A jak maješ hrošy, dyk dla ŭsich charošy :)
Biełaruskaje kiraŭnictva śmieła abiacaje prasoŭvać intaresy AAE ŭ Starym Śviecie. Miž tym adzin tolki čych emirackich bankiraŭ prymušaje eŭra padskokvać :) Piša u svaim błohu Alaksandar Kłaskoŭski.
Sietkavyja medyi zapiareścili zahałoŭkami kštałtu "Biełaruś hatovaja vyvieści AAE ŭ Eŭropu" dy "Łukašenka adkryje Eŭropu dla arabskich šejchaŭ".
Šturšok nia nadta hłybakadumnym žurnalisckim ekzersisam dała fraza vysokaha hościa ŭ Abu-Dabi: maŭlaŭ, hatovyja zrabić usio, kab Emiraty mahli aktyŭna prysutničać u Eŭropie.
Analityki lohka zhadajuć, što śmiełuju prapanovu zabiaśpiečyć akno ŭ Stary Śviet Miensk rabiŭ i kitajskim, i venesuelskim tavaryšam.
Praŭda, jakim čynam, nie rasšyfroŭvałasia.
Hałoŭnaje ž — ci vialikaja patreba ŭ takim pasiarednictvie?
Brusel i tak užo nia viedaje jak adbicca, naprykład, ad tannaha dy siardzitaha šyrspažyvu z Padniabiesnaj. Zrešty, jak i biełaruskija čynoŭniki: ajčynnaja lohkaja pramysłovaść chutka stanie lažačaj...
Čavesu Eŭropa sto hadoŭ patrebnaja. Jahonaje čornaje zołata naraschvat i na ŭłasnym kantyniencie. Stratehičny pradukt ściaŭšy zuby musiać kuplać navat zaklatyja vorahi janki.
Nu a šejchi daŭno napampavali Eŭropu svaimi investycyjami.
Bo jak maješ hrošy, dyk dla ŭsich charošy. Biez anijakaha pasiarednictva.
Zrešty, dakładniej kazać pra vulicu z dvuchbakovym rucham. Zamiežnyja biznesoŭcy, u svaju čarhu, ablubavali Emiraty za dzivosna spryjalny, łahodny klimat. U sensie — dla kapitałaŭ. AAE vyjšli na pieršaje miesca ŭ arabskim śviecie pavodle abjomu naŭprostavych zamiežnych investycyjaŭ.
Papiałuškaj na zadvorkach hetaha śviata žyćcia vyhladaje akurat naša siniavokaja...
Darečy, voś vam prykład taho, nakolki šejchi pieraborlivyja što da ŭkładańnia hrošaj. Pierš čym inviestavać u industryju zabaŭ u Krymie, uzialisia vyvučać "hnutkaść ziamielnaha zakanadaŭstva" dy patrabavać harantyjaŭ.
U vypadku ź Biełaruśsiu jany naŭrad ci buduć mieniej abačlivyja.
Va ŭsiakim razie, pieralik padpisanych siońnia u Emiratach dakumentaŭ nia ŭražvaje. Rucinnyja pahadnieńni: ab pavietranych znosinach, "ustalavańni pabracimskich suviaziaŭ pamiž stalicami"...
Tak što najbolej plonnym vizyt na Arabijskuju paŭvyspu moža akazacca dla BT. Sto pudoŭ ekzatyčnaha pijaru dla pensijaneraŭ z hłybinki!
P.S. Štrych da temy prysutnaści AAE u Starym Śviecie. Adzin tolki čych emirackich bankiraŭ prymušaje eŭra padskokvać!
Niešta nia ŭzhadvajecca, kab biržy Eŭropy hetak čujna reahavali na zajavy sp. Prakapoviča :)
Ciapier čytajuć
«Vitold kazaŭ: «Nu što vy, što vy…» A mianty paśla kryčali pra mora kryvi». Palitviazień z susiedniaj kamiery raskazaŭ pra śmierć Ašurka3
Kamientary