Biełaruś budzie ažyćciaŭlać pastaŭki suchoha małaka ŭ Rasiju ŭ minimalnym abjomie

Biełaruś pa damoŭlenaści z RF z 1 krasavika 2012 hoda daviadzie da minimumu pastaŭki celnaha suchoha małaka i suchoj małočnaj syrovatki na rasijski rynak, jany buduć adnoŭleny pa ŭzajemnaj uzhodnienaści bakoŭ.

Heta miera ŭvodzicca ŭ pačatku tak zvanaha pieryjadu «vialikaha małaka», kali ŭ Rasii nazirajecca siezonny rost vytvorčaści hetaj pradukcyi.

U pačatku sakavika Minsielhascharč Biełarusi i Minsielhas RF paviedamili, što «z pačatku druhoha kvartała ŭ adpaviednaści z bałansami na małako i małakapradukty buduć prypynieny pastaŭki celnaha suchoha małaka i suchoj małočnaj syrovatki ź Biełarusi ŭ Rasiju». Paźniej kiraŭnik Minsielhasa RF Alena Skryńnik udakładniła, što z 1 krasavika pastaŭki hetych praduktaŭ ź Biełarusi buduć daviedzieny da minimumu.

Pryčym razmova nie idzie ab skaračeńni ahulnaha abjomu pastavak małočnaj pradukcyi ź Biełarusi ŭ Rasiju, patłumačyŭ ahienctvu «Prajm» staršynia praŭleńnia Nacyjanalnaha sajuza vytvorcaŭ małaka («Sajuzmałako») Andrej Danilenka. «Z-za taho što RF sioleta samastojna poŭnaściu zabiaśpiečvaje siabie ŭ celnym suchim małace i suchoj małočnaj syrovatcy, to, adpaviedna, u pieryjad „vialikaha małaka“ abjom pastavak hetaj pradukcyi budzie skaročany. Adnak moža być pavialičany abjom pastavak inšych vidaŭ małočnaj pradukcyi, a mienavita kancentravanaha małaka, celnamałočnaj pradukcyi i syroŭ», — skazaŭ Danilenka.

Kali abjomy pastavak hetych dvuch praduktaŭ znoŭ buduć pavialičany, zaležyć ad raźvićcia situacyi ŭ druhim i trecim kvartałach, jakija tradycyjna źjaŭlajucca «samymi napružanymi», dadaŭ jon.

Usiaho ŭ miežach prahnoznaha bałansu ź Biełarusi ŭ Rasiju ŭ 2012 hodzie płanujecca pastavić małočnaj pradukcyi ŭ ekvivalencie 3,7 młn. ton syroha małaka.

Aprača taho, jak paviedamlałasia ŭ pačatku sakavika, biełaruski bok uziaŭ na siabie abaviazacielstvy nie źnižać rekamiendavanyja bazavyja ceny na małočnyja pradukty dla rasijskaha rynku da kanca 2012 hoda.

Jak raniej paviedamlaŭ BiełaPAN, rasijski Nacyjanalny sajuz vytvorcaŭ małaka («Sajuzmałako») 20 lutaha apublikavaŭ adkryty list kiraŭniku Minsielhasa RF Alenie Skryńnik i ministru sielskaj haspadarki i charčavańnia Biełarusi Michaiłu Rusamu z prośbaj nieadkładna pačać rehulavańnie ŭzajemadziejańnia dźviuch krain na małočnym rynku.

«Sajuzmałako» prainfarmavaŭ, što cana na syroje małako ŭ Biełarusi nižejšaja i rekamiendavanyja Minsielhascharčam Biełarusi ceny dla rasijskaha rynku źjaŭlajucca «zhubnymi». Aprača taho, sajuz zafiksavaŭ vypadki pastavak u RF biełaruskaj małočnaj pradukcyi pa cenach, nižejšych za indykatyŭnyja, u vyniku čaho rasijski rynak atrymlivaje śmietankovaje masła i suchoje małako pa cenach, nižejšych, čym u rasijskich vytvorcaŭ.

• 0
• 0
• 0
• 0
• 0
• 0