Ci admienić Viarchoŭny sud prysud Kazulinu?

Siońnia advakaty Alaksandra Kazulina padaduć u Viarchoŭny sud apošniuju skarhu na prysud, pavodle jakoha palityka źniavolili na piać z pałovaj hadoŭ. Čamu adkładałasia padača skarhi i ci jość šancy, što jaje zadavolać?

Advakaty Alaksandra Kazulina Ihar Rynkievič i Źmicier Haračka pojduć siońnia ŭ Viarchoŭny sud. U vieraśni Mienski haradzki sud užo razhledzieŭ analahičnuju skarhu na prysud Maskoŭskaha rajonnaha sudu, ale pakinuŭ jaje biez zadavalnieńnia. U toj ža dzień Alaksandra Kazulina sa śledčaha izalatara pieravieźli ŭ Viciebskuju kaloniju, dzie praź miesiac jon abviaściŭ haładoŭku.

Heta była biesprecedentnaja akcyja pratestu: jana ciahnułasia 53 dni i ledź nie zakončyłasia śmierciu viaźnia. Vychad z haładoŭki Alaksandar Kazulin nie zaviaršyŭ dahetul — u jaho asobny režym charčavańnia i znachodžańnia ŭ kalonii. Miž tym apošni šaniec abskardzić prysud u Viarchoŭnym sudzie palityk pakul nia vykarystaŭ. Heta j budzie vypraŭlena siońnia. Navošta čakali niekalki miesiacaŭ? Pavodle advakata Ihara Rynkieviča, siarod inšaha heta źviazana i z apošnimi padziejami ŭ krainie.

«Rychtavali jurydyčnyja arhumenty, ale ŭličvali i hramadzkuju sytuacyju. Miarkujem, zaraz budzie mienš subjektyŭnaha ŭ staŭleńni da našaha padabaronnaha. My znoŭ budziem nastojvać na tym, kab prysud admianili, kryminalnuju spravu spynili z pryčyny adsutnaści złačynstva ŭ dziejańniach Alaksandra Kazulina, a jaho nieadkładna vyzvalili», — skazaŭ Ihar Rynkievič.

Nakolki ŭdałaj moža stać apošniaja sproba asprečyć prysud? Advakaty adkazvajuć rašuča: jany vierać u pieramohu. A voś pravaabaronca Valancin Stefanovič pakidaje joj nievialiki šaniec.

«Va ŭłady zaŭsiody zastajecca pole dla maneŭra. Možna, prykładam, źmiakčyć pakarańnie. Ale mnie padajecca, ŭličvajučy apošnija padziei i kolkaść kryminalnych spraŭ suproć apazycyjaneraŭ, małavierahodna, što niešta budzie dobraje», — miarkuje Stefanovič.

Dačka palityka Jula Kazulina taksama nia vieryć ŭ toje, što Viarchoŭny sud admienić prysud:

«U mianie nadziej nijakich. Bo ŭ nas u krainie adzin čałaviek užo vyrašyŭ, što budzie z tatam. Nadzieja tolki na mižnarodny sud u pravoch čałavieka».

Jula Kazulina skazała, što ŭžo bolš za tydzień nie atrymlivaje listoŭ ad baćki z kalonii i tamu nia viedaje, jak jon ciapier pačuvajecca. Słovam supracoŭnikaŭ kalonii pra toje, što z Kazulinym usio dobra, nia vieryć. «U ich zaŭsiody nibyta ŭsio dobra, a potym vyśviatlajecca advarotnaje», — kaža Jula. Dziaŭčyna taksama paćvierdziła: jaje maci, Iryna Kazulina, užo bolej za dva tydni znachodzicca ŭ ZŠA pad nahladam daktaroŭ:

«Vy ž razumiejecie, što ŭsie hetyja nervovyja chvalavańni nie prajšli biez nastupstvaŭ, tym bolš dla jaje. Jana prachodzić abśledavańnie, daktary vyśviatlajuć, što ŭ jaje sa zdaroŭjem».

Były kandydat na prezydenta byŭ asudžany na 5,5 hadoŭ letaś ŭ lipieni. Palityka pakarali za nibyta chulihanstva i arhanizacyju vuličnych biesparadkaŭ padčas padziejaŭ 25 sakavika 2006 hodu. Adnak svajoj viny Kazulin nikoli nie pryznavaŭ.

Aleh Hruździłovič, Radyjo Svaboda

• 0
• 0
• 0
• 0
• 0
• 0
• 0
• 0