U Paŭdniovaj Karei 600 tysiač čałaviek pryjšli pahladzieć na akułu, jakaja zachrasła ŭ kanale
U Paŭdniovaj Karei 3,5‑mietrovaja akuła stała niečakanaj turystyčnaj słavutaściu paśla taho, jak zachrasła ŭ vuzkim kanale. Pahladzieć na drapiežnicu ŭžo pryjšli bolš za 600 tysiač čałaviek, a miascovyja ŭłady navat nadali joj zvańnie hanarovaj ambasadarki Pusana, paviedamlaje Reuters.
Akułu ŭpieršyniu zaŭvažyli 18 vieraśnia ŭ vuzkim kanale Paŭnočnaha porta horada Pusana. Ekśpierty ličać, što heta bronzavaja akuła. Miarkujecca, što jana trapiła ŭ pastku, kali pieraśledvała zdabyču, ale paśla nie zmahła samastojna viarnucca ŭ mora.
Z taho času akuła stała papularnaj miascovaj słavutaściu. Pavodle acenak uładaŭ, prybiarežny park naviedali bolš za 600 tysiač čałaviek, jakija chacieli ŭbačyć žyviołu. U zvyčajnyja vychadnyja tam byvaje kala 2 tysiač turystaŭ, a hetym razam kolkaść naviedvalnikaŭ vyrasła prykładna ŭ 240 razoŭ — da 480 tysiač tolki za adzin z uik-endaŭ.
Akułu nazvali Bukanh-i — heta nazva ŭtvoranaja ad karejskaha najmieńnia Paŭnočnaha porta. Paśla apytańnia ŭ sacyjalnych sietkach ułady Pusana abviaścili jaje hanarovaj ambasadarkaj horada.
Mer Pusana Čon Dža Su taksama pryjšoŭ pahladzieć na akułu. Pavodle jaho słoŭ, u žyvioły sapraŭdy jość niešta zornaje: jana pakazvajecca kožnyja 5—10 chvilin i vyhladaje vielmi pryhoža.
U dzień, kali akułu zaŭvažyli, bierahavaja achova ŭžo sprabavała vyhnać jaje z kanała. Adnak paśla šaści hadzin apieracyju spynili pa rekamiendacyi navukoŭcaŭ, jakija papiaredzili, što prymusovyja dziejańni mohuć naškodzić žyviole abo spravakavać jaje na ahresiŭnyja pavodziny.
U Nacyjanalnym instytucie rybałoŭstva paviedamili, što stan akuły pakul stabilny, ale mahčymaści charčavacca i svabodna pieramiaščacca ŭ jaje abmiežavanyja. Kali jana zastaniecca ŭ kanale nadoŭha, heta moža pryvieści da asłableńnia arhanizma.
29 vieraśnia bierahavaja achova znoŭ sprabavała nakiravać akułu ŭ bok vychadu z kanała, vykarystoŭvajučy strumieni vady. Adnak i hetaja sproba, jak i papiaredniaja, nie dała vyniku — akuła nie zachacieła pakidać akvatoryju. Nastupnuju sprobu vyzvalić žyviołu śpiecyjalisty płanujuć zrabić 2 kastryčnika.
Źjaŭleńnie akuł u vodach Paŭdniovaj Karei samo pa sabie nie źjaŭlajecca niezvyčajnym. U pieršaj pałovie 2026 hoda kala ŭschodniaha ŭźbiarežža krainy zafiksavali 46 akuł — amal u čatyry razy bolš, čym za toj ža pieryjad 2025 hoda. Śpiecyjalisty źviazvajuć rost ich kolkaści z pavyšeńniem tempieratury marskoj vady i pavieličeńniem kolkaści ryby, jakaja źjaŭlajecca naturalnaj zdabyčaj akuł.
Ciapier čytajuć
Zamiest pareštkaŭ Vitaŭta za ścianoj Vilenskaj katedry znajšli tolki kuču kamianioŭ. Ale ŭłady Litvy hatovyja vydatkavać na praciah pošukaŭ jašče 1,5 miljona jeŭra3232
Kamientary
nu kto-niť iz prazdnych zievak svalitsia v vodu)