Dziesiaciora hramadzianaŭ Złučanych Štataŭ Ameryki buduć pryciahnutyja da administracyjnaj adkaznaści — za parušeńnie praviłaŭ znachodžańnia ŭ Biełarusi. Pavodle aficyjnaj infarmacyi, jany pravodzili zaniatki anhielskaj movy biez dazvołu Ministerstva adukacyi.
U adździele hramadzkich suviaziaŭ abłasnoj milicyi paćvierdzili, što 9 lutaha zatrymali amerykanskich hramadzianaŭ. Na ich skłali pratakoł pavodle artykułu 185 Administracyjnaha kodeksu — «Parušeńnie praviłaŭ znachodžańnia zamiežnych hramadzianaŭ u Respublicy Biełaruś» i adpuścili.
Amerykancy znachodziacca ŭ Mahilovie kala miesiaca. Ich zaprasiła siudy dabračynnaje abjadnańnie «Stefan» dziela biaspłatnych seminar‑praktykumaŭ vyvučeńnia anhielskaj movy. Pastar adnaho z malitoŭnych damoŭ horadu daŭ pamiaškańnie dla zaniatkaŭ. Kaža amerykanskaja nastaŭnica:
Nastaŭnica: «Pastar hetaj carkvy, kali byŭ u Amerycy, žyŭ z nami — i my stali dla jaho siamjoj. My dobryja siabry, i jon dazvoliŭ vykarystoŭvać hety budynak biaspłatna. My atrymali našy vizy ad arhanizacyi, jakaja zajmałasia hetymi pytańniami, — i jany skazali, što my možam tut vykładać anhielskuju movu».
Va ŭpravie adukacyi Mahiloŭskaha abłvykankamu zaznačyli, što amerykanskija hramadzianie nia mieli prava vykładać — u ich nie było dazvołu. Chacia supracoŭnica ŭpravy adukacyi paćvierdziła, što pa dazvoł jany źviartalisia.
Supracoŭnica ŭpravy adukacyi: «Adnak im było rekamendavana źviarnucca ŭ Ministerstva adukacyi, bo pytańnie znachodzicca ŭ kampetencyi hetaha orhanu dziaržaŭnaha kiravańnia».
Pavodle kiraŭnika dabračynnaha abjadnańnia «Stefan» Dźmitryja Kancavienki, nahodaj dla hetkaha abychodžańnia z amerykanskimi hramadzianami stałasia nibyta ichnaja relihijnaja dziejnaść u Mahilovie.
Kancavienka: «Relihijnaj dziejnaściu nibyta jany tut zajmalisia, chacia Kamitet u spravach relihii kazaŭ im, što anijakaj relihijnaj dziejnaści tut nie było».
Kali na amerykancaŭ nakładuć administracyjnaje pakarańnie, Dźmitry Kancavienka źbirajecca jaho abskardžvać, a taksama budzie damahacca, kab spynili ŭsie administracyjnyja dziejańni datyčna jahonych haściej. Pavodle Administracyjnaha kodeksu, amerykanskim hramadzianam pahražaje papiaredžańnie albo štraf da dvaccaci minimalnych vieličyniaŭ.
