Pierajezd pradprymalnikaŭ Červieńskaha rynku na novaje miesca pačniecca ŭ červieni

Pra heta paviedamiŭ na pres-kanfierencyi ŭ Minsku 19 krasavika staršynia Minskaha staličnaha sajuza pradprymalnikaŭ i rabotadaŭcaŭ Uładzimir Karahin.

Pavodle jaho słoŭ, letaś pamiž biźnies-sajuzami i staličnymi ŭładami byli dasiahnutyja damoŭlenaści ab pieranosie rynku. Minski staličny sajuz pradprymalnikaŭ i rabotadaŭcaŭ, Biełaruski sajuz pradprymalnikaŭ i Respublikanskaja kanfiederacyja pradprymalnictva ŭziali na siabie abaviazak pa stvareńni novaj placoŭki dla pieranosu Červieńskaha rynku, a horad — pa davańni biźnies-sajuzam ziamli jak dla novaha rynku, hetak i budaŭnictva biźnies-centra dla biźnies-sajuzaŭ.

«Biźnies-sajuzy ŭsio žyćcio źjaŭlajucca arandatarami. I, viadoma, my byli zacikaŭlenyja hetuju situacyju źmianić. Z budaŭnictvam biźnies-centra heta pytańnie adpadzie», — zaznačyŭ Karahin.

Novy Červieński rynak raźmieścicca na miescy byłoha razvarotnaha tralejbusnaha kalca na pierasiačeńni vuł. Majakoŭskaha i zavułka Majakoŭskaha. Niedaloka budzie pabudavany i biźnies-centr.

Dla realizacyi hetaha prajekta BSP, RKP i MSSPiR jašče letaś stvaryli sumiesnaje pradpryjemstva. Pamiž pradpryjemstvam i Minharvykankamam byŭ padpisany inviestycyjny dahavor ab pieranosie Červieńskaha rynku i budaŭnictvie hramadska-handlovaha centra.

Jak zaznačyŭ Karahin, ahulny košt prajekta bolš jak 8 młn. dołaraŭ. «Dakładnuju sumu nazvać ciažka. Z samaha pačatku na budaŭnictva placoŭki budučaha rynku, naprykład, praduhledžvałasia vydzielić 500 tys. dołaraŭ. U vyniku zatraty skłali 1,7 młn.», — skazaŭ jon.

Pavodle słoŭ kiraŭnika MSSPiR, finansavańnie prajekta viadziecca za košt ułasnych srodkaŭ členaŭ biźnies-sajuzaŭ i pryciahnutych zamiežnych inviestycyj. «Hrošy ŭžo pastupajuć adpaviednymi tranšami, ale paźniej inviestaru buduć u poŭnym abjomie viernutyja jaho zatraty», — zajaviŭ Karahin. Jon padkreśliŭ, što prajekt akupny. Jaho stopracentnymi ŭłaśnikami buduć biełarusy.

Pavodle słoŭ Karahina, zakazčykam udałosia zrabić bolš tannym košt prajekta dziakujučy pryciahnieńniu da jaho realizacyi kampanij — členaŭ biźnies-sajuzaŭ. «U nas jość svaje śpiecyjalisty pa ŭsich kirunkach: prajekciroŭščyki, budaŭniki, vytvorcy budmateryjałaŭ», — padkreśliŭ jon, zaznačyŭšy, što biźnies-sajuzy, u adroźnieńnie ad inšych rynkaŭ, nie pryciahvali na realizacyju prajekta srodki pradprymalnikaŭ.

Da 1 červienia terytoryja rynku pavinna być hatova dla pierajezdu IP. Pavodle słoŭ Karahina, žadańnie pracavać na novym miescy vykazali prykładna 700 pradprymalnikaŭ Červieńskaha rynku. Arendadaŭcy paabiacali, što staŭki arendy dla IP buduć nie vyšejšyja, čym na inšych rynkach. Uvieś prajekt raźličany na 2–2,5 hoda.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH