V.Bandarenka: Uzrosły nacisk na palitviaźniaŭ śviedčyć pra hatoŭnaść uładaŭ vypuścić ich

Uzrosły nacisk na palitviaźniaŭ śviedčyć pra toje, što ŭłady hatovy vypuścić ich na volu. Takoje mierkavańnie vykazała 30 śniežnia na pres-kanfierencyi ŭ Minsku Volha Bandarenka, žonka kaardynatara hramadzianskaj kampanii «Jeŭrapiejskaja Biełaruś» Dźmitryja Bandarenki.

Na jaje dumku, apošnim časam pačaŭsia «novy vitok» nacisku na palitvźniaŭ. «Ich izalujuć ad infarmacyi, nie dajuć sustrakacca z advakatami i svajakami. Na ich buduć naciskać, z tym kab jany napisali prašeńnie ab pamiłavańni», — skazała Bandarenka.

«Kali naciskajuć — chočuć vypuścić, ale na svaich umovach. Kab jany napisali prašeńnie ab pamiłavańni, kab potym pakazać, što ich źniavažyli, złamali, kab ich dyskredytavać»,

U svaju čarhu Iryna Chalip, žonka byłoha kandydata ŭ prezidenty Andreja Sańnikava, nie raźličvaje na chutkaje vyzvaleńnie palitźniavolenych. «Nichto nikoha nie choča vypuskać i nie źbirajecca vypuskać. Navošta naciskajuć, navošta ich sprabujuć pastavić na kaleni i napisać hetyja papierki z frazaj: „Prašu mianie vyzvalić“? Heta vielmi prosta. Kali chulihany abrabujuć vaš dom, jany mohuć nahadzić i pasiarod vašaha pakoja ŭžo paśla taho, jak vynieśli ŭsie rečy. Hetyja pavodziny absalutna toj ža linii i taho ž paradku. Typu: davajcie my, mała taho što ich pasadzili, im jašče i nahadzim, prymusim ich napisać prašeńnie ab pamiłavańni, a potym nie zadavolim», — zajaviła Chalip.

***

Nahadajem, 27 śniežnia Viarchoŭny sud admoviŭ u abskardžańni pryhavoru Dźmitryju Bandarenku, jaki byŭ davieranaj asobaj kandydata ŭ prezidenty na vybarach 2010 hoda Andreja Sańnikava. Bandarenka, asudžany na dva hady pazbaŭleńnia voli ŭ kałonii ahulnaha režymu, adbyvaje pakarańnie ŭ papraŭčaj kałonii № 15 Mahilova. Adrazu paśla aryštu ŭ Bandarenki abvastrylisia chraničnyja zachvorvańni, i ŭ lipieni jamu zrabili apieracyju na pazvanočniku ŭ 5-j kliničnaj balnicy Minska. 20 žniŭnia zakončyłasia tracina terminu źniavoleńnia Bandarenki, i, zhodna z zakonam, jon mieŭ prava na źmiakčeńnie pakarańnia, adnak u hetym jamu było admoŭlena.

Sańnikaŭ asudžany na piać hadoŭ pazbaŭleńnia voli ŭ kałonii ŭzmocnienaha režymu za arhanizacyju masavych biesparadkaŭ 19 śniežnia 2010 hoda. Adbyvać pakarańnie palityk pavinien byŭ u papraŭčaj kałonii Navapołacka (Viciebskaja vobłaść), kudy prybyŭ u kancy lipienia, adnak paśla hetaha jaho nieadnarazova etapavali ŭ roznyja ŭstanovy. Ciapier Sańnikaŭ znachodzicca ŭ kałonii «Vićba-3».

• 0
• 0
• 0
• 0
• 0
• 0
• 0
• 0