Babilon (Babel)
ZŠA – Meksika – Francyja, 2006, kalarovy, 142 chv.
Režyser: Alachandra Hansales Ińjarytu
Roli vykonvajuć: Bred Pit, Kiejt Błanšet, Hael Harsia Bernal, Kašy Jakusa, Adryana Baraza, Rynka Kikučy, Haryjet Ŭołter, Trevar Marcin
Žanr: Drama
Adznaka: 8 (z 10)
7 naminacyj na “Oskara”, uznaharoda za najlepšy saŭndtrek.
Kula, vypuščanaja ŭ Maroka nieaściarožnymi padletkami, traplaje ŭ amerykanku, jakaja była z mužam na turystyčnaj ekskursii. Hetaja trahiedyja vykliča padziei ŭ Meksycy, Japonii i Złučanych Štatach. Śviet – Bavilonskaja vieža, dzie ŭsie źviazanyja adny z adnym, nie razumiejuć adzin adnaho – i adzin na adnaho ŭpłyvajuć.
Hłuchaniamaja japonka, jakaja nia moža pieražyć samazabojstva maci – maje źviestki pra marakanskuju kulu, meksykanskaja niania zabłukaje z amerykanskimi dzietkami, a afrykanski padletak stanie achviaraj vajny z teraryzmam.
Jak i ŭ stužkach “Suka-luboŭ” i “21 hram” Alachandra Hansales Ińjarytu vykarystoŭvaje svoj firmovy pryjom skryžavanaha mantažu. Jon źmiešvaje padziei ŭ Maroka, pajezdku niani z amerykanskimi dziećmi ŭ Meksyku – i pakuty ŭ japonskim horadzie. Pry hetym dziei razhortvajucca nie adnačasova, a apieradžajuć adna adnu, adstajuć, sprabujuć dahnać – što vyklikaje mituśniu, šum… i šok ad fatalnaje źnitavanaści.
Dla kožnaha miesca – svaje žesty j svaja intanacyja. Aŭtyzm niamoty – u industryjnaj Japonii, śpioka, praha, pył – na afrykanskaj ziamli, karnavalny huł Meksyki – i pahonia na amerykanskaj miažy.
Režyser prymušaje Kiejt Błanšet padoŭhu lažać u kryvi (što aktrysie vielmi nie spadabałasia), ździraje z tvaru Breda Pita halivudzkuju masku – jahony hieroj spakutavany, stomleny j žyvy.
Karcina ahałomšvaje suśvietnym homanam: movy źmiešvajucca z hukami pustyni j haradzkimi šumami.
Režyser zbudavaŭ Babilonskuju viežu. Ale cahliny hetaje viežy chaładnavata-prafesijnyja – i nia vielmi złučajucca miž saboju.
Ź 1 sakavika – seansy ŭ mienskich kinateatrach: “Aŭrora”, “Maskva”, “Kastryčnik”.
Film majecca j na ličbavych nośbitach
Borat (Borat: Cultural Learnings of America for Make Benefit Glorious Nation of Kazakhstan)
ZŠA, 2006, kalarovy, 84 chv.
Režyser: Łary Čarlz
Roli vykonvajuć: Saša Baron Koen, Kien Daŭnšn, Pameła Andersan
Žanr: Kamedyja-burlesk
Adznaka: 4 (z 10)
“Załaty hlobus” za najlepšuju mužčynskuju rolu ŭ kamedyi, naminacyja na “Oskara” za najlepšy adaptavany scenar
Televiadoŭca z Kazachstanu Borat adpraŭlajecca ŭ Złučanyja Štaty, kab zrabić repartaž “pra najvialikšuju krainu ŭ śviecie”. Pa chodu jon źbirajecca ažanicca z Pamełaj Andersan.
Karcina z udziełam brytanskaha MTV-aha komika Sašy Koena zdymałasia metadam “padstavaŭ”. Televizijny komik apranuŭ masku idyjota Borata (isłamski Kazachstan zdymaŭsia ŭ Rumynii!) – i pad vyhladam prydumanaha hieroju apytvaŭ zvyčajnych amerykancaŭ, jakija prymali hulniu za sapraŭdny repartaž. (Sudovyja pozvy ad abduranych amerykancaŭ nie prymusili siabie doŭha čakać). Ale najbolšaje abureńnie film vyklikaŭ u Kazachstanie. Koen panaprydumvaŭ sabie Kazachstan – adyli hety naprydumany vobraz i abśmiajaŭ.
