Čynoŭnik atrymaŭ try hady z adterminoŭkaj za parušeńnie čatyroch artykułaŭ

Byłoha načalnika Biarozaŭskaj mižrajonnaj inśpiekcyi achovy žyviolnaha i raślinnaha śvietu asudzili pa čatyroch artykułach KK. Hetyja złačynstvy kaštavali jamu štrafu 100 bazavych vieličyń i troch hadoŭ turmy z adterminoŭkaj na dva hady.

Čynoŭnik pryznany vinavatym u pieravyšeńni ŭłady abo słužbovych paŭnamoctvaŭ, atrymańni chabaru, biaździejnaści słužbovaj asoby i niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ.

Śledstva vyjaviła niekalki kryminalnych epizodaŭ. Tak u 2010 hodzie na kanale ŭ rajonie Biarozaŭskaj DRES inśpiektar złaviŭ dvuch rybakoŭ, jakija pastavili mašyny ŭščylnuju da vady, za što možna raskašelicca na 20 bazavych vieličyń. Kvitancyj, jak kažuć materyjały śledstva, u jaho nie było, Potym raźbiralisia biez «biurakratyi»: adzin zapłaciŭ 17 500 rubloŭ, druhi — 35 000. Krychu paźniej biez udziełu vinavatych na ich byli składzienyja pratakoły, pa jakich abodvum nibyta było vyniesienaje papiaredžańnie.

U traŭni 2010 hoda načalnik inśpiekcyi paškadavaŭ dvuch rybakoŭ, jakija łavili sietkami płotku na voziery Čornaje kala vioski Chrysy. De-fakta abodvum śviaciła kryminalnaja sprava, bo suma škody skłała bolš za 3,5 młn rubloŭ. Ale kolkaść niezakonna zdabytaj ryby «źmienšyłasia» da 29, i havorka pajšła ŭžo ab administracyjnym pravaparušeńni. Nasamreč, zhodna z materyjałami spravy, brakańjery zdabyli paradku 167 ryb, ahulnaj vahoj nie mienš za 11 kh. Roźnica była śpisanaja jak biezhaspadarnaja. Jaje čynoŭnik paśla zdaŭ u kramu miascovaha rybhasa. Padobny vypadak adbyŭsia i ŭ studzieni hetaha hoda.

Chabar, jaki načalnik inśpiekcyi atrymaŭ za toje, što nie staŭ pryciahvać da administracyjnaj adkaznaści dvuch mužčyn, u narodzie nazyvajecca «padziaka».

Jašče adzin epizod tyčycca 18 pryład rybałoŭstva, adabranych u parušalnikaŭ, jakija paśla pieravandravali dadomu da načalnika inśpiekcyi. A kanfiskavanuju ŭ adnaho z rybakoŭ-škodnikaŭ nadzimanuju łodku «Amieha-21» jon padmianiŭ na stareńki «nyrec» svajho siabra, va ŭłasnaść jakoha, adpaviedna, pierajšoŭ novy płaŭsrodak.

Viankom «zalotu» stali vosiem patronaŭ kalibru 7,62, jakija načalnik inśpiekcyi čamuści zachoŭvaŭ u piśmovym stale svajho kabinieta. Ich milicyjanty znajšli ŭžo padčas pieratrusu, upisaŭšy ŭ śpis jašče adzin kryminalny artykuł.

U vyniku pa sukupnaści złačynstvaŭ čynoŭnik atrymaŭ štraf 100 bazavych vieličyń i try hady turmy z adterminoŭkaj na dva hady. Akramia taho, ciaham čatyroch hadoŭ asudžany nie budzie mieć prava zajmać pasady, źviazanyja z vykanańniem arhanizacyjna-rasparadčych abo administracyjna-haspadarčych abaviazkaŭ.

• 0
• 0
• 0
• 0
• 0
• 0
• 0
• 0