Staršynia Biełaruskaha Chelsynskaha Kamitetu Taciana Proćka siońnia była na pryjomie pradstaŭnika hałoŭnaha haspadarčaha ŭpraŭleńnia kiraŭnictva spravaŭ prezydenta Michaiła Bialajeva. Joj było paviedamlena, što BCHK padaŭžajuć damovu na arendu ŭ tym ža samym pamiaškańni i na tych ža samych umovach.
Taciana Proćka źviazvaje hetaje rašeńnie ŭładaŭ z učorašnimi zajavami Dziarždepartamentu ZŠA i Eŭraźviazu nakont vysialeńnia BCHK. Pavodle spadaryni Proćki, heta pieršy dobry krok, jakoha ŭsie čakali.
Dziarždepartament ZŠA asudziŭ rašeńnie biełaruskich uładaŭ ab vysialeńni z ofisu Biełaruskaha Chelsynskaha kamitetu. Jak zajaviŭ pradstaŭnik Dziarždepartamentu Šon Makkormak, vynikam hetaha rašeńnia moža stać «zakryćcio najbolš značnaj niedziaržaŭnaj pravaabarončaj arhanizacyi ŭ Biełarusi».
Zamiežnapalityčnaje viedamstva ZŠA patrabavała ad biełaruskich uładaŭ admianić hetaje rašeńnie i zaklikała biełaruski ŭrad vykonvać svaje mižnarodnyja abaviazańni ŭ ramkach Chelsynskich pahadnieńniaŭ 1975 hodu.
Eŭrapiejski Źviaz taksama vykazaŭ zakłapočanaść ciskam na BCHK. Pra heta havoryłasia ŭ zajavie Niamieččyny — krainy, jakaja ciapier staršyniuje ŭ Eŭraźviazie.
Biełaruski Chelsynski kamitet vymušany byŭ vyzvalić pamiaškańnie ŭ ofisnym budynku pa vulicy Karła Libknechta ŭ Miensku, jaki naležyć Kiraŭnictvu spravaŭ prezydenta Biełarusi. Pry adsutnaści damovy ab arendzie BCHK moh pazbavicca jurydyčnaha adrasu, što mahło pryvieści da likvidacyi arhanizacyi.
