Pra heta jon zajaviŭ 15 lutaha na svajoj pieršaj pres-kanfierencyi ŭ Minsku.
«Ja — hramadzianin Izraila, u nas niama palitźniavolenych. Što da Biełarusi, to ja nie viedaju, mnie treba pačytać haziety.
Praz paŭhoda ja adkažu na vaša pytańnie,
— skazaŭ pasoł. — Ja žurnalist i vydatna viedaju, jak pišucca artykuły.
Vy sami byli ŭ łahierach dla palitźniavolenych?»
Iosif Šahał padkreśliŭ, što na mižnarodnaj arenie Izrail imkniecca być «maksimalna strymanym» pry abmierkavańni situacyi ŭ Biełarusi. «U miežach hetaj samaj strymanaści Izrail nikoli nie vystaŭlaŭ niejkich surjoznych pretenzij Biełarusi. Kali i hałasavaŭ pa dakumientach, to na asnovie parytetu, kali Biełaruś hałasavała suprać Izraila ŭ pytańniach paleścina-izrailskich adnosin», — skazaŭ dypłamat.
Jon taksama adznačyŭ, što Izrail strymana stavicca da sankcyj Jeŭrasajuza i ZŠA ŭ dačynieńni da Biełarusi. «My hałasujem u miežach partniorskich adnosin, ale sami my takoha nie inicyjujem. Jak i Biełaruś nie inicyjuje antyizrailskija pytańni, ale hałasuje pa ich», — padkreśliŭ Šahał.
Jak raniej paviedamlałasia, novy pasoł Izraila ŭ Biełarusi byŭ pryznačany ŭ kastryčniku minułaha hoda i ŭ kancy studzienia hetaha pačaŭ vykanańnie svaich abaviazkaŭ u Minsku.
***
Šahał — uradženiec Baku, pracavaŭ u Izraili žurnalistam, u tym liku na «Dziaviatym kanale» TB. Byŭ deputatam kniesieta 17-ha sklikańnia. 8 studzienia hetaha hoda Vyšejšy sud spraviadlivaści Izraila adchiliŭ isk, padadzieny rucham «Za čyściniu ŭłady», suprać jaho pryznačeńnia pasłom u Biełarusi. Istcy śćviardžali, što ŭ hetym pryznačeńni prysutničaje kanflikt intaresaŭ, bo ŭ dačynieńni da ministra zamiežnych spraŭ Avihdora Libiermana, jaki prapanavaŭ hetu kandydaturu, viadziecca rasśledavańnie ŭ suviazi ź dziejnaściu byłoha pasła Izraila ŭ Biełarusi. Sudździa Vyšejšaha suda Ester Chajut u svaim rašeńni adznačyła, što chacia kamisija pa pryznačeńni i razhladała kandydaturu, prapanavanuju Libiermanam, adnak rašeńnie ab pryznačeńni było pryniata zychodziačy z prafiesijnych navykaŭ kandydata. Takim čynam, sud nie ŭbačyŭ u hetym pryznačeńni kanfliktu intaresaŭ.
Libierman unios kandydaturu Šahała ŭ miežach 11 pryznačeńniaŭ, jakija jon maje prava ažyćciavić. Pasada izrailskaha pasła ŭ Minsku stała vakantnaj paśla taho, jak časovy vykanaŭca abaviazkaŭ pasła Eduard Šapira ŭ siaredzinie sakavika 2011 hoda byŭ pieraviedzieny na pasadu konsuła Izraila ŭ Sankt-Pieciarburhu.
25 studzienia ŭ intervju internet-telekanału ITON TV Šahał paviedamiŭ, što asabista znajomy z Alaksandram Łukašenkam. «Z majho punktu hledžańnia, Łukašenka — heta lidar. U jaho jość peŭnyja minusy, ale čaho ŭ jaho nie adniać, i heta paćvierdzić biełaruski narod, jaki hałasuje narmalna, što b tam nie havaryli ab padtasoŭkach, biełarusy dobra žyli: jany atrymlivali zarpłaty, piensijaniery — piensii, było čysta, ekanomika vydatna pracavała, — skazaŭ dypłamat. — Va ŭmovach, kali Biełaruś izalujuć: idzie mahutnaja chvala, najpierš jeŭrapiejskaja i amierykanskaja, — ich abvinavačvajuć u parušeńni pravoŭ čałavieka, va ŭpor nie zaŭvažajučy, što praktyčna toje ž samaje, tolki ŭ značna bolšych maštabach, robicca ŭ Rasii. Niezrazumieły hety akcent, nacisk. My, jak izrailcianie, jakija pa sabie viedajem, što takoje palityka dvajnych standartaŭ, pavinny dobra razumieć tyja krainy, jakija traplajuć u takuju ž situacyju».
Kamientary