyjami pradstaŭnikam Biełarusi ŭdałosia paŭpłyvać na praces vybaru placovak pad schovišča radyjeaktyŭnych adchodaŭ, a taksama pryniać udzieł u pracedury acenki ŭździejańnia zapłanavanaha abjekta na navakolnaje asiarodździe. U vyniku mohilnik vyrašana budavać nie za 800 mietraŭ ad biełaruskaj hranicy, jak płanavałasia pieršapačatkova, a za niekalki kiłamietraŭ ad jaje, akramia taho, źmienieny niekatoryja paramietry biaśpieki pachavańnia.
Pavodle słoŭ ministra, bolšaść žycharoŭ Biełarusi da płanaŭ Litvy pa budaŭnictvu mohilnika adpracavanych radyjeaktyŭnych adchodaŭ adnosicca niehatyŭna. Tak, u śniežni 2006 hoda ŭ Brasłavie prajšli hramadskija słuchańni pa acency ŭździejańnia płanujemaha abjekta na navakolnaje asiarodździe. U słuchańniach pryniali ŭdzieł kala 200 čałaviek - kiraŭniki pradpryjemstvaŭ i arhanizacyj, navučalnych ustanoŭ, ustanoŭ achovy zdaroŭja i sacyjalnaj abarony, pradstaŭniki hramadskaści, srodkaŭ masavaj infarmacyi. Jany vykazali šerah prapanoŭ, jakija buduć daviedzieny da litoŭskaha boku.
Ciapier čytajuć
Jak u halečy śpivałasia radnia Łukašenki? Małaviadomyja fakty11
Kamientary