Biełarusy zahnali dvuch rasiejskich Miadźviedzievych u Davos

U Davosie, na słavutym ekanamičnym forumie, ščylna siadziać rasiejcy na čale ź pieršym vice-premjeram Miadźviedzievym. Imavierna, da jahonaj prysutnaści tam spryčynilisia i biełarusy.

"Kreml sioleta robić Davos pryjarytetam", — paviedamlaje zahałovak "The Moscow Times". Letaś ad rasiejcaŭ samym važnym na forumie byŭ ministar Href. Sioleta vybraŭsia mahčymy nastupnik Pucina — pieršy vice-premjer Dźmitry Miadźviedzieŭ.

Dyj uvohule rasiejcaŭ bahata — až 47 asobaŭ!

U pryvatnaści, palacieŭ jašče adzin Miadźviedzieŭ — Alaksandar, vice-prezydent "Hazpromu".

I ci nie hałoŭnaja zadača (razam z najchutčejšym ustupleńniem va Ŭsiaśvietnuju handlovuju arhanizacyju) — palepšyć imidž Rasiei, padpsavany naftahazavym kanfliktam ź Mienskam.

Tak što maje racyju rasiejski palitolah Urnoŭ: Łukašenka, dajučy svaje asymetryčnyja adkazy, namacaŭ słabyja miescy Maskvy. Ciapier doŭha buduć davodzić, što nie viarbludy.

Pryčym straty imidžavyja, jak vy razumiejecie, vymiarajucca ŭ rešcie reštaŭ hrašovym ekvivalentam. A pakolki ŭłada ŭ Rasiei ščylna źnitavanaja ź biznesam, to biełaruski "adkaz Čemberlenu" ŭdaryŭ niepasredna pa kišeniach tamtejšych tuzoŭ.

U Davos palacieŭ siońnia i ŭkrainski premjer Janukovič. Z dvuma ministrami — ekanomiki i paliva dy enerhietyki. Tam, na kurorcie, jamčej budzie pahavaryć i z hałoŭnaj personaj rasiejskaj delehacyi.

Voś tak robicca vialikaja palityka i vialikaja ekanomika.

Maskva i Kijeŭ, pry ŭsich supiarečnaściach, treba dumać, zakapali siakieru hazavaj vajny.

Ź biełaruskaha isteblišmentu ŭ Davos niekali lotaŭ Šuškievič.

Pieršy raz — napačatku 92-ha. Staršynia Viarchoŭnaha savietu tolki što paŭstałaj niezaležnaje dziaržavy atrymaŭ mahčymaść hruntoŭna pahutaryć z šeraham upłyvovych asobaŭ z roznych krainaŭ.

Potym Šuškievič raspavioŭ mnie pra adzin śmiešny epizod, źviazany z toj vandroŭkaj. Kiraŭnik maładoj Biełarusi nie šykavaŭ i vybraŭsia ŭ Švajcaryju zvyčajnym pasažyrskim avijarejsam.

— A što ž vy biez achovy? — pacikaviŭsia niechta z haspadaroŭ, vidać, i dumki nie dapuskajučy, što najvyšejšaja słužbovaja asoba dziaržavy moža hulać sama pa sabie, jak Kiplinhava kotka.

Šuškievič nie źbiantežyŭsia, kiŭnuŭ na svajho pamočnika Leanida Kamarova:

— A voś jon tut adziny ŭ dźviuch asobach. I referent, i bodyhard.

Kamaroŭ ścipła stajaŭ pobač, kruciačy ŭ rukach asadku. Švajcarcy, badaj, padumali, što heta niešta nakštałt sakretnaj zbroi ahienta 007 :)

U 1998 hodzie ekanamičny forum u Švajcaryi (praŭda, inšy, choć i taksama prestyžny — u Kran-Mantanie) naviedaŭ Łukašenka. Ale atrymaŭsia skandał. Presavaja kanferencyja z udziełam biełaruskaha kiraŭnika, pavodle versii dziaržaŭnych medyjaŭ, "vyliłasia ŭ kanflikt, arhanizavany peŭnymi zachodnieeŭrapiejskimi parlamentarami, što admysłova prybyli ŭ Kran-Mantanu dziela publičnaj abstrukcyi A.Łukašenki".

Ale čas źbirać kamiani.

Słova "dyjaloh" hučyć z abodvuch bakoŭ.

Ci chutka palaciać hurtom u Davos biełaruskija ŭradoŭcy (i nia tolki jany, ale i biznesoŭcy, i palityki)?

Sa słoŭ ekanamista Leanida Zaiki, tudy było zavitvaŭ kolišni ministar ekanomiki Šymaŭ. "A zaraz, musić, aščadžajuć valutu".

(Darečy, u presavaj słužbie ŭradu ŭvohule nie vałodajuć infarmacyjaj, ci vypisvali kamu-niebudź sioleta kamandziroŭku ŭ Davos. Va ŭsiakim razie, kažuć, usio važnaje načalstva na miescy.)

Leanid Zaika ličyć, što ŭ vypadku z Davoskim forumam varta vieści havorku nie pra barjery izalacyi, a pra miestačkovaść myśleńnia ajčynnaj kiroŭnaj elity.

Miž tym, kaža ekspert, u kuluarach takich forumaŭ vyrašajucca najvažniejšyja pytańni. "Na łyžach atrymlivajecca lepiej, čym u kabinetach".

Dyk chiba ŭ nas niama kamu vyjści na davoskuju łyžniu? :)

• 0
• 0
• 0
• 0
• 0
• 0
• 0
• 0