Čamu źnikaje Łukašenka?

Kudy źnik Łukašenka? «Kiraŭnik dziaržavy znachodzicca ŭ svajoj rezidencyi ŭ Minsku, prymaje čynoŭnikaŭ z dakładami, pracuje z dakumentami. Usio ŭ zvyčajnym režymie», — paviedamiŭ u paniadziełak BiełaPAN kiraŭnik presavaj słužby prezydenta Pavał Lohki.

Vyraz «pracavać z dakumentami» ŭ svoj čas uvioŭ u rasiejski palityčny leksykon pres-sakratar Barysa Jelcyna. Hetak havaryłasia, kali rasiejski prezydent byŭ niedziejazdolny.

Apošnimi dniami ŭ interniecie źjavilisia čutki ab tym, što A.Łukašenka daŭno nie źjaŭlajecca na publicy praz prablemy sa zdaroŭjem. Jaho nie pakazvali na telebačańni z 10 sakavika, kali jon adpačyvaŭ na harnałyžnym kompleksie ŭ Sočach.

Jaho nie było na adkryćci turniru «Załataja šajba». Byŭ pieraniesieny i vizyt u Vijetnam, namiečany na 25—27 sakavika.

U aŭtorak P.Lohki razdražniona zajaviŭ radyjo «Svaboda»: «Prezydent pracuje ŭ Miensku, prymaje čynoŭnikaŭ, pracuje z dakumentami. Siońnia jon sustrakajecca sa staršyniom Nacyjanalnaha banku Piatrom Prakapovičam. Inšaje pytańnie, što prezydent sapraŭdy adsutničaŭ na ekranie niekatoruju kolkaść dzion. Jość ludzi, jakija zaŭsiody niečym nie zadavolenyja. To im mnoha prezydenta na ekranie, to im jaho nie chapaje. Jość u nas kazły-pravakatary — možacie dać hetuju frazu — jakich prosta chlebam, travoj nie karmi, a daj mahčymaść panahniatać abstanoŭku ŭ krainie. U prezydenta dastatkova ščylny, napružany hrafik, u jaho praktyčna nie byvaje vychodnych. Jon sustrakajecca z čynoŭnikami — i nieabaviazkova tut, na Karła Marksa, 38, i nieabaviazkova pad prycełam telekamer».

Nahadajem, što roŭna hod tamu, na pačatku viasny 2006 hodu, zdaryłasia padobnaja sytuacyja. Alaksandar Łukašenka publična źjaviŭsia na ekranach 20 sakavika. Potym jon raptam źnik z teleekranaŭ. Ciaham tydnia nie pravodzilisia narady, schody i sustrečy z aficyjnymi asobami. Abviaścili, što inaŭhuracyja prezydenta budzie 31 sakavika, potym pieranieśli na 8 krasavika. Padčas inaŭhuracyi Alaksandar Łukašenka vyhladaŭ stomlena, zmarniełym z tvaru, nahadvaje «Svaboda». Tady taksama chadzili čutki, što pieranos inaŭhuracyi adbyŭsia praz paharšeńnie zdaroŭja.

Spadar Lohki nia maje racyi ŭ svaich emocyjach. Zaviesa sakretnaści nad zdaroŭjem kiraŭnika dziaržavy — ułaścivaść aŭtakratyj. U ich z kiraŭnika robiać idała, jaki, u adroźnieńnie ad prostych śmiarotnych, nikoli nie pamylajecca i navat nie chvareje. U demakratyčnych krainach infarmacyja pra zdaroŭje prezydentaŭ adkrytaja hramadzkaści. A ŭ Biełarusi, možna padumać, kiraŭnik dziaržavy apošni raz chvareŭ u 1994 h. Kali my chočam bačyć našu krainu demakratyčnaj, varta i z prezydenta rabić nie ikonu, a prosta hałoŭnaha čynoŭnika.

• 0
• 0
• 0
• 0
• 0
• 0
• 0
• 0