200 tysiač rasijskich turystaŭ pabyvała ŭ Biełarusi na Novy hod?
Turaapieratary i haspadary ahrasiadzibaŭ dzielacca ŭražańniami ad «rasiejskich kanikuł» u Biełarusi.
Pry kancy śniežnia Ministerstva sportu i turyzmu ahučyła prahnoz: pa ich padlikach, na śviatkavańnie Novaha hoda ŭ Biełaruś čakałasia bolš za 200 tysiač haściej z Rasii. Heta na paŭsotni tysiač bolš, čym pryjechała (i prajechała ŭ tym liku) turystaŭ za ŭvieś hod z usich krain.
Rasijskich turystaŭ i sapraŭdy było šmat.
Mnohija hateli i sanatoryi z ahrasiadzibami byli zabraniravany zadoŭha da śviataŭ.Rasijskaja prysutnaść adčuvałasia paŭsiul — ad Minska da rajcentraŭ. Adnak, jak miarkujuć turapieratary, ličba ŭ 200 tysiač — značna zavyšanaja.
Minsk—Niaśviž—Dudutki
«Letaś my pryniali kala 1800 haściej z Rasii, sioleta ŭžo 3000», — raskazvaje dyrektar turystyčnaj kampanii «Viapol» Halina Patajeva. Pa jaje słovach, kolkaść rasijskich turystaŭ sapraŭdy raście,
ale 200 tysiač — ličba prosta nierealnaja.Najpierš tamu, što takuju kolkaść haściej na siońnia prosta niama dzie pryniać.
«U tym ža Breście, naprykład, usiaho 3-4 hateli, kudy možna pasialić haściej», — kaža Halina Ramualdaŭna.
Prahramy kaladnaha adpačynku zamiežnikaŭ, prapanavanyja turkampanijaj «Viapol» praduhledžvajuć ekskursiju pa Minsku, vandroŭki ŭ Mir i Niaśviž, naviedvańnie Dudutak. A taksama pajezdki ŭ Hrodna, Lidu, Brest (z naviedvańniem Biełaviežskaj puščy), Łahojsk.
Maršrut Minsk—Mir—Niaśviž—Dudutki, pa słovach Haliny Patajevaj, karystajecca ŭ rasiejcaŭ najbolšaj papularnaściu.
Adpačynak z nacyjanalnym uchiłam
Haspadar ahrasiadziby «Try skrypki» ŭ Miadzielskim rajonie Anton Skrypka taksama adznačaje rost kolkaści rasijskich turystaŭ. «U razy bolš stali jeździć, pačynajučy z hetaha leta. A na zimovyja śviaty pačali zamaŭlać miescy ź vieraśnia», — raskazvaje jon. Da ich jeduć z Maskvy i Sankt-Pieciarburha. U hetym hodzie popyt vidavočna apiaredziŭ prapanovu.
Što ž pryciahvaje siudy maskvičoŭ i piciercaŭ?
«Ludzi ź miehapolisaŭ šukajuć tut cišyniu i spakoj. I im heta pa kišeni, navat vielmi tanna», —kaža Źmicier. Rasiejcam padabajecca haścinnaść biełarusaŭ, miascovaja pryroda. I jašče adna važnaja akaličnaść: «Niekatoryja hości kažuć, što ŭ Rasii taksama možna znajści viaskovy kałaryt, ale dajechać u ichnija vioski redka kali mahčyma. A ŭ Biełarusi dobryja darohi paŭsiul».
Haspadar padkreślivaje, što kožnamu hościu napierad tłumačyć, što adpačynak u ich z nacyjanalnym kałarytam. Tut nie śpiavajuć i nie tančać, ale kormiać stravami, zhatavanymi pa receptach navakolnych viosak. Pry žadańni haściam zładziać majstar-kłas pa vypiečcy chatniaha chleba.
Da ich pasłuhaŭ łaźnia: chočaš — «pa-biełamu», a chočaš — i «pa-čornamu».
«Mnohija hości sami prosiać, kab ichnija niekalki dzion adpačynku byli maksimalna nabližanyja da sapraŭdnaha viaskovaha žyćcia», — kaža haspadar.
Siadziba «Try skrypki» prapanuje haściam spłavy na kajakach rovarnyja i vandroŭki, konnyja prahułki, letniuju i zimovuju rybałku i mnohaje inšaje.
Nie Minskam adzinym
U navahodnija dni rasiejskich turystaŭ možna było pabačyć nie tolki na papularnym maršrucie Minsk—Niaśviž.
U nievialičkim Biełaaziorsku, što ŭ 250 km ad stalicy, rasiejcy ablubavali azdaraŭlenčy centr «Enerhija», jaki naležyć RUP «Brestenerha». Pačynajučy ź minułaha leta siudy stała prablematyčna patrapić miascovym, čaho nie zdarałasia raniej.Hości z Rasii zavitali siudy i na kaladnyja vakacyi. Vybar na karyść «Enerhii» nie ździŭlaje. Tut vielmi prystojny śpiektr azdaraŭlenčych pracedur, dobra arhanizavany volny čas. Dla achvočych ładziacca ekskursii ad Biełaviežskaj puščy da Niaśviža.
Miascovyja pradprymalniki raskazvajuć, što rasiejcy achvotna naviedvali biełaaziorskija kramy. «Nabyvali vopratku, na niekalki adzinak. U pieršuju čarhu — biełaruskaj vytvorčaści».
Łyžka dziohciu
Vierahodna,
takaja kolkaść zamiežnych turystaŭ nie mahła nie paŭpłyvać na statystyku zdareńniaŭ.Dla niekatorych z rasiejcaŭ kaladnyja vakacyi ŭ Biełarusi skončylisia niaŭdačaj. A dla kahości i trahiedyjaj. U bolšaści vypadkaŭ pryčynaj niaščaścia byli aŭtaavaryi.
Najbolšy rezanans vyklikała žudasnaja avaryja 7 studzienia na praśpiekcie Niezaležnaści ŭ Minsku, u jakoj zahinuli maładyja rasijskija aficery.
* * *
Kudy najpierš jeduć rasiejcy:
— Minsk-Mir-Niaśviž
— Biełaviežskaja pušča-Brest
— Minsk-Dudutki
— Minsk-Zasłaŭje
— Minsk-Łahojsk-Chatyń
Što pryvablivaje rasiejcaŭ u nas:
— biełaruskaja haścinnaść,
— adnosnaja tannaść miascovaha adpačynku,
— nievialikija adlehłaści i dobryja darohi,
— nacyjanalny kałaryt i pryhožaja pryroda.
Ciapier čytajuć
«Stajać na svaim, kožny nakolki moža!» Vialikaja hutarka z Natallaj Dulinaj pra hopnikaŭ z HUBAZiKa, Kaleśnikavu i što tam u kaho ŭ kałonii8
Kamientary