Юнака — героя скандальнага відэа, знятага 1 мая ў Калінкавічах, выпісалі са шпіталя

Глядзіце яшчэ: Калінкавіцкі РАУС: Пры затрыманні шыі нікому не зламалі.

Жахлівае відэа з'явілася ў сацыяльнай сетцы «УКантакце» пасля святкавання ў Калінкавічах (Гомельская вобласць) 1 Мая. На вачах гараджанаў супрацоўнікі міліцыі ўткнулі акрываўлены твар маладога чалавека ў тратуар. Паведамлялася, што маладога чалавека даставілі пасля «сустрэчы» з вартавымі парадку ў раённую бальніцу з пераломам шыі і знявечаным тварам.

У Калінкавіцкай раённай бальніцы паведамілі, што 17-гадовага юнака 3 мая выпісалі з хірургічнага аддзялення на амбулаторнае лячэнне. У бальніцы ён знаходзіўся каля двух сутак. Пераломаў шыі, сківіцы ці пад'язычнай косткі ў яго не выяўлена. «На амбулаторнае лячэнне, таму што стаматолагі выключылі пералом — двойчы глядзелі. Лор-урачы таксама паталогіі не знайшлі. Не выявіў і неўролаг чэрапна-мазгавой траўмы. У яго ўдары і сінякі — на твары, на шыі. Таму і выпісалі на амбулаторнае лячэнне», — сказалі ў бальніцы.

Выканаўца абавязкаў начальніка калінкавіцкай міліцыі Аляксандр Сівак адзначыў, што супрацоўнікі міліцыі вымушаны былі прымяніць сілу. «Паміж маладымі людзьмі завязалася бойка. З мэтай спынення парушэння грамадскага парадку да аднаго з іх прыменена фізічная сіла. Гэта была ахова грамадскага парадку 1 мая. А як, па-вашаму, няхай бы бойка працягвалася і завязалася масавая бойка?» — сказаў ён.

Паводле слоў Сівака, 17-гадовы юнак накіраваны на судова-медыцынскую экспертызу. У дачыненні да яго, а таксама да супрацоўнікаў міліцыі, якія прымянілі сілу, вядзецца праверка. «У дачыненні да юнака будзе прымацца рашэнне на падставе Адміністрацыйнага кодэкса. Ён непаўналетні. Падчас медыцынскага агляду стала вядома, што ён быў у стане алкагольнага ап'янення. Апрача таго, не падпарадкаваўся супрацоўніку міліцыі. І наконт яго затрымання матэрыял знаходзіцца ў Следчым камітэце — у дачыненні да супрацоўнікаў міліцыі. Следчы камітэт правярае правамернасць прымянення фізічнай сілы з боку міліцыі, мы — у дачыненні да непаўналетняга ў адміністрацыйным парадку».

4 мая відэа і паведамленне ў інтэрнэце з Калінкавічаў пракаментаваў на прэс-канферэнцыі і першы намеснік начальніка ўпраўлення аховы правапарадку і прафілактыкі МУС Беларусі Іван Курбакоў. Ён заявіў, што канфлікт паміж дзвюма кампаніямі адбыўся па-за месцам правядзення першамайскіх мерапрыемстваў. У адной з іх і быў п'яны непаўналетні хлопец з дзяўчынай. Менавіта дзяўчына выклікала міліцыю і выклала пасля відэа ў інтэрнэце. Курбакоў не выключыў магчымасці распачынання ў дачыненні да юнака крымінальнай справы за супраціўленне супрацоўнікам міліцыі і хуліганства.

• 0
• 0
• 0
• 0
• 0
• 0
• 0
• 0