Lidaraŭ apazicyi zatrymali na miažy z Rasijaj

Čaćvier, 9.20

U adździaleńni milicyi na transparcie baćku Atroščankava znoŭ paćvierdzili, što sud pavinien adbycca siońnia, 29 sakavika. Ale nichto nie kaža pra dakładny čas sudovaha pasiadžeńnia.

Kala hanku aršanskaha haradskoha sudu znoŭ sabralisia niekalki aktyvistaŭ, jakija čakajuć, kali ž u sud pryviazuć Labiedźku, Kalakina i Atroščankava, piša Radyjo Svaboda.

16:25

Sud pieraniesieny 29 sakavika. Pra heta paviedamili baćku Alaksandra Atroščankava ŭ adździaleńni milicyi na transparcie.

13:16

Darja Korsak (žonka Atroščankava) praz Fejsbuk paviedamlaje: Atroščankaŭ napisaŭ, što ŭsie zatrymanyja znachodziacca ŭ izalatary časovaha ŭtrymańnia, što buduć tam da 16.00. «Mahčyma, kaniešnie, jaho dezinfarmavali», — napisała Korsak.

Uładzimir Čudziancoŭ u Fejsbuku paviedamlaje: Cudam datelefanavaŭsia da zatrymanaha ŭ Oršy Alaksandra Atroščankava (telefon u jaho pakul nie adabrali, prosta ŭsiu noč nie davali adkazvać). U hetyja chviliny ich usich viazuć u miascovy sud, pratakoły składzienyja pa art 17.1 («łajanka ŭ hramadskim miescy», jak zvyčajna). «Śviecić» da 15 sutak, piša Radyjo Svaboda.

11.10

Baćku Atroščankava paviedamili, što pasiadžeńnie budzie prachodzić u kabiniecie №13. Kabiniet maleńki, a achvotnych trapić na pasiadžeńnie kala dziasiatka. Tamu jany spadziajucca, što pad praces daduć sudovuju zału. Zatrymanych pakul nie pryvieźli. Spravu budzie razhladać sudździa Sierafimovič.

10:16

Jak paviedamiŭ baćka Alaksandra Atroščankava Siarhiej Atroščankaŭ, jaki ciapier znachodzicca ŭ Oršy, najbližejšym časam zatrymanych pavinny dastavić u sud Oršy i Aršanskaha rajona. «Ja tolki viedaju, što ich abvinavačvajuć u drobnym chulihanstvie. Mnie skazali, što sud pačniecca ŭ 10.45», — skazaŭ Siarhiej Atroščankaŭ. U sudzie taksama dziažurać naziralniki ad Abjadnanaj hramadzianskaj partyi i miascovyja pravaabaroncy.

Telefonnaja suviaź z zatrymanymi adsutničaje, paviedamlaje BiełaPAN.

10.00

Pakul zatrymanyja znachodziacca ŭ aršanskim izalatary časovaha ŭtrymańnia, što ŭ budynku milicyi na vulicy Enhielsa ŭ Oršy. Kala suda źbirajucca aršanskija demakratyčnyja aktyvisty. Pryjechaŭ baćka Alaksandra Atroščankava Siarhiej i niekalki jahonych znajomych. U pieraliku sudovych spravaŭ, pryznačanych da razhladu na siońnia, proźviščaŭ zatrymanych u ciahniku Minsk -- Maskva palitykaŭ niama, chto ich budzie sudzić — taksama nieviadoma, dadaje Radyjo Svaboda.

1.50

Alaksandr Atroščankaŭ, Siarhiej Kalakin i Anatol Labiedźka byli źniatyja ź ciahnika pa darozie ŭ Rasieju.

Heta pieršy raz, kali nievyjaznych apazycyjaneraŭ nie vypuskajuć praz biełaruska-rasiejskuju miažu.

Kaardynatar hramadzianskaj kampanii «Jeŭrapiejskaja Biełaruś», były palitviazień Alaksandr Atroščankaŭ u momant zatrymańnia paśpieŭ patelefanavać sajtu charter97.org, ale havaryć nie moh.

Na praciahu prykładna piaci chvilin žurnalisty čuli, jak jaho, lidara partyi «Spraviadlivy śviet» Siarhieja Kalakina i staršyniu Abjadnanaj hramadzianskaj partyi Anatola Labiedźki sprabavali vyvieści z kupe ciahnika.

Siarhiej Kalakin patrabavaŭ ad ludziej, što zatrymlivali jaho, pradstavicca, kazaŭ, što nie zhodny iści ź nieznajomymi ludźmi, bo ŭ Biełarusi ŭžo byli vypadki palityčnych vykradańniaŭ i zabojstvaŭ.

Urešcie, usich zatrymali i kudyści adviali.

Paźniej stała viadoma, što apazicyjanieraŭ źniali ź ciahnika № 2 Minsk-Maskva na stancyi Orša, i jany byli dastaŭleny ŭ Aršanski RAUS.

Usie ŭtroch 28 sakavika ŭ 22.05 mielisia vylecieć z Maskvy ŭ Brusel.

A 1.20 karespandentu radyjo «Svaboda» ŭdałosia dazvanicca da Anatola Labiedźki, jon adkazaŭ na zvanok, ale ničoha tak i nie zdoleŭ skazać. Kar. tolki čuŭ dychańnie Anatola i hołas niejkaha słužboŭca, jaki, jak vyhladaje, začytvaŭ niejkija dakumienty.

A 1.30 Anatol Labiedźka znoŭ adkazaŭ na zvanok i zdoleŭ skazać niekalki słovaŭ. Na pytańnie, na jakoj padstavie ich zatrymali,

lidar AHP paviedamiŭ, što u momant zatrymańnia kazali, što šukajuć narkotyki, a ciapier «šyjuć» administratyŭnuju spravu.

Praciah budzie.

• 0
• 0
• 0
• 0
• 0
• 0
• 0
• 0