U tradycyjach teleburlesku, dzie śmiešnaje – heta brutalnaje j nizavoje, hieroj doŭha nosicca pa ekranie aholenym, łomicca ŭ kazachskuju ambasadu i adpuskaje MTV-šnyja žartački.
Karcina ŭjaŭlaje cikavaść dla brytanskich amataraŭ Sašy Koena – i tych amerykancaŭ, ź jakich ździekvaŭsia aktor.
Film majecca na ličbavych nośbitach.
Dobry niemiec (The Good German)
ZŠA, 2006, čorna-bieły, 105 chv.
Režyser: Styven Soderberh
Roli vykonvajuć: Džordž Kłuni, Kiejt Błanšet, Tobi Mahvajr, Džon Roder, Džek Tompsan, Ravil Iśjanaŭ
Žanr: Palityka-vajskovy film-nuar
Adznaka: 6,5 (z 10)
Režyser Styven Soderberh naminavaŭsia na “Załatoha miadźviedzia” Berlinskaha kinafestu, kampazytar Tomas Ńjumen naminavaŭsia na “Oskara” za lepšuju muzyku
U paślavajennym Berlinie vajskovy karespandent Džejk Hiejsmar (Džordž Kłuni) sustrakaje svaju byłuju paluboŭnicu Lenu Brant (Kiejt Błanšet). Jejnaha źnikłaha muža apantana šukajuć amerykanskaja j savieckaja vyviedka…
Karcina Soderberha – heta film-nuar u šatach palityčnaha detektyvu, špiehaŭskaha trymcieńnika – i vajskovaha śledztva. Stylovaja čorna-biełaja karcina z hłybokimi ścieniami j zmročnym aśviatleńniem, kudy idealna ŭpisvajecca sapraŭdnaja chronika. Fatalnaja žančyna Kiejt Błanšet – ź bliskučymi vačyma j harłavym chrypam.
Achviary žarści…
Hniusnyja tajny…
Amal bieznadziejnyja sproby ŭciokaŭ.
Ale historyja pravisaje. Zastajecca styl. Ź niemymi vopleskami ŭspaminaŭ, mokrymi parasonami – i vajskovym popiełam.
Maryja Antuaneta (Marie Antoinette)
ZŠA – Francyja – Japonija, 2006, kalarovy, 123 chv.
Režyser: Safija Kopała
Roli vykonvajuć: Kirsten Danst, Styŭ Kuhien, Azija Ardženta, Džudzi Dejvis, Džejsan Švarcman, Šyrli Hendersan, Roŭz Birn
Žanr: Kaściumna-bijahrafičny film
Adznaka: 5,5 (z 10)
Naminacyja na “Załatuju halinu” Kanskaha kinafestu, “Oskar” za dyzajn kaściumaŭ, kinapryz ad Francuskaj nacyjanalnaj systemy adukacyi
14-hadovuju aŭstryjskuju pryncesu Maryju Antuanetu vydali za francuskaha dafina Ludovika XVI. Malimonnyja noravy Versalu vielmi adroźnivalisia ad aŭstryjskich – i hieraini pryjšłosia prykładać namahańni, kab stacca svajoj. Ale pakrysie žyćcio pieraŭtvaryłasia ŭ lehkadumnuju viečarynku… Jakaja zavieršycca revalucyjaj.
Strymanyja postaci “versalskich” aktorak (vyłučajecca Azija Ardženta ŭ roli vulharnaj madam Dziubary), dekaracyi, kaściumy. Śviata koleraŭ i dyzajnu, kremavyja j ružovyja smakoćci. Dla stužki byli stvoranyja sotni ekskluziŭnych madelaŭ abutku. Udarny numar: klipava-dziorzki mantaž marnatraŭnaha šyku pad sučasnuju muzyku…
Kali taja viečarynka skončyłasia kryvavaju revalucyjaj – to čym musiać skončacca siońniašnija?
Karcina majecca na ličbavych nośbitach.
