Advakat: Dajcie mnie 20 chvilin, i ni ŭ koha nie zastaniecca sumnieńniaŭ, što na videazapisie jość fakty mantažu

U časie sudovaha pasiadžeńnia pa spravie ab teraryźmie 2 listapada sudździa Alaksandr Fiedarcoŭ adznačyŭ, što sudovaje śledstva padychodzić da kanca. Paśla daśledavańnia dokazaŭ baki zmohuć zajaŭlać chadajnictvy. Ale ŭžo zaraz bok abarony ličyć sudovaje śledstva niaskončanym, zajaviŭ advakat Stanisłaŭ Abraziej. Razam z advakatam Kanavałava Dźmitryjem Lepretaram jany zajavili šerah chadajnictvaŭ.

Pavodle Abrazieja,

usio jašče nie dapytany śviedka Davydaŭ — supracoŭnik KDB, jakomu byli addadzienyja reštki samarobnych vybuchovych pryład u 2005 hodzie.

«Taksama prašu dać mnie, jak i boku dziaržaŭnaha abvinavačvańnia, prava ažyćciavić daśledavańnie videazapisu pa stop-kadrach, jakoje pakul zrabiŭ tolki bok dziaržabvinavačańnia. Havorka idzie pra samyja pieršyja pakazanyja ŭ sudzie videazapisy z kamier nazirańnia ŭ mietro.

Ja prašu dać mnie ŭsiaho tolki 20 chvilin, i ni ŭ koha ŭ hetym budynku nie zastaniecca sumnieńniaŭ, što hety videazapis maje fakty mantažu», — zajaviŭ jon.

Nahadajem, videazapisy z kamier nazirańnia ŭ mietro pačali vyvučacca 23 vieraśnia. Na videa sa stancyi «Kastryčnickaja» bačny momant vychadu Kanavałava i Kavalova z sumkaj ź ciahnika, jaki prybyŭ z boku stancyi «Płošča Lenina» i ich pierachod na stancyju «Kupałaŭskaja». Sumku jany niasuć ŭdvuch. Zatym kamiery na «Kupałaŭskaj» zafiksavali ich vychad na płatformu i pasadku ŭ bok stancyi «Kamiennaja Horka». Na «Frunzienskaj» Kanavałaŭ i Kavaloŭ traplajuć pad abjektyvy videakamier, kali vychodziać ciahnika, što prybyŭ z «Kupałaŭskaj». Pa pieronie jany iduć nie śpiašajučysia, udvuch niesučy sumku.

Supracoŭnik milicyi, jaki znachodzicca pobač z turnikietami, nie źviartaje na ich uvahi.

Advakat taksama nastojvaŭ na tym, kab było ahučana, jak pravodziłasia vymańnie videazapisaŭ ŭ mietro i paprasiŭ vyklikać u sud śledčaha Hienprakuratury Filipoviča S.V., jaki vyrablaŭ vymańnie.

Advakat taksama padaŭ chadajnictva vyklikać u sud ekśpiertaŭ FSB pa mantažy, jakim videazapis była pradastaŭleny na ekśpiertyzu. Hetyja ekśpierty patrebnyja «dla tłumačeńni pracedury ekśpiertyzy». «Mianie cikavić daśledčaja častka. Śpiecyjalisty pa hetaj častcy dapytanyja jašče nie byli», — skazaŭ Stanisłaŭ Abraziej.

«Nastupnaje chadajnictva — vyklikać u jakaści śviedak bratoŭ Murašak.

Rastłumaču čamu: u chodzie pieratrusuŭ ich byli vyjaŭlenyja nožki ad budzilnika, jakija anałahičnyja pa ahulnych hrupavych prykmietach z nožkami budzilnika, jakija ŭvachodzili ŭ skład samarobnaj vybuchnoj pryłady (SVU) 2005 hoda. Hetaja ekśpiertyza abviaščajecca ŭ sudovym pasiadžeńni. Dadzienyja abstaviny sudom pravierany nie byli».

Advakat Abraziej taksama prasiŭ vyklikać ŭ jakaści śviedki Utkina Ramana Barysaviča, jaki ŭziaŭ na siabie adkaznaść za vybuchi 15 i 22 vieraśnia 2005 hoda,

Advakat Kanavałava prosić pryznačyć piratechničnuju ekśpiertyzu pa SVU 2008 h.

Jak zajaviŭ na sudzie advakat Kanavałava Dźmitryj Lepretar «dziaržabvinavačańnie nastojvaje na tym, što Kanavałaŭ ŭ 2008 hodzie vykarystaŭ samarobnyja vybuchovyja pryłady (SVU),

adnak hetyja źviestki nie pravieranyja i ŭ materyjałach spravy niama zaklučeńnia ekśpiertaŭ pa hetym pytańni».

«Dla taho kab vyznačyć, ci źjaŭlajucca dadzienyja pryłady samarobnymi, vybuchovymi, nieabchodna najaŭnaść viedaŭ u vobłaści vybuchatechniki. Prašu pryznačyć piratechničnuju ekśpiertyzu, daručyŭšy jaje ekśpiertam HKC MUS Respubliki Biełaruś», — zajaviŭ Lepretar.

Na dazvoł ekśpiertaŭ, pa słovach advakataŭ, jon paprasiŭ pastavić 7 pytańniaŭ pra epizody, u jakich abvinavačvajecca jaho padabaronny Kanavałaŭ. Usio heta nieabchodna, pa słovach advakata, dla adkazu na pytańnie, ci sapraŭdy mieli miesca ŭstanoŭka i padryŭ samarobnaj vybuchovaj pryłady ŭ pieryjad času:

— Z kastryčnika pa śniežań 2000 hoda ŭ padjeździe № 2 šmatkvaternaha žyłoha doma № 7 u Viciebsku;

— Z sakavika pa listapad 2001 hoda ŭviečary ŭ padjeździe šmatkvaternaha žyłoha doma № 22/3 pa vuł. 39-j Armii ŭ Viciebsku;

— U adzin ź dzion leta 2002 hoda na fasadzie budynka dziciačaj biblijateki pa adrasie vuł. 39-j Armii, № 7 u Viciebsku;

— U adzin ź dzion žniŭnia 2003 hoda ŭ viačerni čas sutak na ŭčastku piešachodnaj ściežki, raźmieščanaj prykładna ŭ 100 mietrach ad doma № 54 vuł. 39-j Armii ŭ Viciebsku;

— 10 lipienia 2004 pad dacham kijoska № 8 «Viciebskabłsajuzdruku»;

— U adzin ź dzion druhoj pałovy žniŭnia 2004 kala čyhunačnaj stancyi Hryšany Viciebskaha rajona na ŭčastku prasiołačnaj darohi, jakaja prachodzić pa nieekspłutavanym puci ŭ kirunku da Viciebska;

— 3 kastryčnika 2004 hoda ŭ 800 m ad čyhunačnaj stancyi Hryšany Viciebskaha rajona;

Kali ŭsie hetyja epizody abo niekatoryja ź ich mieli miesca, to advakat prosić vyśvietlić, jaki byŭ typ pryłady, pryncyp jaho dziejańnia, sposab inicyjavańnia, składovyja elemienty i mahutnaść zarada.

* * *

Sud budzie praciahnuty 14 listapada.

• 0
• 0
• 0
• 0
• 0
• 0
• 0
• 0