Top-5 skandałaŭ, źviazanych z BT 6

Telekanał «Biełaruś-1» (jon ža — Pieršy kanał, jon ža — BT) słavicca nie tolki štotydniovymi žurnalisckimi «rasśledavańniami», pryśviečanymi dziejnaści hramadzianskaj supolnaści. Vymova staršyniu Biełteleradyjokampanii Hienadziu Davydźku za sfalsifikavanyja vyniki konkursa «Jeŭrafest» - heta daloka nie pieršaja skandalnaja historyja, źviazanaja z «pieršaj knopkaj» krainy.

«Naša Niva» ŭzhadała samyja hučnyja skandały apošniaha času, u jakich było zamiašana BT.

1. Turemny termin Jahor Rybakova

11 lutaha 2005 hoda Viarchoŭny sud Biełarusi vynies žorstki prysud byłomu staršyniu Biełteleradyjokampanii Jahoru Rybakovu — 11 hadoŭ kałonii ŭzmocnienaha režyma z kanfiskacyjaj majomaści.

Śpis «zasłuhaŭ» televizijonščyka ŭnušalny — atrymańnie chabaru, admyvańnie materyjalnych kaštoŭnaściaŭ, nabytych niezakonnym šlacham, i vykarystańnie słužbovaha stanovišča.

Vychadziec z Navasibirska, jaki atrymaŭ u Mahilovie adukacyju nastaŭnika biełaruskaj movy i litaratury, musiŭ kampiensavać dziaržavie 212 miljonaŭ rubloŭ, a taksama pošlinu ŭ pamiery 21 miljona rubloŭ. Pa tahačasnym kursie heta składała bolš za $100 tysiač.

Adnak adsiadzieŭ Rybakoŭ nie uvieś termin. Roŭna praź piać hadoŭ, u

 lutym 2010 hoda jon apynuŭsia na svabodzie, pryčym jaho vyzvalili ŭmoŭna-daterminova.

Jak vyśvietliłasia, chadajnictva ab hetym napisaŭ tahačasny staršynia Biełteleradyjokampanii Alaksandr Zimoŭski.

2. Vymova Davydźku i niemetavaje vydatkoŭvańnie hrošaj

Historyja ź pierahladam vynikaŭ «Jeŭrabačańnia» admietnaja nie tolki tym, što kiraŭnik krainy ŭłasnaručna staŭ vyznačać pieramožcu konkursa. Mnohija źviarnuli ŭvahu na hnieŭnuju zajavu Łukašenki pra «miljardy rubloŭ, vydatkavanyja niezrazumieła na što». Pavodle infarmacyi naviny.by,

havorka viałasia pra nabytuju za 1,5 miljarda rubloŭ multymiedyjnuju płatformu, jakaja dazvalaje stvarać mastackija instalacyi ŭ 3D.

Pryčym novaja technika tak i nie była vykarystanaja padčas zdymkaŭ «Jeŭrafestu». I pry hetym, pa słovach Łukašenki, «žurnalisty skardziacca — zarpłatu nie płacicie, jak pałožana».

Jak pry hetym nie ŭzhadać historyju z domam dla supracoŭnikaŭ BT u Minsku pa $550 za kvadratny mietr?

Biełteleradyjokampanija zatrymlivała jaho ŭźviadzieńnie, dolščyki navat pahavorvali pra zamarožvańnie abjekta.

U vyniku budoŭlu daviałosia pieradać dziaržaŭnym upraŭleńniam kapitalnaha budaŭnictva.

3. Pieršy skandał z «Jeŭrafestam»

Śpiecyjalisty adździeła pa baraćbie z ekanamičnymi złačynstvami pryjšli na BT ŭ mai 2009 hoda nibyta pa skarzie ŭdzielnika «Jeŭrabačańnia» Piatra Jałfimava. Jany praviarali, nakolki metazhodna vydatkoŭvalisia hrošy padčas padrychtoŭki da muzyčnaha konkursa.

Śpiavak zajaviŭ, što chacieŭ by spytać u Alaksandra Łukašenki: «Dzie hrošy?»

Turemnymi terminami sprava nie skončyłasia, ale BT u cełym i Alaksandra Cichanoviča ŭ pryvatnaści adchilili ad praviadzieńnia adboru na «Jeŭrabačańnie». Hetaje prava było pieradadziena ANT, praŭda, nieŭzabavie «Jeŭrafest» znoŭ viarnuŭsia na Pieršy kanał.

4. Kraina biez futboła

U 2002 hodzie biełaruskija zaŭziatary ledź nie zastalisia biez hałoŭnaj futbolnaj padziei čatyrochhodździa — čempijanatu śvietu ŭ Japonii i Paŭdniovaj Karei. Usie papiarednija spabornictva takoha kštałtu na terytoryi Biełarusi pakazvali rasijskija kanały, tamu BT i nie zakuplała prava na pakaz. Ale mienavita ŭ 2002 hodzie situacyja źmianiłasia. Rasijcy zahadzia papiaredzili biełarusaŭ, što tranślavać futboł na terytoryi našaj krainy nie zmohuć pa patrabavańni pravaŭładalnika.

BT nie pavieryła: jak možna budzie adklučyć tranślacyju ŭ Biełarusi, nie adklučyŭšy zaadno Smalenskuju i Branskuju vobłaści?

Ale rasijcy zmahli. Karcinka ŭ našaj krainie nie źjaviłasia.

Matč-adkryćcio Francyja-Sieniehał BT pakazvała, skraŭšy karcinku ŭ «NTV-Plus» i zamazaŭšy łahatyp kanała.

Paśla taho, jak NTV vykazała pretenzii i pačało pahražać sudom, tranślacyi spyniłasia całkam. Darečy, u takoj samaj situacyi - biez futboła - byli jašče niekalki krainaŭ byłoha SSSR, a taksama ekzatyčnyja Vanuatu, Nauru i Filipiny.

Zaŭziatary praviali papieradžalny mitynh pratestu na płoščy Jakuba Kołasa ŭ Minsku, i praź niekalki dzion BT znajšło-taki hrošy, kab vykupić pravy na tranślacyju.

Cikava, što adnym z patrabavańniaŭ niamieckaj KirchMedia było kamientavańnie hulniaŭ pa-biełarusku.

5. Piracki kanał

Jašče adna «pirackaja» historyja adbyłasia roŭna hod tamu, u kancy lutaha 2011 hoda. Pieršy kanał vyrašyŭ zrabić padarunak svaim hledačam. Pierad tranślacyjaj cyrymonii ŭručeńnia premii «Oskar» televizijonščyki ŭklučyli film-pieramožcu papiaredniaha hoda, «Vaładar bury». Adnak

praz adsutnaść licenzijnaj stužki daviałosia pakazvać pirackuju kopiju z torentaŭ.

«U samy razhar ŭsiaho hetaha dziejstva cišyniu parušaje pryjemny ciopły žanočy hołas… Vy nie pavierycie, ź jakoj frazaj… — «Reliz padrychtavany śpiecyjalna dla interfilm.ru» — śmiajalisia błohiery-hledačy ŭ internecie.

Raźbiralnictva nakont parušeńnia aŭtarskich pravoŭ nie było praviedzienaje, tolki kankurenty z ANT u svaich humarystyčnych pieradačach pakpili ź Pieršaha kanała.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH