Žycharam susiedniaj ź Niaznanava vioski vydali pradpisańni.
Całkam fotarepartaž ź Niaznanava hladzicie TUT.
Što nasamreč adbyłasia ŭ Niaznanavie, pakul zastajecca da kanca niajasnym. My prapanujem vam aficyjnuju viersiju padziejaŭ na Navahrudčynie, a taksama śviedčańni viaskoŭcaŭ i niepasrednych udzielnikaŭ mierapryjemstvaŭ.
Hruntujučysia na hetych źviestkach, my pasprabujem acanić dziejańni sanepidemstancyi zhodna z zaćvierdžanymi ŭ Biełarusi praviłami i narmatyŭnymi aktami.
Varta adznačyć taksama, što aficyjnaja viersija była ahučanaja tolki praź niekalki dzion, u pieršyja dni ŭłady nijak nie kamientavali i nie tłumačyli padziei ŭ Niaznanavie. Hetaja viersija istotna adroźnivajecca ad słovaŭ viaskoŭcaŭ.
Vučeńni z prymianieńniem efiektu niečakanaści
Zhodna z aficyjnaj viersijaj, «na terytoryi Navahrudskaha i Karelickaha rajonaŭ Hrodzienskaj vobłaści 16—18 lutaha 2012 hoda byli praviedzieny rehijanalnyja vučeńni ŭ režymie maksimalna nabližanaj da realnych umoŭ abstanoŭki, z prymianieńniem efiektu niečakanaści i adpracoŭkaj ŭsich kankretnych dziejańniaŭ i prafiłaktyčnych mierapryjemstvaŭ». Navahrudskija ŭłady zajaŭlajuć, što ź vioski Niaznanava zabrali kala dziasiatka asłablenych śviniej, a masavaha zabojstva žyvioły nie było.
Što mahło pasłužyć pryčynaj dla praviadzieńnia padobnych mierapryjemstvaŭ?
Takija vučeńni mahli być praviedzienyja ŭ ramkach realizacyi zaćvierdžanaha letaś Kompleksnaha płana mierapryjemstvaŭ pa papiaredžańni zanosu i raspaŭsiudu afrykanskaj čumy śviniej na terytoryju Biełarusi na 2011—2015 hh.
U lipieni minułaha hoda ŭ Minsku prajšoŭ mižnarodny sieminar pa prafiłaktycy AČS. Na im adznačałasia, što «asablivaja ŭvaha da papiaredžańnia zanosu i raspaŭsudu AČS abhruntavanaja tym, što ŭźniknieńnie hetaj chvaroby pahražaje charčovaj biaśpiecy, i stavić pad pahrozu ździajśnieńnie ekspartna-impartnych apieracyj».
Što kažuć viaskoŭcy
A ciapier źvierniemsia da śviedčańniaŭ viaskoŭcaŭ i asobaŭ, što prymali ŭdzieł u tych padziejach.
Pavodle miascovych, 16 lutaha ŭ viosku Niaznanava pryjechała vialikaja hrupa supracoŭnikaŭ sanepidemstancyi i milicyi. Milicyja arhanizavała ačapleńnie, a supracoŭniki sanepidemstancyi pačali chadzić pa padvorkach. Jany zabrali śviniej, zabili ich, vyvieźli ŭ les i spalili. Ludziam kazali, što ŭ vioscy vyjavili epidemiju čumy śviniej.
Pa słovach adnaho z udzielnikaŭ ačapleńnia, śviniej zabivali elektratokam. «Napeŭna, kab kryvi nie było».
Paźniej usim, u kaho zabrali śviniej, pačali vypłačvać kampiensacyju z raźliku 15 tysiač rubloŭ za 1 kh vahi.
U apošnija dni ŭ Niaznanavie pravodziłasia dezinfiekcyja padvorkaŭ i damoŭ.
Jak piša «Salidarnaść», u susiedniaj vioscy Radahošča žycharoŭ piśmova abaviazali nieadkładna paviedamlać pra vypadki zachvorvańniaŭ žyvioły na ŭłasnym padvorku, a taksama zabaranili ciaham dvuch tydniaŭ zabivać žyviołu i pradavać jaje žyvoj vahoj.
Zhodna praviłaŭ
Pracedura adabrańnia chvorych žyvioł z nastupnaj ich utylizacyjaj prapisanaja ŭ dakumiencie, zaćvierdžanym Kabinietam ministraŭ u 1995 h. Dakumient, jaki padpisaŭ Michaił Čyhir, nazyvajecca «Paradak adabrańnia chvorych žyvioł, praduktaŭ žyviolnaha pachodžańnia i pakryćcia škody jurydyčnym i fizičnym asobam pry likvidacyi ačaha zaraznych chvarob žyvioł». Aznajomicca ź im možna na sajcie Vieterynarnaj słužby Biełarusi ŭ raździele «Zakanadaŭstva» («Paradak adabrańnia chvorych žyvioł»).
