«Čarnobylski šlach» pad zuboŭny skryhat uładaŭ

Hałoŭnaj temaj «Čarnobylskaha šlachu» sioleta stała patrabavańnie admieny budaŭnictva Astravieckaj AES i vyzvaleńnia palitviaźniaŭ.

20:49

Dzianis Sadoŭski skazaŭ, što mitynh skončany. Prapanavaŭ ludziam ci razychodzicca, ci razam z palitykami iści da Čarnobylskaj kaplicy, kab zapalić źničy i ŭskłaści kvietki. Častka razychodzicca, častka idzie da kaplicy.

20:40

Vystupaje Mikałaj Ułasievič z Astraŭca (incyjatyva «Astravieckaja — heta złačynstva»), jon paviedamiŭ, što paŭhadziny tamu ŭ jaho doma ŭ Astraŭcy byŭ pieratrus, a sam Ułasievič byŭ ź Labiedźkam padčas vizitu taho ŭ Astraviecki rajon. «My pavinny skazać nie AES, u rasijskim varyjancie AES nie vyrašyć prablemu», — miarkuje Ułasievič.

Na scenu padnialisia milicyjanty ŭ formie, padyšli da sustaršyni BCHD Dzianisa Sadoŭskaha i prosiać skančać mitynh, bo vyjšaŭ čas. Sadoŭski kaža, što zaraz budzie pramaŭlać apošni vystupoŭca.

Nina Jermalinskaja zaznačaje padčas vystupu, što ŭ nas nie tolki ekałahičnyja prablemy, ale i palityčnyja, u turmach siadziać paliitviaźni.

20:34

Pačali zapuskać u nieba biełyja lichtaryki. Paśla vystupu Dziemidzienki da sceny padyšli čałaviek vosiem u cyvilnym. Potym supracoŭniki ŭ cyvilnym pravodziać Dziemidzienku da mietro i spuściacca ź im pad ziamlu.

20:33

Vyjšaŭ Mikoła Dziemidzienka ad MF i skazaŭ, što jaho paplečniki dumali doŭha nad łozunham dla akcyi, potym močŭki razharnuŭ łozunh «Saša, ty durak?»

20:25

Lidar BNF Alaksiej Janukievič źviarnuŭ uvahu na toje, što ŭ Biełarusi nikoli nie było nacyjanalnaj ułady — ni i 1986-m, kali vybuchnuŭ Čarnobyl i radyjacyjnyja abłoki «asadžvali» na Biełaruś, ni ciapier, kali ŭłady zamoŭčvajuć nastupstvy Čarnobylskaj katastrofy i źbirajucca budavać novuju AES.

20:23

Vystupaje Taćciana Novikava (Ekadom), jana kaža, što dobra, pryjšło šmat ludziej na Šlach, jana źviarnuła ŭvahu na toje, što dziaržava praciahvaje zamoŭčvać trahiedyju, skazała pra ludziej, što praciahvajuć pamirać ad chvarobaŭ, źviazanych z Čarnobylem.

Pa słovach Taćciany Novikavaj, dziaržava pakazała svajo staŭleńnie da prablem Čarnobyla tym, što zabrała hukaŭzmacnialnuju aparaturu.

Jana taksama zajaviła, što dziaržava naviazvaje budaŭnictva AES — heta afiora, jakaja možea paciahnuć za saboj šmat achviaraŭ.

Pavodle BiełaPAN, pierad mitynham byli zatrymanyja pradstaŭniki rasijskaha «Jabłyka», što brali ŭdzieł u akcyi. Jak paviedamiŭ BiełaPAN adzin ź vidavočcaŭ, na prypynku hramadskaha transpartu da ich padjechaŭ mikraaŭtobus z zaciemnienym škłom biez numaroŭ. Ź jaho vyskačyli ludzi ŭ cyvilnym i zaciahnuli ŭnutr niekalki čałaviek.

20:21

Pačaŭsia mitynh. Słova ŭziaŭ Juryj Chadyka. Jon vybačyŭsia za toje, što znoŭ nie prapuścili hukaŭzmacnialnuju aparaturu, prapanavaŭ ušanavać prafiesara Nieściarenku, jakim pieršym prybieh u 1986-m u budynak KPB i skazaŭ pra katastrofu, a taksama zahinułaha prafiesara Ivana Nikitčanku.

Ciapier — chvilina maŭčańnia.

19:53

Hałava kałony dajšła da parku Družby narodaŭ, jaki ačepleny mietaličnymi turnikietami. Praź ich buduć prapuskać ludziej.

Źmicier Kaśpiarovič sprabavaŭ pranieści raściažku «Nie — AES», jaje adabrali i vykinuli ŭ śmietnicu. Takaja svaboda vykazvańnia dumak.

