Siońnia Alaksandar Łukašenka pastaviŭ uradu zadaču — za piać hadoŭ nablizić uzrovień raźvićcia małych i siarednich haradoŭ da ŭzroŭniu stalicy. Pra heta było aficyjna abvieščana na specyjalnym pasiedžańni ŭ kiraŭnika dziaržavy, dzie razhladali prajekt vykanańnia dziaržaŭnaj kompleksnaj prahramy raźvićcia rehijonaŭ.
Alaksandar Łukašenka skrytykavaŭ urad i asabista premjera Siarhieja Sidorskaha za nieracyjanalnaje vykarystańnie srodkaŭ na hetyja mety:
Łukašenka: «My pavinny ŭźniać, reanimavać, pryvieści da žyćcia ŭsie małyja harady — ja jašče raz padkreślivaju: heta prykładna da 50 tysiač nasielnictva. Jak by ni było ciažka, heta treba zrabić. I pieravažna zrabić prykładna ŭ hetaj piacihodcy».
Pavodle Łukašenki, žychary Biełarusi havorać, što pakul narmalna možna žyć tolki ŭ Miensku dy bujnych haradach. I tamu hałoŭnaja zadača — «padciahnuć uzrovień žyćcia, umovy pracy i bytu da staličnaha ŭzroŭniu».
Staršynia Biełaruskaha sajuzu pradprymalnikaŭ Alaksandar Patupa havoryć, što ŭ rehijonach sapraŭdy ciažka pracaŭładkavacca. Słaby mały biznes nie spryjaje stvareńniu novych pracoŭnych miescaŭ. A rost cenaŭ na enerhanośbity robić perspektyvu rehijonaŭ jašče horšaj, a ŭ asobnych miescach navat katastrafičnaj. Tamu, na dumku spadara Patupy, asablivaja ŭvaha da pravincyi patrebnaja:
Patupa: «Ale treba razumieć, što realna aktyŭnaść u małych haradach zaležyć ad ahulnaj ščylnaści biznesu ŭ krainie. Treba pavialičvać kolkaść pryvatnych strukturaŭ. A jany potym naturalnym čynam pačnuć sychodzić z bujnych haradoŭ u małyja harady, pasiołki, utvarać filii. Tak było va ŭsim śviecie».
Što da piaci hadoŭ dla vyroŭnivańnia sytuacyi ŭ pravincyi sa stalicaj, dyk prafesar Patupa ličyć hety termin małarealnym:
Patupa: «Nia treba traplać u staruju savieckuju pastku pra roŭnaść horadu i vioski».
