Technik «MI-24»: Naša armija moža zmahacca z ujaŭnym voraham, ale nie z tumanam

29 listapada pad Pružanami na Brestčynie paciarpieŭ krušeńnie vajskovy viertalot «Mi-24». Ekipaž z troch čałaviek zahinuŭ.

Ministerstva abarony Biełarusi paćvierdziła infarmacyju pra katastrofu vajennaha viertalota «Mi-24». Siarod mahčymych pryčynaŭ nazyvajuć techničnuju niaspraŭnaść ci pamyłku piłatavańnia va ŭmovach mocnaha tumanu. Pamočnik ministra abarony Alaksandr Hura ŭdakładniŭ, što zahinuli vopytnyja lotčyki: 38-hadovy kamandzir ekipaža, lotčyk 2 kłasa major Aleh Kachno, 32-hadovylotčyk-šturman, lotčyk 2 kłasa kapitan Dzianis Hłuščanka, 43-hadovy bartavy technik kapitan Valeryj Babko:

«Padčas vykanańnia płanavych vučebna-trenirovačnych palotaŭ pry zachodzie na pasadku va ŭmovach, jakija rezka ŭskładnilisia, u rajonie aeradromu „Pružany“ adbyłosia krušeńnie viertalota „Mi-24“ vajenna-pavietranych siłaŭ i vojskaŭ supraćpavietranaj abarony Biełarusi. Ekipaž u kolkaści troch čałaviek zahinuŭ. Pa fakcie zdareńnia pravodzicca rasśledavańnie kamisijaj Ministerstva abarony».

Sprava zaviedzienaja na padstavie artykuła «Parušeńnie praviłaŭ palotaŭ ci padrychtoŭki da ich, jakoje paciahnuła za saboj hibiel dźviuch ci bolš asobaŭ». Termin śledstva — da dvuch miesiacaŭ. Da vyśviatleńnia abstavinaŭ nadzvyčajnaha zdareńnia paloty «Mi-24» prypynienyja. Na ŭzbrajeńni ŭ biełaruskim vojsku znachodzicca 70 adzinak takoj techniki. U najnoŭšaj historyi armii Biełarusi heta pieršaja avaryja «Mi-24» z čałaviečymi achviarami.

Kapitan vajenna-pavietranych siłaŭ u adstaŭcy Alaksandr Paščanka na pasadzie bartavoha technika viertalota «Mi-24» słužyŭ u vajskovaj častcy 02181, raskvataravanaj blizu vioski Zasimavičy pad Pružanami. Darečy, u 1995 hodzie mienavita adtul z zahadam źniščyć pavietrany šar z amierykanskimi pavietrapłavalnikami byli ŭźniatyja bajavyja viertaloty — usio tyja ž «Mi-24». Čym, z hledzišča kapitana Paščanki, vyklikanaja katastrofa bajavoj mašyny, jakaja prajšła bahata «haračych kropak» u roznych častkach śvietu?

— Najpierš vielmi škada, spačuvaju. Dobryja chłopcy byli, usie biełarusy. Dvuch ja viedaŭ asabista, kłasnyja prafiesijanały… Mahli pamylicca jak jany sami, tak i kiraŭniki naziemnych słužbaŭ. Pakul ciažka skazać štości peŭnaje. Na apošni momant infarmacyja takaja, što pryčynaj avaryi stała drennaje nadvorje. Heta kažuć i maje byłyja kalehi. Što da techniki, to jana, viadoma, staraja, ale ž nibyta prystasavanaja da roznych umovaŭ. Prynamsi, na momant avaryi «Mi-24» pracavaŭ dobra. Inšaja sprava, što nadta ŭžo chočacca prademanstravać biełaruskuju vajennuju mahutnaść, tamu i paloty vielmi časta pravodziacca — z patrebaj i biez patreby. Kab Polšča i ŭsio NATO pabačyła, što ŭ Biełarusi jość čym ich papužać.

-To bok i praz 40 hadoŭ paśla pačatku vypusku «Mi-24» ničoha novaha, kab supraćstajać nadvorju, nie vynajdziena? Možna zmahacca z voraham, ale nie z tumanam?

— Pakul, na žal, tak. Ale jašče raz kažu: całkam mahčyma, što ŭva ŭmovach adsutnaści bačnaści razhubiŭsia lotčyk, ale nie vyklučana, što jość vina kiraŭnika palotaŭ ci kiraŭnika zony pasadki. Heta pavinna vyjavić śledstva. Nie mahu skazać, ci našmat lepšyja ŭ hetym sensie zachodnija anałahi, ale, mabyć, tak, bo tam na ŭzbrajeńni technika našmat naviejšaja. U nas ža dahetul ekspłuatujucca savieckija ŭzory, jakim pa 20–30, a to i 40 hadoŭ. Niama ŭ dziaržavy hrošaj, kab abnavić park, zastajecca tolki pałochać tym, što jość u najaŭnaści.

Ad leta 2009 hoda Uzbrojenyja siły Biełarusi stracili siem lotčykaŭ i čatyry bajavyja samaloty i viertaloty. 30 žniŭnia 2009 padčas avijašou ŭ polskim Radamie raźbiŭsia vajenny «Su-27» bazy źniščalnikaŭ u Baranavičach, lotčyki-snajpiery Alaksandr Marficki i Alaksandr Žuraŭlevič zahinuli.

21 krasavika 2010 nad Ružanami na Brestčynie sutyknulisia dva vajennyja samaloty «MiH-29», piłot adnaho sa źniščalnikaŭ paśpieŭ katapultavacca, ale samalot ruchnuŭ na ziamlu i ŭzarvaŭsia. Druhi samalot udałosia pasadzić.

23 vieraśnia taho ž hoda pad Hancavičami paciarpieŭ katastrofu «MiH-29», zahinuli lotčyk 1 kłasa Siarhiej Kavalenka i lotčyk 2 kłasa Alaksandr Žyhajła.

Straty niasie nie tolki Ministerstva abarony. 20 kastryčnika 2011 u Pastaŭskim rajonie na miažy ź Litvoj raźbiŭsia viertalot Dziaržaŭnaha pamiežnaha kamiteta «Jeŭrakoptar». Dva čalcy ekipaža i try teležurnalisty, jakija rychtavali repartaž ź miažy, zahinuli.

Za čas isnavańnia Čyrvanaściažnaj Biełaruskaj vajennaj akruhi na jaje terytoryi zdaryłasia blizu sotni incydentaŭ z vajennymi samalotami i viertalotami, zahinuli bolš za šeść dziasiatkaŭ lotčykaŭ. Siarod ich — i pieršy Hieroj Biełarusi Uładzimir Karvat, jaki 23 traŭnia 1996 paciarpieŭ katastrofu na samalocie «Su-27». Majučy mahčymaść katapultavacca, Karvat da apošniaha advodziŭ niaspraŭny samalot ad nasielenych punktaŭ u vakolicach Baranavičaŭ.

«Mi-24» — saviecki transpartna-bajavy viertalot raspracoŭki kanstruktarskaha biuro Mila. Sieryjny vyrab pačaŭsia ŭ 1971 hodzie. Pieršy ŭ SSSR i druhi ŭ śviecie paśla amierykanskaj «Kobry» admysłovy bajavy viertalot. Šyroka vykarystoŭvaŭsia va ŭsim śviecie, u tym liku padčas kanfliktaŭ u «haračych kropkach». Nieaficyjnaja nazva — «krakadził». Pavodle nataŭskaj kłasifikacyi — Hind.

• 0
• 0
• 0
• 0
• 0
• 0
• 0
• 0