19:30

Kałona dajšła da vulicy Kujbyšava. Hukajuć «Žyvie Biełaruś», «Svabodu palitviaźniam». Pakul usio spakojna.

19.08

Kałona dajšła da Jakuba Kołasa. Šmat ściahoŭ, raściažak. Traplajucca i humarystyčnyja: naprykład, «Vyjšaŭ baćka ŭ hryby» z vyjavaj jadziernaha «hryba».

19:00

Mašyny, što jeduć Surhanava, sihnalać, a ludzi ŭ cyvilnym zdymajuć na kamieru numary hetych mašyn.

18:51

Pastajanna ŭzdoŭž šeścia spyniajucca mašyny biez numaroŭ, adkul vychodziać asoby ŭ cyvilnym.

Źjavilisia pradstaŭniki ruchu seks-mianšyniaŭ, jakija ŭźniali svaje ściahi.

18:48

Padjechała mašynka z rekłamkaj vokan «Vieka» — ale zaviešanyja rekłamki i telefony, a ŭ mašynie siadziać milicyjanty.

18:42

DAIšniki pierakryli ruch na praśpiekcie, dajuć prajści kałonie na vulicu Surhanava. Źjaviŭsia Andrej Dźmitryjeŭ («Havary praŭdu»), kiraŭnik štaba Mikałaja Statkieviča — Siarhiej Marcaleŭ.

Ciapier kałona mocna raściahnułasia, u šeści ŭdzielničaje kala 1,5–2 tys. čałaviek.

Udzielniki šeścia pa čarzie kryčać «Svabodu Kavalenku», «Svabodu Bialackamu», «Svabodu Statkieviču», «Žyvie Biełaruś».

Źjaviłasia hrupka ludziej u čyrvona-žoŭtych maskach.

Na Surhanava zaŭvažanyja try mikraaŭtobusy biez numarnych znakaŭ z uklučanaj avaryjnaj sihnalizacyjaj.

18:30

Šeście ŭznačalvajuć Alaksiej Janukievič i Ryhor Kastusioŭ, jany niasuć abraz «Maci Božaj Čarnobylskaj».

18:28

Pačałosia šeście, ludzi vychodziać za turnikiety. Udzielničaje niekalki socień čałaviek (500–800). «Jeŭrapiejskaja Biełaruś» hukała «Žyvie Biełaruś», «Maładaja Biełaruś» skanduje «Nie — AES u Biełarusi».

18:25

Pryjšli staršynia Partyi BNF Alaksiej Janukievič i jaho namieśnik, eks-kandydat u prezidenty Ryhor Kastusioŭ: jany prynieśli abraz «Maci Božaj Čarnobylskaj» Alaksieja Maračkina.

BCHD prapanuje zapisvacca ŭ jaje partyju.

Vizualna najbolš ściahoŭ kampanii «Havary praŭdu».

Ciahniki na stancyi mietro «Akademija navuk» nie spyniajucca. Taki padarunak ludziam ad uładaŭ.

18:10

Prynieśli Čarnobylski zvon, pieryjadyčna bjuć u jaho. Ludzi čakajuć pačatku šeścia.

18:09

Rasijski «Jabłyk» uźniaŭ raściažku «Niet — AES», «Maładaja Biełaruś» uźniała raściažku «Čarnobyl — naš bol», maładafrontaŭcy stajać u reśpiratarach, trymajuć raściažku svajoj arhanizacyi. Idzie zapis u kampaniju bajkotu parłamienckich vybaraŭ.

Vielmi strakataja publika sabrałasia, kali mierkavać pa ściahach hramadskich arhanizacyj: ściahi «Havary praŭdu», «Jeŭrapiejskaj Biełarusi», BCHD, «Maładoj Biełarusi», nacyjanalnyja ściahi dy inš.

Ludziej zaŭvažna pakul mieniej, čym na Dzień Voli.

Pryjšli palityki Siarhiej Kalakin i Viktar Karniajenka.

18:02

Uźniali ściahi «Havary praŭdu», pryjšli były palitviazień Źmicier Bandarenka z žonkaj Volhaj, piśmieńniki Hienadź Buraŭkin, Słavamir Adamovič.

Udzielniki zboru ŭźniali raściažku «Mirnym atam nie byvaje».

Ludziej bolšaje. Zaraz pierad budynkam Prezidyuma Akademii navuk — kala 200 čałaviek.

