Pačobuta adpuścili pad padpisku: «Nikoli nie dumaŭ, što z turmy tak lohka vyjści»
Žurnalist raskazaŭ «NN», što ekśpiertyzu jaho artykułaŭ rabiŭ palitołah Kizima, a z Varšavy jamu telefanavaŭ ministr Sikorski.
«Da mianie pryjšli ŭ kamieru i skazali źbirać rečy. Ja dumaŭ, što buduć pieravodzić u inšuju kamieru, ale mianie prosta vyvieli za bramu turmy», — paviedamiŭ Andrej Pačobut.
Andreja Pačobuta aryštavali 21 červienia. Suprać jaho zaviali kryminalnuju spravu i mielisia vinavacić pavodle kryminalnaha artykuła 367, častka 2 — «Paklop u adnosinach da prezidenta, jaki ŭtrymlivajecca ŭ publičnym vystupie, albo ŭ drukavanym ci publična demanstravanym tvory, albo ŭ ŚMI, učynieny asobaj, jakaja raniej była asudžana za paklop albo źniavahu».
Z aktyvistam biełaruskich palakaŭ, karespandentam «Gazeta Wyborcza» pahutaryŭ žurnalist «Našaj Nivy»:
«Naša Niva»: Jak usio adbyvałasia siońnia?
Andrej Pačobut: Niedzie paśla abiedu ŭ kamieru pryjšoŭ supracoŭnik, jaki paviedamiŭ, što mianie pieravodziać u inšuju kamieru. Pryviali na pieršy pavierch turmy. Dumaŭ, što tam i zastanusia, bo na pieršym paviersie samy žorstki kantrol, tam znachodziacca roznyja kabiniety administracyi. Tym nie mienš, dziažurny ź vietlivaj uśmieškaj (zdajecca, jamu było heta pryjemna) začytaŭ mnie, što ja vyzvalajusia pad padpisku pra niavyjezd. Nikoli nie dumaŭ, što z turmy tak lohka vyjści. Kali siadziš u joj, to, padajecca, tut stolki zamkoŭ, dźviarej i krataŭ. Mianie vypuścili praz bramu, kudy zajazdžajuć aŭtazaki.
«NN»: Spadziavalisia na vyzvaleńnie?
AP: Viadoma, nie.
Mnie ŭ subotu ranicaj pradjavili abvinavačańnie pa artykule 367 častka 2 «Paklop na prezidenta». Maksimalny termin pavodle jaho 5 hadoŭ turmy. Plus da ŭsiaho jašče treba dadać papiaredniaje źniavoleńnie — dva hady i dzieviać miesiacaŭ. To bok byŭ hatovy, što mahu atrymać 7 hadoŭ i 9 miesiacaŭ. Krychu ašaleŭ, kali pačuŭ, što adpuskajuć.
«NN»: Žonka kazała, što Vy čakali aryštu.
AP: Tak. Niedzie miesiac tamu ja atrymaŭ infarmacyju, što pa maich artykułach pryznačanaja ekśpiertyza. Zapatrabavali taksama maju charaktarystyku. Ź inšaha boku, dumaŭ, što heta moža być prosta psichałahičny cisk na mianie. Sproba zapałochvańnia. Kali 21 červienia dadomu pryjšoŭ śledčy Nikolski, to ja zrazumieŭ, što maja infarmacyja była praŭdzivaj. Zapytaŭsia tolki, jaki artykuł, na što pačuŭ: «Toj samy». Ja, darečy, u toj momant pisaŭ artykuł pra Alesia Bialackaha.
«NN»: Chto pravodziŭ ekśpiertyzu materyjałaŭ?
AP: Pravodzili jaje ŭ BDU. Zapomniŭ proźvišča Mochań, a taksama viadomy dziaržaŭny ideołah Kizima.
Ekśpiertyza atrymałasia bolš brutalnaj, čym abvinavačvańnie. Adznačałasia, što ja nie tolki ŭźvioŭ paklok na Łukašenku, ale i abraziŭ, i «dyskredytavaŭ dziaržavu». Tolki hetaj ekśpiertyzy dastatkova, kab mianie pasadzić.Nijakija inšyja dokazy nie buduć bracca ŭ raźlik.
«NN»: Cisk piersanalna na Vas ci na Sajuz palakaŭ zaŭsiody razhladajecca jak sihnał Varšavie.
AP: Ciažka kazać pra heta. Nie maju nijakaj infarmacyi pra hety bok spravy.
«NN»: Z Varšavy niechta ŭžo zvaniŭ?
AP: Tak, ministr zamiežnych spravaŭ Radasłaŭ Sikorski. Chacieŭ papytacca, jak ja siabie adčuvaju. Ja vykazaŭ jamu padziaku za padtrymku.
U razmovie ź Sikorskim kazaŭ, što nielha tarhavacca ludźmi, navat kali hety čałaviek ja. Šantaž nie musić prachodzić.
«NN»: Aryštam Vas mohuć padšturchoŭvać da emihracyi?
AP:
Kali staić vybar: turma ci emihracyja, to ja vybiraju turmu. Ja tut naradziŭsia, vielmi pryviazany da hetaj ziamli.Bieź jaje budu adčuvać siabie nie vielmi dobra. Heta moj asabisty vybar.
«NN»: A jak pavodzili siabie milicyjanty, śledčyja?
AP: Vielmi karektna. U ramkach zakona. Nijakaha cisku nie było. Padkreślena kulturna, vietliva. Tolki niadaŭna daviedaŭsia, što siadzieŭ u adzinočcy, bo byŭ adzinym padazravanym u turmie. A pa zakonie treba, kab asobna siadzieli abvinavačanyja, asobna asudžanyja, asobna padazravanyja. Tolki ŭ čaćvier, kali pajšła pahałoska, što ja ŭ adzinočcy, da mianie pasadzili chłopca z proźviščam Łatuška. Narmalny chłopiec.
«NN»: Jak umovy ŭ turmie? Nie źmianilisia?
AP: Nie, zusim. Chacia, kali traplaješ tudy nie pieršy raz, to nie ŭsio tak strašna. Prynieśli abied, dyk narmalnaja ježa. Čaho pieršy raz jana mnie padałasia takoj kiepskaj? (śmiajecca).
«NN»: Ci dumali, što ciapier budziecie rabić?
AP: Chaču pamycca narmalna (znoŭ śmiajecca), bo ŭ turmie niama haračaj vady.
Tak, ja abvinavačany, ale na maju dziejnaść heta nijak nie paŭpłyvaje, budu pracavać.
Ciapier čytajuć
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod32
Kamientary