Adpaviedna, usio, što nie ŭvajšło ŭ hety śpis, buduć pradavać tolki pa recepcie. Praŭda, žorstka kantralavać apteki pačnuć z 1 lipienia.
U śpis biezrecepturnych uvajšli najpraściejšyja abiazbolvalnyja, Supraćprastudnyja, preparaty, jakija prymajuć padčas niastraŭnaści, antysieptyki i h.d. A voś, naprykład, leki ad hipiertanii i kantraceptyvy možna budzie kupić tolki z receptam.
Z 1 lipienia pačnie dziejničać i 300-ja pastanova ministerstva. Pavodle jaje, recepty pacyjentam budzie dazvolena vypisvać i daktaram «chutkaj» u pieryjad epidemij.
— Recept zmoža vypisać tolki doktar-śpiecyjalist, — raskazali ŭ haradskoj stancyi chutkaj miedycynskaj dapamohi. — Bryhady ŭ nas u asnoŭnym fielčarskija. Sa 150 bryhad śpiecyjalistami ŭkamplektavana tolki 20 — piedyjatrami i psichijatrami. Možna vykazać zdahadku, što ŭ hetyja pieryjady budzie šmat skarhaŭ: čałaviek vyklikaje «chutkuju», taja pryjazdžaje, pacyjent patrabuje vypisać jamu recept, ale bryhada nie moža hetaha zrabić, kali ŭ jaje składzie niama doktara-śpiecyjalista. Mahčyma, niekatoryja pacyjenty pačnuć vyklikać «chutkuju» zamiest doktara z palikliniki.
Kožny miesiac daviadziecca chadzić pa recept na kantraceptyvy?
— Kožny miesiac chadzić pa recept nie treba, — kaža akušerka-hiniekołah Alena Nikałajeva. — Recept na kantracepcyju — nie błank strohaj spravazdačnaści (heta značyć u nastupnym miesiacy vy zmožacie kupić novuju ŭpakoŭku lekaŭ pa hetym ža recepcie. — Red.). Adnak kantraceptyvy pravakujuć padvyšeńnie zhusalnaści kryvi, a heta ryzyka infarktu, insultu. Kantralavać zhusalnaść treba raz na piać miesiacaŭ, zdajučy peŭnyja analizy. Nie mahu skazać, što lišnija papierki — heta dobra. Ale vielmi mnohija žančyny, pasprabavaŭšy niejki supraćzačatkavy srodak, prymajuć jaho bieskantrolna ŭsio žyćcio.
