Aršanskija elektrasietki. 52 čałavieki pałochajuć vychadam z aficyjnaha prafsajuzu
Kala50-ci čałaviek napisali kalektyŭnuju zajavu na vychad z prafsajuzu, nie atrymaŭšy dapłaty za škodnyja ŭmovy pracy. Daviedaŭšysia pra heta, administracyja paabiacała vypravić situacyju.
Kala dvuch tydniaŭ tamu rabotniki aršanskich elektrasietak atrymali raźlikovyja kvitki za studzień. Kiroŭcy, ślesary, tokary, matarysty, jakija pavinny byli atrymać dapłatu «za škodnaść», nie ŭbačyli ŭ kvitkach adpaviednaj hrafy — kožny z rabotnikaŭ nie daličyŭsia kala 100 tysiač rubloŭ.
Pracoŭnyja inicyjavali schod, dzie zapatrabavali, kab administracyja patłumačyła, što zdaryłasia.
«Sabralisia ŭ aktavaj zali, zaprasili načalstva. Spačatku nam skazali, kab my spyniali „bunt“ i šli pracavać. Tady my tut ža, u zali, skłali kalektyŭnuju zajavu na vychad z prafsajuzu, padpisali jaje 52 čałavieki. Niechta pieradaŭ pra heta kiraŭnictvu, i tady imhnienna prybiehli kiraŭnik prafsajuznaj arhanizacyi Alaksandar Ivanoŭ, načalnik płanavaha adździeła, hałoŭny buchhałtar, namieśnik dyrektara pradpryjemstva i načalnik adździeła pa achovie pracy. Nam skazali, što byŭ adpaviedny zahad ź „Viciebskenierha“, navat nazyvali numar zahadu. Tolki pakazać jaho admovilisia. U nas skłałasia ŭražańnie, što „zahad“ prydumali ŭ našym płanavym adździele, kab na nas zekanomić», — apavioŭ spadar Michaił, rabotnik aršanskich elektrasietak.
Administracyja pradpryjemstva dała abiacańnie, što ŭ nastupnym miesiacy ŭsio budzie vypłačana — u tym liku i toje, što niedadali «za škodnaść» za studzień.
Da taho času zajavu na vychad z prafsajuzu rabočyja vyrašyli «prytrymać»
«Pakul heta naša strachoŭka. Nam pad hetuju zajavu abiacali ŭsio vypłacić.
Kali nie zrobiać — padamo jaje ŭ prafsajuz.U nas, darečy, jość rabotniki, jakija pavychodzili z aficyjnaha prafsajuza za apošnija hady. Bo heta prafsajuz nam ničoha nie daje. Na inšych pradpryjemstvach zarobki rastuć, a nam nadumalisia zrezać. My kazali načalstvu: «Heta ciapier zima, tamu nichto nie sychodzić i nie źjaždžaje. A ŭvosień zvalnialisia cełymi bryhadami dy jechali ŭ Rasieju. Budzie i ŭviesnu toje samaje, kali z nas buduć tak ździekavacca!» — zajaviŭ Michaił.
Rabočyja kažuć, što pahroza vyjści z aficyjnaha prafsajuzu dziejničaje: administracyja nie tolki paabiacała spłacić usio, što treba, ale pahadziłasia taksama palepšyć situacyju z aciapleńniem i svoječasova vydavać śpiecvopratku.
Kamientary