В.Бандарэнка: Узрослы націск на палітвязняў сведчыць пра гатоўнасць уладаў выпусціць іх

Узрослы націск на палітвязняў сведчыць пра тое, што ўлады гатовы выпусціць іх на волю. Такое меркаванне выказала 30 снежня на прэс-канферэнцыі ў Мінску Вольга Бандарэнка, жонка каардынатара грамадзянскай кампаніі «Еўрапейская Беларусь» Дзмітрыя Бандарэнкі.

На яе думку, апошнім часам пачаўся «новы віток» націску на палітвзняў. «Іх ізалююць ад інфармацыі, не даюць сустракацца з адвакатамі і сваякамі. На іх будуць націскаць, з тым каб яны напісалі прашэнне аб памілаванні», — сказала Бандарэнка.

«Калі націскаюць — хочуць выпусціць, але на сваіх умовах. Каб яны напісалі прашэнне аб памілаванні, каб потым паказаць, што іх зняважылі, зламалі, каб іх дыскрэдытаваць»,

У сваю чаргу Ірына Халіп, жонка былога кандыдата ў прэзідэнты Андрэя Саннікава, не разлічвае на хуткае вызваленне палітзняволеных. «Ніхто нікога не хоча выпускаць і не збіраецца выпускаць. Навошта націскаюць, навошта іх спрабуюць паставіць на калені і напісаць гэтыя паперкі з фразай: „Прашу мяне вызваліць“? Гэта вельмі проста. Калі хуліганы абрабуюць ваш дом, яны могуць нагадзіць і пасярод вашага пакоя ўжо пасля таго, як вынеслі ўсе рэчы. Гэтыя паводзіны абсалютна той жа лініі і таго ж парадку. Тыпу: давайце мы, мала таго што іх пасадзілі, ім яшчэ і нагадзім, прымусім іх напісаць прашэнне аб памілаванні, а потым не задаволім», — заявіла Халіп.

***

Нагадаем, 27 снежня Вярхоўны суд адмовіў у абскарджанні прыгавору Дзмітрыю Бандарэнку, які быў даверанай асобай кандыдата ў прэзідэнты на выбарах 2010 года Андрэя Саннікава. Бандарэнка, асуджаны на два гады пазбаўлення волі ў калоніі агульнага рэжыму, адбывае пакаранне ў папраўчай калоніі № 15 Магілёва. Адразу пасля арышту ў Бандарэнкі абвастрыліся хранічныя захворванні, і ў ліпені яму зрабілі аперацыю на пазваночніку ў 5-й клінічнай бальніцы Мінска. 20 жніўня закончылася траціна тэрміну зняволення Бандарэнкі, і, згодна з законам, ён меў права на змякчэнне пакарання, аднак у гэтым яму было адмоўлена.

Саннікаў асуджаны на пяць гадоў пазбаўлення волі ў калоніі ўзмоцненага рэжыму за арганізацыю масавых беспарадкаў 19 снежня 2010 года. Адбываць пакаранне палітык павінен быў у папраўчай калоніі Наваполацка (Віцебская вобласць), куды прыбыў у канцы ліпеня, аднак пасля гэтага яго неаднаразова этапавалі ў розныя ўстановы. Цяпер Саннікаў знаходзіцца ў калоніі «Віцьба-3».

• 0
• 0
• 0
• 0
• 0
• 0
• 0
• 0