Valancin Stefanovič vypłaciŭ štraf, pryznačany jamu sudom
Pravaabaronca Valancin Stefanovič vypłaciŭ štraf, pryznačany jamu sudom Partyzanskaha rajona Minska.
«Siońnia ja pavinien źjavicca da sudovaha vykanaŭcy i prynieści kvitancyi, bo zakančvajecca hety siamidzionny termin, vyznačany mnie dla apłaty štrafu ŭ suviazi z pastanovaj ab raspačynańni ŭ dačynieńni da mianie vykanaŭčaj vytvorčaści. Ja štraf apłaciŭ jašče 2 sakavika. Pazyčyŭ hrošy, mnohija zhadzilisia mnie dapamahčy. Ja nie pavinien być uniesieny ni ŭ jakija śpisy nievyjaznych ź Biełarusi, tamu što dobraachvotna vykanaŭ abaviazacielstvy ab vypłacie štrafu», — zajaviŭ Stefanovič.
***
16 śniežnia 2011 hoda sud Partyzanskaha rajona pad staršynstvam Vieraniki Abramovič pastanaviŭ zadavolić isk inśpiekcyi Ministerstva pa padatkach i zborach pa Partyzanskim rajonie ab spahnańni sa Stefanoviča padachodnaha padatku, pieni i dziaržpošliny ŭ 57 młn. rubloŭ.
Pryčynaj isku stała toje, što, na dumku padatkovaj inśpiekcyi, Stefanovič pavinien byŭ płacić padachodny padatak z tych hrošaj, jakija pieraličvalisia roznymi arhanizacyjami na pravaabarončuju dziejnaść na jaho rachunak u litoŭskim banku.
Minski haradski sud 13 lutaha admoviŭ u zadavalnieńni kasacyjnaj skarhi pravaabaroncy.
Treba adznačyć, što infarmacyja ab zamiežnych bankaŭskich rachunkach jašče adnaho biełaruskaha pravaabaroncy, Alesia Bialackaha, pieradadzienaja ŭ Minsk pradstaŭnikami Litvy i Polščy, stała padstavaj dla jaho kryminalnaha pieraśledu. Bialacki pryznany vinavatym va ŭtojvańni dachodaŭ u asabliva bujnym pamiery i pryhavorany da čatyroch z pałovaj hadoŭ pazbaŭleńnia voli z kanfiskacyjaj majomaści. Potym ułady hetych krain prynieśli prabačeńni pravaabaroncu i jaho siamji.
Pradstaŭniki zamiežnaj i biełaruskaj demakratyčnaj hramadskaści rasceńvajuć sudy nad pravaabaroncami jak palityčna matyvavanyja.
Kamientary