U im havorycca, što pry likvidacyi ačahoŭ zaraznych chvarob žyvioł ažyćciaŭlajucca adabrańnie chvorych i padazravanych u zaražeńni žyvioł i praduktaŭ, atrymanych ad takich žyvioł, z nastupnym zabojem žyvioł, źniščeńniem, utylizacyjaj abo techničnaj pierapracoŭkaj ich abo pradukcyi, atrymanaj z hetych žyvioł. Kampiensacyja škody, naniesienaj jurydyčnym i fizičnym asobam adabrańniem žyvioł, vypłačvajecca ŭ adpaviednaści z zakupačnym cenam.
Cikavy momant — da ŭtylizacyi tušaŭ zabitych žyvioł prybiahajuć u vypadkach, kali dyjahnaz ich zachvorvańnia budzie vystaŭleny z dapamohaj vieterynarna-sanitarnaj ekśpiertyzy.
Taksama dakumient ahavorvaje ŭdzieł supracoŭnikaŭ milicyi ŭ padobnych mierapryjemstvach. Ich pry nieabchodnaści zaprašaje hałoŭny dziaržaŭny vieterynarny inśpiektar rajona (horada).
Jak bačym, niekatoryja punkty dakumienta supadajuć sa śviedčańniami viaskoŭcaŭ: śviniej zabrali, zabili i spalili; pry hetym prysutničała milicyja; haspadaram zabitaj žyvioły vypłacili kampiensacyju zhodna zakupačnych cenaŭ.
Ciapier źvierniemsia da Vieterynarna-sanitarnych praviłaŭ baraćby z afrykanskaj čumoj śviniej, zaćvierdžanych u 2009 h. Minsielhascharčam.
Tut havorycca, što ŭ arhanizacyjach, asabistych padsobnych haspadarkach hramadzian
pry padazreńni na AČS nieabchodna, siarod inšaha, pravieści nastupnyja mierapryjemstvy: arhanizavać zaboj (biaskroŭny) chvorych śvińniaŭ, zbor trupaŭ zahinuŭšych i zabitych śviniej u adpaviednaści z patrabavańniami pa źniščeńni trupaŭ žyvioł; advieści ŭ miežach terytoryi ŭčastak dla spalvańnia trupaŭ śviniej (dla arhanizacyj zakrytaha typu); spynić zaboj i realizacyju žyvioł i praduktaŭ ich zaboju; pravieści dezinfiekcyju miesca ŭtrymańnia i vyhułu chvoraj žyvioły, padvorkaŭ, prylehłych terytoryj.
Takim čynam, kali pavieryć słovam viaskoŭcaŭ i paraŭnać apisanyja imi dziejańni sanepidemstancyi z patrabavańniami adpaviednych praviłaŭ, možna dapuścić, što ŭ Niaznanavie pravodzilisia nie vučeńni, a abmiežavalnyja miery pry padazreńni na AČS.
Takaja viersija, uličvajučy ekanamičnyja ryzyki, častkova tłumačyć pavodziny ŭładaŭ.Kali heta tak, to my, mahčyma, majem spravu ź situacyjaj, kali majomasnyja intaresy nievialikaj hrupy hramadzian byli pryniesienyja ŭ achviaru intaresam dziaržaŭnym.
Ministerstva sielskaj haspadarki i charčavańnia, u pryvatnaści, aceńvaje mahčymuju škodu ad chvaroby ŭ dziasiatki miljonaŭ dalaraŭ.Ź inšaha boku, zamoŭčvańnie prablemy, jak pakazała praktyka, moža pryvieści da paničnych nastrojaŭ i naradžeńnia čutak. A sproby prychavać vieterynarnyja prablemy mohuć nanieści hihanckuju škodu reputacyi našaj dziaržavy.
Recha vučeńniaŭ u Niaznanavie
Jak paviedamiŭ «NN» u sieradu supracoŭnik sielskahaspadarčaha pradpryjemstva adnaho z rajonaŭ Brestčyny, u ichnim rehijonie vieterynarnyja słužby pryviedzienyja ŭ padvyšany stan hatoŭnaści. «U pieršuju čarhu inśpiektujuć bujnyja śvinakompleksy. U chutkim časie pačniecca pravierka pryvatnych haspadarak», — raskazaŭ jon.
Paźniej padobnaja infarmacyja pryjšła z Hrodzienskaj vobłaści. Tam miascovyja vieterynary nibyta pačali maštabnuju inśpiekcyju pryvatnych padvorkaŭ.
Była takaja infarmacyja i z adnaho z rajonaŭ Minskaj vobłaści, adnak supracoŭniki miascovaj sanepidemstancyi nie paćvierdzili jaje.