Vaśkovič znachodzicca ŭ karcary turmy № 4 u Mahilovie — na zdaroŭje nie skardzicca
Aktyvist arhkamiteta pa stvareńni partyi «Biełaruskaja chryścijanskaja demakratyja» Jaŭhien Vaśkovič znachodzicca ŭ karcary turmy № 4 u Mahilovie> paviedamiŭ adkazny sakratar arhkamiteta BCHD Dzianis Sadoŭski.
Raniej Vaśkovič adbyvaŭ pakarańnie ŭ mahiloŭskaj kałonii № 15. Jon nieadnarazova źmiaščaŭsia ŭ štrafny izalatar i paśla byŭ pieraviedzieny ŭ pamiaškańnie kamiernaha typu. Atestacyjnaja kamisija pryznačyła Vaśkoviču pakarańnie ŭ vyhladzie troch hadoŭ adbyvańnia pakarańnia ŭ turmie strohaha režymu ź siami pryznačanych. Paśla jon byŭ pieraviedzieny ŭ turmu № 4 u Mahilovie.
Vaśkovič 28 kastryčnika sustreŭsia sa svaim advakatam. «Jon paviedamiŭ, što adčuvaje siabie lepš, čym u kałonii № 15. Pavodle jaho słoŭ, inšym razam u turmie dajuć smačnuju ježu. Razam z tym, jon užo dvojčy apynuŭsia ŭ karcary, dzie znachodzicca i ciapier. Pieršy raz jon trapiŭ tudy za toje, što admoviŭsia „pracavać na fašysckuju ŭładu“, druhi raz — na dziesiać sutak za toje, što zasnuŭ u karcary», — skazaŭ Sadoŭski.
Vaśkovič taksama raskazaŭ pra ŭsie vypadki svajho znachodžańnia ŭ karcary kałonii № 15 u Mahilovie. «Jak paviedamiŭ advakat, u pieršy raz jaho tudy nakiravali na dziesiać sutak za admovu addać Bibliju, u nastupny raz — taksama na dziesiać sutak za admovu maršyravać pad daždžom. Tady ž jaho pazbavili prava na lubyja spatkańni. U dalejšym jaho sadžali na dvoje, troje, čaćviora i piaciora sutak. U vyniku 12 kastryčnika nad Vaśkovičam u kałonii adbyŭsia sud, jaki za parušeńni režymu pryhavaryŭ jaho da pieravodu z uzmocnienaha na strohi režym», — paviedamiŭ Sadoŭski.
«Vaśkovič taksama skazaŭ, što na 80–90% listy da jaho nie dachodziać. Adnak jon zmoh atrymać listy za numarami 3 i 4 ad Paŭła Sieviarynca», — adznačyŭ Sadoŭski.
Sud Babrujska (Mahiloŭskaja vobłaść) 18 maja pryhavaryŭ hramadskich aktyvistaŭ Jaŭhiena Vaśkoviča, Paŭła Syramołatava i Arcioma Prakapienku da siami hadoŭ kałonii ŭzmocnienaha režymu kožnaha. Usie troje byli pryznanyja vinavatymi va ŭčynieńni złačynstvaŭ, praduhledžanych č. 3 art. 218 (naŭmysnaje źniščeńnie ci paškodžańnie majomaści) i č. 2 art. 339 (chulihanstva) Kryminalnaha kodeksa. Sud paličyŭ dakazanaj ich vinu ŭ sprobie padpału budynka KDB u Babrujsku.
Na budynak adździeła KDB u rajcentry napali ŭ noč z 16 na 17 kastryčnika 2010 hoda — u jaho byli kinuty butelki z zapalnaj sumieśsiu. Paciarpiełych nie było. Kryminalnaja sprava pavodle artykuła «Chulihanstva» raspačało UUS Babrujska.
Pravaabaroncy ličać Vaśkoviča palityčnym źniavolenym.
Kamientary