"Prajekt Karakin" padali karava
Kamu vyhadnyja sensacyi pra fihuru Kramla na biełaruskim poli? Piša ŭ svaim błohu Alaksandar Kłaskoŭski.
Versiju pra niejkaha nibyta strašnaha dla Łukašenki Karakina, nadrukavanuju žoŭtaj rasiejskaj "Viersijej", zhatavali na chutkuju ruku.
Śviatłana Kalinkina zajaŭlaje, što jaje dumki nichto nie pytaŭsia. Miž tym u sensacyjnym materyjale spasyłajucca mienavita na mierkavańnie viadomaj mienskaj žurnalistki. I tym samym padmacoŭvajuć tezu, što Kreml nibyta znajšoŭ persanalnuju zamienu dziejnamu biełaruskamu kiraŭniku. Voś-voś pačnie raskručvać!
Ci jość uvohule niejki realny hrunt pad "prajektam Karakin"? Całkam imavierna, što niechta z padobnym (a mo' i nie padobnym) proźviščam sapraŭdy maje adpaviednyja ambicyi i navat padtrymku ŭ Maskvie (ale na značna bolej ścipłym uzroŭni, čym kramloŭskija kabinety).
Ź inšaha boku, zaŭždy isnuje najmienšaja imaviernaść, što niejki voŭk u lesie zdoch. U našym vypadku — što blizkija da rasiejskich viarchoŭ palittechnolahi sapraŭdy ŭzialisia za scenar zamiaščeńnia ŭłady ŭ susiedniaj krainie, jakaja z bratniaj raptam stała takoj prablemnaj.
Ale bolej prykmietaŭ taho, što my majem spravu ź blefam.
Mahčyma, Łukašenku chočuć pastrašyć (deputat Kaścian metanimična kaža pra "psychičnuju ataku na biełaruski narod"). Ale nia bolej za toje.
Zavarvać tut kašu sa źmienaj ułady Maskva naŭrad ci ryzyknie z šerahu pryčynaŭ.
Ja ŭžo trochi analizavaŭ hety siužet voś tut. Bačycie, nakarkaŭ! :)
Dyk voś, kali koratka, to Kreml nia ŭmieje hulać u takija hulni na čužym poli, baicca "pamaranču" i ŭvohule zaraz budzie zaciahnuty z hałavoju ŭ svoj ułasny pieradvybarčy vir.
Tym časam samomu Łukašenku — čym čort nie žartuje? — mo' šče i pašencić zhulać na ichnim poli. Ci daremna tut pabyli dniami Ziuhanaŭ z Prachanavym?
Tak što nieŭzabavie, badaj, znoŭ darečy budzie afaryzm maskoŭskaha palitolaha Satarava: "Rasieja pakazała zuby, a heta akazałasia ŭstaŭnaja skivica, jakuju zvyš taho efektna vybili" :)
Darečy, mo i ŭvohule daremna my tut na Maskvu sabak viešajem?
Vy nie dapuskajecie dumki, što hetym ukidam mohuć vyrašacca zadačy neŭtralizacyi asobnych lideraŭ tutejšaj apazycyi?
Va ŭsiakim razie, rasiejski palitolah Suzdalcaŭ ličyć, što zamoŭnikaŭ publikacyi ab "prajekcie Karakin" varta šukać u Miensku.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary