«Čakajem u Minsku +1 słavutaść!» Błohieraŭ pryvieźli ŭ byłuju turmu na Vaładarskaha

Ułady arhanizavali dla hrupy błohieraŭ ekskursiju ŭ Piščałaŭski zamak — byłuju turmu na Vaładarskaha, — a ciapier tyja dzielacca zachapleńniem z padpisčykami.

Błohierka Raidensy pazicyjanuje svoj kantent jak «dobryja naviny ź Biełarusi». Jana maje kala 645 tysiač padpisčykaŭ u tyktoku i 130 tysiač u instahramie.

Dziaŭčyna apublikavała dopis u Threads: «Piščałaŭski zamak ciapier: rekanstrukcyja zavieršycca ŭ 2027 hodzie! Jon adkryjecca dla kožnaha, tam buduć muziej, kaviarnia i restarany. Meta rekanstrukcyi — maksimalnaje zachavańnie ścien i kanstrukcyj. Čakajem u Minsku +1 słavutaść».

@raidensy

čto budiet v Piŝałovskom zamkie?

♬ orihinalnyj zvuk - rejdensi

U kamientarach Raidensy nahadali što ŭ byłoj turmie katavali ludziej. Ale błohierka heta praihnaravała, a ŭ tyktok vykłała rolik, dzie robić akcent mienavita na słovie zamak i kaža frazu, jakaja jašče niadaŭna hučała b dvuchsensoŭna: «Piščałaŭski zamak adkryjecca dla kožnaha!»

Hetych ža tezisaŭ prytrymlivajecca i błohier Maksim Puškin: «Pakazvaju, jak zaraz u centry Minska vyhladaje Piščałaŭski zamak (Vaładarka). Jak zrobiać, adkryjuć dla ŭsich! Navat kafe buduć».

Pavialičyć

U storys u instahramie (tam Maksim maje bolš za 80 tysiač padpisčykaŭ) adznačaje: «Abiacajuć, što budzie vielmi pryhoža!».

Błohierka i stvaralnica insta-realici Maša Sas uvohule nie vielmi razumieła, kudy trapiła. Jana raspaviała padpisčykam u storys, što ich pryvieźli «ŭ niejki zamak». A potym jašče dadała: «Heta prosta ŭ Minsku taki zamak staić. Tut restaŭracyja poŭnym chodam idzie!»

Pavialičyć

Praŭda, u vyniku ŭsio ž Maša była rasčaravana: «Ramantyzuješ usie hetyja zamki… Što tut niejkaja žančyna ŭ pryhožaj sukiency žyła… A heta turma. Ja voś dumała, my zaraz projdziemsia, tut niejkaja lehienda, pryvid…».

Niedaloka ad Mašy hulaŭ i jaje muž — insta-błohier Illa Sas.

Adznačyŭsia ŭ sumna viadomym miescy viadučy dy stvaralnik miedyjaahienctva Arkadź Łohvin (maje 72 tysiačy padpisčykaŭ u instahramie i kala 120 tysiač u tyktoku). Jon uziaŭ z saboj na ekskursiju dzicia.

Pavialičyć

Jaho miesiedž nie adroźnivajecca ad inšych. Maŭlaŭ, jak dobra, što ŭ 200‑hadovym zamku zrobiać fajnaje miesca dla tusovak — nieŭzabavie jano budzie radavać minčan dy haściej stalicy. «Bary, restarany, muziei — takaja niezvyčajnaja łakacyja źjavicca ŭ centry Minska!».

Pra turmu hučyć litaralna niekalki słoŭ. Praŭda, Arkadź pamyliŭsia, skazaŭšy, što Vaładarku zakryli na rekanstrukcyju ŭ 2016 hodzie.

Heta aburyła žurnalista Ihara Łosika: «U jakim hodzie na rekanstrukcyju? Ja ŭ 2020 siadzieŭ tam. Vas pa abviestkach nabirajuć?»

Zdajecca, z naviedvalnikaŭ ekskursii bolš-mienš adekvatna jaje aceńvaje Stanisłaŭ Ahinski — suzasnavalnik prajektaŭ «Hastrafest» i «Piasočnica». Jon pairanizavaŭ u storys, što siudy cikava trapić tolki ŭ jakaści hościa. Ale dadaŭ: «Praz hod prybudziem ź inśpiekcyjaj».

Pavialičyć

Zaśviaciŭsia na mierapryjemstvie błohier Stas Siemčanka (letaś jon zaklikaŭ biełarusaŭ udzielničać u vybarach i raspaviadaŭ, što Minsk kruciejšy za Dubaj).

Vykłała svaje videa taksama byłaja Ulka Pulka (jana ž Uljana Stalarova, a ciapier prosta Pula). Dla jaje Piščałaŭski zamak taksama prosta «šalona pryhožaja łakacyja». Kaža, vielmi kruta dałučycca da hetaj historyi.

Pavialičyć

Kaniešnie, takija pazityŭnyja videa z byłoj turmy, dzie zusim niadaŭna katavali ŭ tym liku palityčnych źniavolenych, šmat kaho aburyli.

• 1
• 1
• 0
• 28
• 0
• 1
• 10
• 0