Milinkievič: Vybaraŭ niama, tamu i bajkatavać niama čaho

Pakolki ŭ Biełarusi vybaraŭ, pa sutnaści, niama, značyć i bajkatavać niama čaho. Takoje mierkavańnie vykazaŭ u intervju BiełaPAN adziny kandydat u prezidenty ad demsił na vybarach 2006 hoda, lidar ruchu «Za Svabodu» Alaksandr Milinkievič, jaki naviedaŭ Mahiloŭ z nahody śviatkavańnia 435-j hadaviny atrymańnia horadam Mahdeburhskaha prava.

«Vybaraŭ niama, nichto sumlenna nie ličyć hałasy. Ułada budzie pryznačać, heta vidavočna, novy parłamient. Bajkot u takim vykanańni, što «my na vašy ahidnyja vybary nie pojdziem», ciažka realizavać», — ličyć palityk.

Pavodle jaho mierkavańnia, dla taho kab taki bajkot byŭ efiektyŭnym, spatrebicca vialikaja kolkaść ludziej, jakija raspaŭsiudžvajuć infarmacyju pra jaho, što na praktycy ciažka realizavać.

Pavodle słoŭ Milinkieviča, jamu bližej inšaja pazicyja — aktyŭny ŭdzieł demsił u vybarčych pracedurach.

«Kab byŭ hramadski dyjałoh, dyjałoh ź ludźmi, — rastłumačyŭ palityk. — Da ludziej treba davieści bolš infarmacyi ab tym, što adbyvajecca, čamu ŭ krainie kryzis, čamu heta ŭłada nie maje pierśpiektyŭ. Ale pakolki jość palitźniavolenyja, ja b źniaŭsia pierad samym hałasavańniem».

Aceńvajučy palityčnuju situacyju, Milinkievič zajaviŭ, što «ŭłada žyvie va ŭmovach žorstkaha kryzisu, jaki sama ž pieravažna i spravakavała», a taksama va ŭmovach «nastupstvaŭ padziej 19 śniežnia 2010 hoda». «Represii ŭzmacniajucca, tamu što ŭłady tak i nie navučylisia kiravać krainaj biez strachu, biez dubinki», — ličyć eks-kandydat u prezidenty.

Pavodle jaho mierkavańnia, na situacyju ŭ Biełarusi mohuć paŭpłyvać mižnarodnyja sankcyi — «dypłamatyčnyja, palityčnyja, vielmi šyrokija vizavyja i kropkavyja ekanamičnyja». «Ale ja suprać šyrokich ekanamičnych sankcyj, — padkreśliŭ Milinkievič.

Kamientujučy apošnija padziei vakoł kandydata ŭ prezidenty na vybarach 2010 hoda Andreja Sańnikava, jaki, jak vyśvietliłasia na minułym tydni, źviarnuŭsia da Łukašenki z prašeńniem ab pamiłavańni, Milinkievič zajaviŭ: Sańnikaŭ — vielmi mužny čałaviek, mocny palityk. «Ja chacieŭ by, kab jon chutčej byŭ na voli i pracavaŭ na Biełaruś», — skazaŭ lidar ruchu «Za Svabodu».

Milinkievič nazvaŭ ciapierašniuju situacyju momantam vialikaj adkaznaści.

«Dla nas važna zrabić krainu svabodnaj i zachavać Biełaruś, jana pierad pahrozaj źniknieńnia. Moža adbycca ekanamičnaja anieksija z boku Rasii, heta vidavočna — u Rasii jość takija impierskija nastroi.

• 0
• 0
• 0
• 0
• 0
• 0
• 0
• 0