Pa mianušcy Jaryk

Hazieta «Hrodzienskaja praŭda» apublikavała fota ziemlakoŭ, jakija rabavali banki ŭ Hiermanii. I raskazała pra niekatorych «hierojaŭ» kryminalnaha śvietu, jakija vyjšli na mižnarodny ŭzrovień.

Niechta Jaryk rodam z Hožy. Škołu jon skončyŭ charašystam. Paśpiachova advučyŭsia ŭ adnoj z PTV, atrymaŭšy budaŭničuju śpiecyjalnaść. Potym nadyšoŭ čas iści ŭ vojska, ale niezrazumieły strach čamuści prymušaŭ chłopca «kasić». Tak jon i apynuŭsia ŭ Hiermanii, dzie chacieŭ lubym sposabam zarabić na žyćcio. Nie ŭsio składałasia hładka. Pracy nie było. Hrošy zakančvalisia. Ale tut znajšoŭsia «tavaryš», jaki prapanavaŭ haradziencu zarabić.

Udvaich zajšli ŭ kramu i kupili siakieru. Praź niekalki hadzin, nadzieŭšy maski, ź siakieraj u rukach abrabavali hetuju ž kramu.

Praź niekalki hadoŭ departavanaha z radaściu sustrakali siabry ŭ rodnym Hrodnie. I nie darma. 29-hadovy «Jaryk» (tak nazyvali jaho siabry) pryvioz im schiemu zdabyčy lohkich hrošaj. Płan vyśpieŭ u jaho hałavie padčas adsiedki ŭ turmie ŭ Hiermanii. Lohkija hrošy možna było zarabić, abrabavaŭšy bank. Jon viedaŭ, što za takoje złačynstva na terytoryi hetaj krainy pakarańnie nie nadta surovaje — da 3 hadoŭ pazbaŭleńnia voli. A ŭ svaich tavaryšach, mnohija ź jakich byli jaho adnakłaśnikami i siabrami dziacinstva, byŭ upeŭnieny: spakusa zanadta vialikaja, kab admovicca. I ŭsio zakruciłasia.

— Z hetaha času pačałasia dziejnaść Jaryka jak lidara złačynnaj arhanizacyi, — raskazaŭ haziecie staršy opierupaŭnavažany pa asabliva važnych spravach 11-ha ŭpraŭleńnia (pa Hrodzienskaj vobłaści) HUBAZiK MUS RB. — «Pracy» było šmat: navučyć vykanaŭcaŭ «asnovam» niamieckaj movy, («schnele Geld!» — «Chutka hrošy!» było całkam dastatkova, kab abrabavać bank u Hiermanii); arhanizavać niezakonny pierachod biełaruska-litoŭskaj hranicy; arhanizavać na terytoryi Litvy vyrab padroblenych dakumientaŭ; nielehalna pierapravić šarahovych vykanaŭcaŭ złačynstvaŭ ź Litvy ŭ Polšču, zabiaśpiečyć ich pražyvańnie na terytoryi hetaj krainy; praź internet znajści bank, jaki płanavałasia abrabavać; arhanizavać pastaŭku vykradzienaha ŭ Hrodnie. Pa schiemie Jaryk atrymlivaŭ 50% zdabyčy, astatniaje atrymlivali vykanaŭcy.

Apošnich, darečy, Jaryk nazyvaŭ «bajcami». Za miažu pierapraŭlaŭ ich nievialikimi hrupami, pa 2–3 čałavieki. Niezakonny pierachod biełaruska-litoŭskaj miažy arhanizavali praź les, jaki «bajcy» dobra viedali ź dziacinstva. U Litvie vykanaŭcaŭ čakaŭ palak. Jon pieradavaŭ im padroblenyja pašparty i paśviedčańni kiroŭcaŭ na hramadzian Litvy. Zatym dapamahaŭ pierajechać praz Polšču ŭ Hiermaniju.

Tam rabaŭniki navat nie karystalisia maskami

U rodnym Hrodnie «bajcoŭ» čakali siabry, niekatorych — siemji. Mužy raskazvali žonkam, što hrošy zarablajuć na budoŭli za miažoj, kali, viadoma, žonki ciapier kažuć śledčym praŭdu. Uzrost udzielnikaŭ hrupoŭki — ad 18 da 30 hadoŭ. Kradzienyja hrošy jany tracili na «dobraje i pryhožaje» žyćcio, jakim u ich ujaŭleńni było naviedvańnie dyskatek, načnych kłubaŭ i h.d. Katalisia na darahich inšamarkach — «Infinici», «BMV-Ch5». A adnojčy za dobruju pracu lidar rasščodryŭsia i navat padaryŭ adnamu sa zmoŭnikaŭ u jakaści ŭznaharody «BMV-Ch5»…

Pieršaje rabavańnie było ździejśnienaje bandaj u 2009 hodzie. Apošniaje — u śniežni 2010. Za paŭtara hoda hrodziency abrabavali 34 banki, niezakonna zavałodaŭšy bolš čym 800 tysiačami jeŭra. Na siońniašni dzień u Hrodnie zatrymanyja 8 udzielnikaŭ arhanizavanaj złačynnaj hrupoŭki, dziesiaciora ŭžo atrymali terminy i adbyvajuć pakarańni ŭ niamieckich turmach.

Užo viadomyja polskija pravadniki i litoŭskija vytvorcy padroblenych dakumientaŭ. Niamieckija i biełaruskija pravaachoŭniki praviarajuć mahčymuju datyčnaść mižnarodnaj złačynnaj hrupy i da inšych rabavańniaŭ. Nie vyklučana, što ŭ hetaj hučnaj spravie nieŭzabavie źjaviacca novyja epizody i zatrymańni.

Darečy, maksimalnaje pakarańnie, praduhledžanaje artykułam KK «Stvareńnie i ŭdzieł u złačynnaj arhanizacyi», — 12 hadoŭ pazbaŭleńnia voli.

• 0
• 0
• 0
• 0
• 0
• 0
• 0
• 0