U nievialikim anhlijskim horadzie na kłumbach «vysadzili» płastykavyja kvietki. I heta pryncypovaja pazicyja

Śpiakotnaje i suchoje leta ŭsio čaściej stavić jeŭrapiejskija harady pierad davoli pryziemlenaj prablemaj: jak zachavać zialonyja nasadžeńni, kali vady nie chapaje, a ich paliŭ kaštuje ŭsio daražej. Niezvyčajnaje rašeńnie pryniali ŭłady Paŭnočna-Uschodniaha Linkalnšyra ŭ Anhlii. U horadzie Hrymśbi, jaki ŭvachodzić u hetuju administracyjnuju adzinku, u vazonach na estakadzie kala trasy A180 zamiest žyvych kvietak źjavilisia płastykavyja. Padrabiaznaści raskazvaje The Telegraph.

U municypalitecie patłumačyli: pryčynaj stali praciahłaja zasucha i abmiežavańni na vykarystańnie vady. Palivać žyvyja kvietki ŭ takich umovach paličyli i niemetazhodnym, i zanadta darahim.

Pavodle miascovych uładaŭ, štučnyja kvietki kaštavali 320 funtaŭ. Dla paraŭnańnia, tolki paliŭ žyvych raślin letam kaštavaŭ kala tysiačy funtaŭ štotydzień.

Člen miascovaj rady Bob Kalisan, jaki adkazvaje za navakolnaje asiarodździe i enierhietyčnuju biaśpieku, patłumačyŭ, što ŭłady nie chacieli dadatkova pavialičvać raschod vady va ŭmovach jaje niedachopu. Pry hetym pakidać pustyja vazony abo zasochłyja raśliny taksama nie chaciełasia: bietonnaja estakada i biez taho vyhladaje davoli šera.

Tak i ŭźnik kampramis: jarkija kvietki zastalisia, ale palivać ich bolš nie treba.

Pavialičyć

Adnak nie ŭsie žychary Hrymśbi acanili takoje ŭpryhožvańnie horada. Krytyki źviartajuć uvahu na paradoks: sprabujučy vyrašyć adnu ekałahičnuju prablemu — deficyt vady, — ułady faktyčna stvarajuć inšuju, vykarystoŭvajučy bolš płastyku.

Dla Hrymśbi pytańnie akazałasia jašče i spravaj haradskoha honaru. Miascovyja žychary nahadvajuć, što raniej horad atrymlivaŭ uznaharody za svaje kvietkavyja kampazicyi. Tamu płastykavyja raśliny niekatoryja nazyvajuć navat «hańbaj» i bajacca, što ekanomija pastupova pryviadzie da zamieny žyvych kvietak štučnymi i ŭ inšych častkach horada.

Ale jość i tyja, chto nie bačyć u ekśpierymiencie ničoha drennaha. Ich arhumient prosty: kali štučnyja kvietki vyhladajuć amal jak sapraŭdnyja, słužać daŭžej, kaštujuć tańniej i nie patrabujuć vady, čamu b nie vykarystoŭvać ich tam, dzie raśliny vyroščvajuć vyklučna dziela dekoru?

Ułady zapeŭnivajuć, što masava pieratvarać Hrymśbi ŭ horad płastykavych kvietak nie źbirajucca. Kvietniki ŭ centry horada zastanucca žyvymi, a niezvyčajnaje rašeńnie datyčyć tolki vazonaŭ kala estakady.

Kali tudy viernucca sapraŭdnyja raśliny, pakul nieviadoma. U municypalitecie kažuć, što ŭsio budzie zaležać ad nadvorja, situacyi z zasuchaj, siezona i, viadoma, stanu haradskoha biudžetu.

• 2
• 1
• 2
• 8
• 1
• 1
• 0
• 0