Junaka — hieroja skandalnaha videa, źniataha 1 maja ŭ Kalinkavičach, vypisali sa špitala

Hladzicie jašče: Kalinkavicki RAUS: Pry zatrymańni šyi nikomu nie złamali.

Žachlivaje videa źjaviłasia ŭ sacyjalnaj sietcy «UKantakcie» paśla śviatkavańnia ŭ Kalinkavičach (Homielskaja vobłaść) 1 Maja. Na vačach haradžanaŭ supracoŭniki milicyi ŭtknuli akryvaŭleny tvar maładoha čałavieka ŭ tratuar. Paviedamlałasia, što maładoha čałavieka dastavili paśla «sustrečy» z vartavymi paradku ŭ rajonnuju balnicu ź pierałomam šyi i źniaviečanym tvaram.

U Kalinkavickaj rajonnaj balnicy paviedamili, što 17-hadovaha junaka 3 maja vypisali z chirurhičnaha adździaleńnia na ambułatornaje lačeńnie. U balnicy jon znachodziŭsia kala dvuch sutak. Pierałomaŭ šyi, skivicy ci padjazyčnaj kostki ŭ jaho nie vyjaŭlena. «Na ambułatornaje lačeńnie, tamu što stamatołahi vyklučyli pierałom — dvojčy hladzieli. Łor-uračy taksama patałohii nie znajšli. Nie vyjaviŭ i nieŭrołah čerapna-mazhavoj traŭmy. U jaho ŭdary i siniaki — na tvary, na šyi. Tamu i vypisali na ambułatornaje lačeńnie», — skazali ŭ balnicy.

Vykanaŭca abaviazkaŭ načalnika kalinkavickaj milicyi Alaksandr Sivak adznačyŭ, što supracoŭniki milicyi vymušany byli prymianić siłu. «Pamiž maładymi ludźmi zaviazałasia bojka. Z metaj spynieńnia parušeńnia hramadskaha paradku da adnaho ź ich prymieniena fizičnaja siła. Heta była achova hramadskaha paradku 1 maja. A jak, pa-vašamu, niachaj by bojka praciahvałasia i zaviazałasia masavaja bojka?» — skazaŭ jon.

Pavodle słoŭ Sivaka, 17-hadovy junak nakiravany na sudova-miedycynskuju ekśpiertyzu. U dačynieńni da jaho, a taksama da supracoŭnikaŭ milicyi, jakija prymianili siłu, viadziecca pravierka. «U dačynieńni da junaka budzie prymacca rašeńnie na padstavie Administracyjnaha kodeksa. Jon niepaŭnaletni. Padčas miedycynskaha ahladu stała viadoma, što jon byŭ u stanie ałkaholnaha apjanieńnia. Aprača taho, nie padparadkavaŭsia supracoŭniku milicyi. I nakont jaho zatrymańnia materyjał znachodzicca ŭ Śledčym kamitecie — u dačynieńni da supracoŭnikaŭ milicyi. Śledčy kamitet praviaraje pravamiernaść prymianieńnia fizičnaj siły z boku milicyi, my — u dačynieńni da niepaŭnaletniaha ŭ administracyjnym paradku».

4 maja videa i paviedamleńnie ŭ internecie z Kalinkavičaŭ prakamientavaŭ na pres-kanfierencyi i pieršy namieśnik načalnika ŭpraŭleńnia achovy pravaparadku i prafiłaktyki MUS Biełarusi Ivan Kurbakoŭ. Jon zajaviŭ, što kanflikt pamiž dźviuma kampanijami adbyŭsia pa-za miescam praviadzieńnia pieršamajskich mierapryjemstvaŭ. U adnoj ź ich i byŭ pjany niepaŭnaletni chłopiec ź dziaŭčynaj. Mienavita dziaŭčyna vyklikała milicyju i vykłała paśla videa ŭ internecie. Kurbakoŭ nie vyklučyŭ mahčymaści raspačynańnia ŭ dačynieńni da junaka kryminalnaj spravy za supraciŭleńnie supracoŭnikam milicyi i chulihanstva.

• 0
• 0
• 0
• 0
• 0
• 0
• 0
• 0