17:57

Źjavilisia try ściahi rasijskaha ruchu «Jabłyk», uźniali ściahi «Maładaja Biełaruś», «Jeŭrapiejskaja Biełaruś». Pryjšli staršynia TBM Aleh Trusaŭ, deputat Viarchoŭnaha Savieta 12-ha sklikańnia Lavon Dziejka, piśmieńnik Siarhiej Zakońnikaŭ, eks-kandydat u prezidenty Vital Rymašeŭski.

Milicyja papiaredžvaje, kab adychodzili ad mietro: maŭlaŭ, zaraz budzie hadzina pik, kab nie stvarali prablem z rucham.

17:52

Kala budynka Akademii navuk zaraz sabrałasia kala 80–100 čałaviek, stajać turnikiety.

Pryjšli sustaršynia arhkamiiteta Juryj Chadyka, hramadski aktyvist Artur Fińkievič. Taho, chto prachodzić aharodžy, zdymajuć na videa. Uźniatyja dva bieł-čyrvona-biełyja ściahi.

17:45

Jeŭraradyjo paviedamlaje, što ŭ Breście zatrymali aktyvistaŭ «Havary praŭdu» Marata Nieściarenku i Alesia Achmača. Jany raspaŭsiudžvali infarmacyju z nahody 26-ch uhodkaŭ avaryi na ČAES. Na tumbach u centry horada rasklejvali tekstavyja materyjały z nadpisam «Ad Astraŭca da Čarnobyla adzin krok».

17:07

Kala budynka prezidyuma Akademii navuk pačali aharodžvać placoŭku. Na parkoŭcy — z paŭdziasiatka mašyn z tanavanym škłom, biez numarnych znakaŭ, mašyna sapiorna-piratechničnaj słužby, a taksama mašyna z hukaŭzmacnialnaj technikaj.

Radyjo Svaboda paviedamlaje, što zatrymany hramadski aktyvist z Asipovič Ihar Simbiroŭ. Pry zatrymańni supracoŭniki milicyi ŭžyli siłu. Simbiroŭ jechaŭ na «Čarnobylski šlach» u Minsk. Paźniej sudździa Natalla Pratasavickaja asudziła jaho na 10 sutak. Razhlad administracyjnaj spravy doŭžyŭsia 10 chvilin.

* * *

Pačatak zboru ŭdzielnikaŭ zapłanavany na 18.00. Šeście rušyć praz paŭhadziny, u 18:30. Iści demanstranty buduć vulicaj Surhanava da Čarnobylskaj kaplicy da parka Družby narodaŭ, tam i adbudziecca žałobny mitynh.

Hałoŭnaj temaj «Čarnobylskaha šlacha» sioleta stanie patrabavańnie admieny budaŭnictva Astravieckaj AES.

Siońnia A. Łukašenka zajaviŭ, što MAHATE nie maje da Biełarusi pytańniaŭ pa biaśpiecy i technałohijach budaŭnictva AES. «My biarom samyja pieradavyja technałohii u rasijan, takich stancyj užo niamała pabudavana pa ŭsim śviecie Rasijaj. Heta samy vysoki ŭzrovień abaronienaści i biaśpieki stancyi», — adznačyŭ jon. Łukašenka dadaŭ, što budaŭnictva AES užo viadziecca.

«Tamu atamnaj stancyi ŭ Biełarusi być, i my jaje pabudujem, chto b ni kryčaŭ, pa mižnarodnych standartach», — skazaŭ jon.

«Palityka vyznačana, i ja dakładna prytrymlivajusia hetaj palityki. My tut haspadary na hetaj ziamli i my budziem vyznačać, dzie budavać i što budavać», — zajaviŭ Łukašenka, kamiencirujučy vykazvańni ab tym, što niejkija jeŭrapiejskija siły mohuć prymusić Biełaruś prypynić budaŭnictva AES. «Nakont niejkich jeŭrapiejskich sił, jakija sprabujuć nas nachilić nie pieršy hod i prymusić nas rabić tak, jak jany chočuć, a nie tak, jak my chočam žyć, vy ŭžo viedajecie ab hetych vynikach», — adznačyŭ jon.

Minharvykankam pieraškod arhanizataram čynić nie staŭ, jak i z Dniom Voli, usie punkty zajaŭnikaŭ byli zadavolenyja. Praŭda, pierad akcyjaj prajšli zatrymańni maładafrontaŭcaŭ. Na 10 sutak asudžanaja Nasta Šulejka, na Akreścina Pavieł Siarhiej. U Kasi Halickaj doma prajšoŭ pieratrus. Vidać, začapili maładafrontaŭskija dematyvatary na Dzień Voli. «Čarnobylski šlach» pravodzicca štohod ad 1988.

«NN» viadzie tradycyjny anłajn-repartaž.

• 0
• 0
• 0
• 0
• 0
• 0
• 0
• 0