Kiraŭnik presavaj słužby prezydenta Pavieł Lohki:
Lohki: «Milinkievič sapraŭdy taki mahutny, što moža surjozna dapamahčy ŭładzie?»
Ja adkazaŭ, što hetaje pytańnie nie da mianie i ŭ svaju čarhu spytaŭ surazmoŭcu, ci trapić adkryty list apazycyjnaha palityka da kiraŭnika dziaržavy?
Lohki: «Nia viedaju, ja ŭ kiraŭnika dziaržavy nie pytaŭsia, jość u jaho hety list ci niama. Na žal, u mianie niama mahčymaści spytać u jaho pra heta. A razvažać pra toje, jakaja moža być jahonaja reakcyja, jak heta moža być uspryniata, ja, jak minimum, nie ŭpaŭnavažany».
Deputat Viarchoŭnaha Savietu XII sklikańnia Viktar Ałampijeŭ nazyvaje zvarot Alaksandra Milinkieviča «krokam palityka»:
Ałampijeŭ: «Nielha sumniavacca ŭ tym, što kali b ułada pajšła na vykanańnie patrabavańniaŭ eŭrapiejskaj supolnaści (pra heta havorycca i ŭ zvarocie Milinkieviča), dyk Milinkievič zmoh by vyrašyć mnohija pytańni na karyść Biełarusi. Ale raźličvać, što ŭłada vyzvalić palitviaźniaŭ, adnović dziejnaść niezaležnych medyjaŭ u poŭnym abjomie dy vykanaje inšyja ŭmovy, pakul što nielha. Tolki jaje vialikaść ekanomika prymusić uładu šukać vyjście. Ale heta budzie troški paźniej».
Deputat Pałaty pradstaŭnikoŭ Anatol Krasucki bačyć u liście apazycyjnaha palityka «mocny pijar‑chod»:
Krasucki: «Heta kańjunkturnaje rašeńnie. Milinkievič skarystaŭsia sytuacyjaj, što skłałasia ŭ dačynieńniach Biełarusi z Rasiejaj i mahčymych kantaktach na eŭrapiejskim kirunku. Ja nia dumaju, što ad jaho lista mohuć być surjoznyja nastupstvy. Ale heta krok da atrymańnia palityčnych dyvidendaŭ».
Dramaturh i žurnalist, u minułym arhanizatar masavych akcyjaŭ pratestu Mikałaj Chalezin havoryć, što taki zvarot nia maje perspektyvy:
Chalezin: «Na moj pohlad, heta biessensoŭnyja listy, zakliki. Ja nia viedaju takich dyktataraŭ, jakija pajšli b na liberalnyja reformy. Usie zhadvajuć tolki adnaho Pinačeta. Ale ž tam byli zusim inšyja abstaviny taho, što adbyvałasia. Tamu, mnie zdajecca, ničoha z hetaha zvarotu nia budzie. Tyja aryšty, jakija byli ŭčora, pazaŭčora i iduć usie hetyja dni, śviedčać pra toje, što ničoha nia źmienicca. I nijakaha pamiakčeńnia dyktatu nia budzie».
Alaksandr Fiaduta prakamientavaŭ Radyjo Racyja adkryty list lidera abjadnanych demakratyčnych sił Alaksandra Milinkieviča da A.Łukašenki:
— U svaim liście da spadara Łukašenki Milinkievič adznačyŭ šerah peŭnych umovaŭ, bieź jakich dyjałoh stanovicca niemahčymym. Nasamreč, siońnia Milinkievič stanovicca mienavita tym, kim jon i pavinien być — jon stanovicca lideram. Kali b siońnia, Milinkievič hety zvarot pačaŭ uzhadniać z kiraŭnikami palityčnych partyj, kožny ź jakich maje ŭłasnyja ambicyi, jon by nikoli nie pryniaŭ hetaha rašeńnia. Milinkievič uziaŭ na siabie adkaznaść, tamu, mienavita, ciapier jaho treba padtrymlivać.
Dziŭna čytać list adnaho Sašy druhomu, pamiatajučy, što jašče hod tamu hetyja dva čałavieki byli zaciatymi praciŭnikami na prezydenckich vybarach. Adzin byŭ la ŭłady i ŭ luby momant byŭ hatovy kinuć druhoha za kraty, a jahonych prychilnikaŭ začyścić siłavymi specaperacyjami.
Dziŭna bačyć u tekście słova «spadziajusia», pamiatajučy pry hetym, što aŭtar lista źviartajecca da čałavieka, jakoha adkryta abvinavačvajuć u źniknieńni palitykaŭ i žurnalistaŭ.
Dziŭna čytać tłumačeńni Milinkieviča pra toje, što «biełaruskaja apazycyja ŭ cełym kanstruktyŭnaja», što «ŭ jejnych šerahach niama radykalna nastrojenych hramadzian, jakija planujuć užyć hvałt dla zrynańnia ŭłady». Dziŭna čytać, jak lider apazycyi apraŭdvajecca pierad čałaviekam, jaki adpraviŭ jašče adnaho kankurenta na palityčnym poli — A.Kazulina — za kraty na 5,5 hadoŭ tolki dziela asabistaj pomsty za słovy «Saša, dzie hrošy».
Sienatar Mikałaj Čarhiniec u intervju «Gazecie Wyborczej« jon zajaviŭ litaralna nastupnaje:
— Źmiest lista Milinkieviča viedaju. Kali ŭ tym, što piša Alaksandr Milinkievič my znojdziem karysnyja rečy, ułada adreahuje pazityŭna, — skazaŭ Mikałaj Čarhiniec «Gazecie wyborczej«.
Ciapier čytajuć
U centry Minska tajamniča źnikła dačka dyrektara bujnoha ahrakompleksu5
Kamientary